اتجاهات

الاحد 29/5/2011
هالة ابوعلم: مشاهدينا الكرام مساء الخير منذ مايزيد عن نصف قرن من الزمان انطلقت الدعوة لتعمير الصحراء في مصر بدات في الصحراء الغربية بتحويل مديرية الصحراء الجنوبية الى محافظة الوادي الجديد لانشاء وادي جديد في صحراء مصر الغربية يوازي النيل يبدا من واحة الخارجة جنوبا حتى الواحات البحرية شمالا ، تجربة التنمية في الصحراء الغربية خاصة في مجال التوسع الزراعي مرتبطة بتوفير الري تلك المياه التي تتناقص بشكل مستمر وما تحقق حتى الان لا يتناسب وقدرات وامكانات المنطقة يكفي ان نعرف ان مساحة الوادي الجديد تمثل 44% من مساحة مصر ومع ذلك عدد سكان المنطقة يبلغ حوالي 200 الف نسمة فقط تاتي اهمية الفكرة التي يدور حولها الحوار في اتجاهات ، الفكرة باختصار يدور حول نهر نيل جديد يبدا من بحيرة ناصر جنوبا يصب في منخفض القطارة شمالا على ان يقام حول النهر مجتمعات عمرانية جديدة الفكرة لها بعد تاريخي قديم اكدته وثائق الجمعية الجغرافية الملكية المصرية عام 1947 اشاراليها الدكتور هيرست الخبير العلمي بوزارة الاشغال العمومية آنذاك والذي اكد بان ثمة نهرا يجري في باطن الارض وانهخ كان هناك نههر نيل يجري في الواحات غير مجراه اكثر من مرة منذ القدم وان النيل في العصورالجيولوجية القديمة مارا بالواحات في طريقه للبحر المتوسط ، على اي حال فكرة نهر نيل جديد فكرة تستحق الاهتمام خاصة مع وجود الاهتمام بالتنمنية في الصحراء الغربية بوجه خاص ومنها مشروع ممر التنمية للدكتور فاروق الباز ومشروع التعمير للدكتور ممدوح حمزة، نهر النيل الجديد عهو موضوعنا في حلقة الليلة ولكن بعد ان نشاهد هذا التقرير الذي يتحدث عن بعض المشروعات المقترحة للتنمية وتعطيي اهتماما خاصا للوادي الجديد في مصر
تقرير
تنمية مصر ذلك الطرح الذي بدا يراود شعبها الان بعدما قام بثورته المجيدة التي ابهرت العالم والان اضحى التفكير في بناء مستقبل مصر امرا واجبا على كل وطني مخلص للبلاد ، مصر بطبيعتها تحمل مقومات بناءها من خلال اراضي شاسعة صالحة للزراعة ومساحات من صحاري مترامية الاطراف وايد عاملة وفيرة وقبل كل ذلك وبعده نهر النيل الذي على ضفافه قامت حضارات كثيرة وتحققت على ارض مصر انجازات ومشروعات كبرى ، الوادي الجديد ذلك النموذج الذي يعد قاطرة التنمية بجنوب مصر فهي تمتلك 6.5 مليون فدان صالحة للزراعة فضلا عن امكانية الاستثمرا في المجال السياحي بالاضافة الى بعض المحميات الطبيعية كالصحراء البيضاء وغيرها ان اهمية مشروع التنمية بالنسبة لمحافظة الوادي الجديد تتمثل في المواقع السياحية وايجاد فرص عمل جديدة لصغغر المستثمرين في مجالات متعددة وفتح افاق جديدة للعمران في المسافات البينية فيما بين ممر التنمية ومحافظات الوادي الجديد واستصلاح مساحات واسعة من الاراضي في محيط الممر وتصبح منطقة الوادي الجديد بما تمتلكه من ثروات وكنوز قادرة على رسم مستقبل افضل لاجيال مصر القادمة
فاصل
هالة ابوعلم: مشاهدينا الكرام الحقيقة احنا بنرحب دائما بكل فكر جديد ودايما بنقول ان احنا بنشجع البحث العلمي عايزين مصر تكون مليئة بالافكار الجديدة ، مفيش تقدم ولا حضارة بتقوم من غيرافكار وابحاث جديدة من غير فكرابنائها وولادها ايضا والنهارده احنا بنتكلم على مشروع جديد لاول مرة بنسمع عنه نهر نيل جديد في الصحراء الغربية ازاي ابتدت هذه الفكرة ايه تكلفة هذا المشروع كيف يتم تنفيذ هذا المشروع كل دي اسئلة الحقيقة هنطرحها على ضيوفنا النهارده اولا ارحب بضيفينا في الاستوديوالدكتور صبري حمد استاذ ورئيس قسم الجغرافيا البشرية كلية الدراسات الانسانية جامعة الازهر برحب بحضرتك دكتور صبري وبرحب ايضا بالدكتور ابراهيم غانم استاذ ورئيس قسم الجغرافيا بجامعة طنطا وصاحب فكرة مشروع النيل الجديد وطبعا مشاهدينا الكرام يسعدناان نتلقى مداخلاتكم على الهاتف حول هذا المشروع المقترح يعين خليني ابدا مع حضرتك دكتورابراهيم حضرتكم تكلمنا على هذا المشروع ايه الهدف منه ادينا فكرة عن مشروع نهر النيل الجديد
د/ابراهيم غانم: بسم الله الرحمن الرحيم هو المشروع ببساطة هو احياء نهر كامل منذ ملايين السنين احنا دلوقت في مصرمحتاجين مثل هذه المشروعات وهذا المشروع الحقيقة بعد الثورة مباشرة راودتني فكرة ان انا اقدم مشروع زي كده والحمد لله وهيبدا من بحيرة ناصر بعيدا عن السد العالي تجاه حدودنا مع السودان عشان المية اللي هتدخل فيه تدخل بالطمي بتاعها ويمشي بيه يمر علىا الواحات على الحافة الشرقية لكل الواحات ولكن ما ينزلش في الواحات انما على الحافة الشرقية لحدج ما يصب في منخفض القطارة
هالة ابوعلم: هو دا مشروع منخفض القطارة اللي سمعنا عنه ايام الرئيس الراحل جمال عيبد الناصر
د/ابراهيم غانم: لا دا غيره
هالة ابوعلم: يعني ايه الاختلاف بين المشروعين
د/ابراهيم غانم: الاختلاف ان الليب كان مطروح على الساحة ان احنا هنجيب مية من البحرالمتوسط من الشمال تنزل في منخفض القطارة ..لا..احنا هنجيب مية من الجنوب تملا منخفض القطارة يتحول مكنخفض القطارة الى بحيرة كبيرة مساحتها 20 الف متر مربع ، البحيرة دي هتستخدم اكثر من استخدام نمرة واحد انها بحيرة هتتولد منها الطاقة الكهرابائية من انحداء المياه على 50 او 120 او 130 كيلو متر عمق المنخفض فهنولد منها طاقة كهرابائية قد تصل في بعض الاحيان الى 5 امثال الطاقة المولدة من السد العالي الفايدة التانية هتبقى اكبر بحيرة سياحية عذبة تقوم على ضفافها منتجعات وقرى سياحية وفي نفس الوقت هتكون مزرعة اسماك لتربية جميع انواع الاسماك في المياه العذبة ، هتقوم على ضفافها منتجعات وقرى سياحية وقرى صيادين ومدن عادية ومارينات ويخوت
هالة ابوعلم: يعني مشروعات خدمية عمرانية طاقة سياحية ؟
د/ابراهيم غانم: وصناعات قايمة على الصناعات السمكية ، اما هذا النيل نفسه فله اهداف كتير يعني هو هيدعم الامن القومي المصري بدل ما الصحراء الغربية فاضية كده او شبه فاضية هتبقى متعمرة لان دا هيروي حسب تصنيف الاراضي في وزارة الزراعة اللي حددت وعمت دراسات استكشافية ودراسات تفصيلية قالت ان فيه 3 مليون فدان في منخفض جنوب الوادي اللي جنب توشكى وفيه حوالي مليون فادان في الواحات الداخلة ومليون فدان في الواحات الخارجة ومليون فدان في واحات الفرافرة
هالة ابوعلم: انت بتقول ليه ما تقومش زراعتهم على المياه الجوفية
د/ابراهيم غانم: المياه الجوفية مشكلة اللي بيولد على المياه الجوفية "يولد ميت" لانه المياه الجوفية تقريبا ناضبة غير متجددة
هالة ابو علم: بس دا مش راي اساتذة كبار زي الدكتور فاروق الباز ومن خلال الاقمرا الصنماعية اللي اخدتها وكالة ناسا للفضاء مثلا كان بيقول انه من خلال هذه الصور اتوجد في الساحل الشمالي اللي هو في صحراء مصر فيه مياه جوفية
د/ابراهيم غانم: دا كلام صحيح هو اللي حاصل ايه..؟ ان الصحراء الغربية وحتى ليبيا والجزائر فيها اكبر خزان مياه جوفية في العالم ومياه كتير ومياه عذبة لكنها غير متجددة
هالة ابوعلم: طيب دكتور صبري هل المشروع دا بيمثل اهدار لمياه النميل يعني مصر بتاخد 55.5 مليار متر مكعب نصيب الفرد في مصر قل الى ان وصل الى 825 متر مكعب هل احنا نتحمل مسشالة ان نحفر مجرى لنهر النيل جديد دا ما بيمثلش اهدار لنهر النيل واللي احنا بنعاني من نقص فيها
د/صبري حمد: خليني ابدا مع حضرتك بفكرة تعمير الصحرا من البداية احنا بدانا مشروع الوادي الجديد سنة 59 زي ما اشار الدكتورابراهيم انها مشاريع لم تحقق الهدف التنموي لها لانه اول نقطة رئيسية ان الفكر التنموي الذي ذهب الى الصحراء ذهب بفكر غير صحراوي بمعنى انه اعتمد على الري بالغمر ودا خطأ ، المفترض ان انا اتحول الى الرش والتنقيط ، فيه مشاريع اخرى جت في احة الفرافرة وجت في مشروع ترعة السلام ومشروع ترعة النصر في جنوب غرب اسكندرية كل دي مشاريع مش عايز اقول فاشلة ولكن تحتاج الى قوة دفع بفكر تنمويجديد يتناسب مع معطيات البيئة الصحراوية ، المشروع اللي طرحه الاخ الدكتورابراهيم هو مشروع جيد ويتناغم مع مشاريع جغرافية معروضة من حوالي 30 او 40 سنة
هالة ابوعلم: ايه الفرق بينه وبين توشكى الاتنين بيبتدوا من جنوب الوادي طيب ما بدل ما نعمل نهرنيل جديد طب ما نمكل مشروع توشكى اللي ابتديناه د/صبري حمد: معروض على الساحة الان مشروع بيتكلم عنه الدكتور ممدوح حمزة ودا مشروع بننادي بيه احنا الجغارفيين من 30 او 40 سنة انه ليس هناك حل للمشكلة السكانية الا بزيادة العمار في مصرلما نيجي نتكلم على مشروع الدكتورابراهيم اومشروع ممرالتنمية هنلاقي انه بالنسبة لممر التنمية يبقى غرب النيل بمسافة من 10 ل50 ل80 كيلو ، لواستعرض ت الخريطة المصرية للصحراء الغربية الاقي فعلا ان الممر دا موجود بمعنى انا عندي طريق يربط غرب اسكندرية ومدينة 6 اكتوبر وطريق يربط 6 اكتوبرالى واحات الفرافرة للداخلة للخارجة لشرق العوينات لمنطقة توشكى قبل شرق العوينات
هالة ابوعلم: ايوة انا مكنت سالت حضرتكم ايه الفرق بينه وبين مشروع توشكى ؟
د/صبري حمد: مشروع ىتوشكى كان يعتمد على امتلاء بحيرة السد العالي اذا وصلت الى 179 متر فلا بد من ان يفتح مفيض يودي على منخفض توشكى فلما وصل الفيضان في بحيرة السد العالي لحد 180 متر تقريبا في منتصف التسعينيات هذا هوالذي دفع الى مشروع توشكى لكن مشروع توشكى معروض من الستينيات ومعروف ان المية لو وصلت لمنسوب معين فالمحدد الرئيسي هنا المية
هالة ابوعلم: احنا على اي حال معنا اتصال تليفوني من الدكتور صلاح سعد رئيس الجمعية الافريقية لدراسات حوض النيل اهلا بيك يادكتورمعانا ..حضرتك استمعت لمشروع الدكتور ابراهيم رايك وتقييمك لمشروع نيل جديد يبدا من بحيرة ناصر ويصب في منخفض القطارة
د/صلاح سعد- رئيس الجمعية الافريقية لدراسات حوض النيل: هي طبعا اتجاهات كويسة جدا لانه احنا فعلا في مشكلة في وادي ضيق ومازالت المساحة المستغلة من مساحة جمهورية مصرالعربية لا تتجاوز 6% من اجمالي المساحة ونحن محتاجين فعلا الى ان نتجه الى اماكن تانية جديدة يستوعب الزيادة السكانية الكبيرة دي
هالة ابوعلم: ايه امكانية تحقيق هذا المشروع يادكتور صلاح لانه واضح انه محتاج مية كتيرة جدا ، محتاج تكلفة علاية احنا محتاجين نحفر من اول وجديد في الصحراء
د/صلاح سعد: الاراضي القديمة الموجودة على ضفاف الوادي وموجودة في الدلتا وخاصة في بعض شهورالصيف بتعاني من عجزونقص في المياه واحنا في الدلتا بنعمل محاولات عشان نغير من موضوع الري بالغمرالى موضوع الري بالرش اوالتنيقط وكل دا الهدف منه ان احنا نعمل مساحات مية لاماكن جديدة واحنا عندنا ممكن نتوسع في الساحل الشمالي وفي النوبارية وفي الحاجات دي
هالة ابوعلم: دكتور صلاح المفروض ان احنا بنعيش على وادي ضيق ومع ازدياد عدد السكان لازم نخرج بره هذا الوادي هل لما نخرج بالسكان بره هذا الوادي لازم نخرج يكون معانا مية بمعنى اخر لازم اعمل مشروع فيه مية علشان اخرج للمجتمعات العمرانية برة الوادي ولا ممكن انا افضي وادي الدلتا اللي فيها الاراضي الخصبة الاراضي اللي مليانة طمي اللي المفروض ان احنا مانبنيش عليها اكتر من كده نخرج احنا كسكان بره ونسيب الاراضي دي هي دي الزراعة هل دا فكر مظبوط وهل المجتمعات العمرانية لما ننقلها ننقلها وفيه جنبها مصدر مية
د/صلاح سعد: احنا ممكن نخرج بره الوادي وممكن نبني جامعات ومصانع ومدن جديدة ودي بتحتاج الى توصيلة صغيرة لمياه الشرب ولكن هذا المشروع الكبيرالضخم هيحتاج تكلفة عالية جدا جدا جدا ، هيحتاج كمية مياه كتيرة جدا انا هعملا رافد تاني للنيل طوله حوالي 1200 او 1300 كيلو متر عشان خاطر يصب في منخفض القطارة ودا مشروع فعلا ضخم وكويس
هالة ابوعلم: دكتور صلاح سعد انا بشكرك على هذه المداخلة
فاصل
هالة ابوعلم: اهلا بكم مشاهدينا مرة اخرى والحديث يتواصل حول نهر نيل جديد صاحب المشروع والفكرة الدكتورابراهيم غانم استاذ ورئيس قسم الجغرافيا بجامعة طنطا هنجيب المية منين يادكتورابراهيم اللي هتمشي في نهر النيل اللي هيوصل من جنوب مصر لغاية منخفض القطارة او الوادي الجديد
د/ابراهيم غانم: جزء هنوفره من الوادي والدلتا الحاليين لانه فيه هدر كبير فيها
هالة ابوعلم: منين يبتدي الاهدار؟
د/ابراهيم غانم: من طريقة الري .. لواحنا حولنا الري التقليدي العادي الى الري الحديث المحوري اللي هو بالرش او التنقيط
هالة ابوعلم: طيب هل كل الزراعات بتحتاج الى الري بالغمر؟
د/ابراهيم غانم: في وادي الدلتا كله غمر ..
هالة ابوعلم: بس فيه بعض المحاصيل ما بتحتاجش الري بالغمر
د/ابراهيم غانم: لواحنا طورناه للري الحديث بنوفر 5 الاف مترمكعب دي نمرة واحد، نمرة اتنين لو احنا طورنا المركب المحصولي بمعنى ان احنا بنزرع محاصيل كتيرشرهه للمياه لواحنا قللنا مساحتها زي الارز وزي البص والسكريوفر لنا 3 مليار متر مكعب على 5 مليار من الري بالغمر يبقى ادي 8 مليار لو احنا في الدلتا او في الوادي وفيه مياه صرف يعني تلاقي الفلاح غمرالارض ولقى ىالمية كتير يروح صارفها في المصرف ..ما يتنفعش.. المية اللي اتصرفت دي يعاد استخدامها مرة تانية هتوفر لنا بخلطها مع مياه الري توفر كمانم 3 مليارمتر مكعب
هالة ابوعلم: دلوقت انا علشان نعمل نهر النيل الجديد مش هنيجي على طول نروح شاقين مجرى ..لا .. دا لازم نغير في طريقة الزراعة وطريقة الري والتركيب المحصولي عشان نقدر بعد كده نعمل كده
د/ابراهيم غانم: نعم نعم .. يعني استخدام مية الصرف الزراعي مفيهاش مشكلة يعني احنا عندنا 7 مليار مترمكعب صرف زراعي الفلاحين بتستخدم الصرف فعلا ولكن النص التاني بيروح هدر في البحيرات الشمالية زي بحيرة المنزلة طب ما نستخدمهم!!
هالة ابوعلم: ما ياثرش على البحيرة نفسها لما يقوم عليها الصيد وانشطة اخرى
د/ابراهيم غانم: لا دا هيوفر 3.5 مليارمتر مكعب من الصرف الزراعي ، شوفي بقى انا هوفر في الوادي والدلتا وهاخد بدالهم من بحيرة ناصر انا وفرت هنا وكانت مياه بتهدر وفيه كمان حوالي من 3 الى 4 مليار متر مكعب مياه جوفية في الوادي والدلتا
هالة ابوعلم: طيب انا هتوقف مع حضرتك مع نقطة ونسال دكتور صبري في مسالة انه علشان نوفر المية لازم نشتغل الاول على مسالة توفير الاهدار اللي بيهدر في الزراعة في الري في اماكن كتيرة جدا
د/صبري حمد: اولا انا موافق على دمجها مع المشروعات التانية مشروع ممر التنمية ولكن لابد ان نضع في الاولوية ان هناك مشروعات قبل هذا المقترح قبل مشروع ترعة السلام يكاد يكون متوقف واتصرف عليه فلوس كتير
هالة ابوعلم: بس ترعة السلام دى في سيناء يعني اتجاهه غير اتجاه الصحراء الغربية
د/صبري حمد: فيه اولويات ودا مطروح لاهل الحل والعقد والراي العام والخبراء وما الى ذلك ، عندي برضه اتصرف على ترعة النصر جنوب غرب اسكندرية النقطة اللي طرحها دكتورابراهيم فعلا احنا محتاجين مشروع قومي لتغيير نمط الري في الوادي والدلتا ولو حتى على نصف المساحة احنا مزروع عندنا 8 مليون فدان نفترض ان احنا وفرنا مية لنص المساحة دي يعني حولنا من ري بالغمر الى الرش والتنقيط او الري المحوري فعلا هنوفر بس برضه عايزاضيف حاجة انه انا عندي فعلا مية جوفية وعندي محجموعة محاورعرضية كانت عبارة عن طرق قوافل بين الواحات وبين النيل ودي فيهعا مجموعة ابار ودي كانت رسالتي في الماجستير اللي هي مناقشة شبكة الطرق في الصحراء الغربية فيها مواضع للابار يعني انا لا انفي تماما المياه الجوفيه لانه من الاف السنين والواحات قائمة على الزراعة صحيح انه لم يثبت بعد ان هذه المياه مية متجددة ، كان فيه مؤتمر حاضر فيه الدكتور فاروق الباز وقلت له انا عالم جغرافيا وعايز اعرف من حضرتك مصير المية دي ايه ..؟ هل هي متجددة ولا مية حفرية وقال الاتي لم يجزم احد حتى الان ان هذه المياه متجددة وحفرية وعلينا ان ناخذ بالرايين معا
هالة ابو علم: طيب تفرق ايه يادكتور؟
د/صبري حمد: لانه المية الحفرية قابلة للنفاد امنا المية المتجددة من مركز الصحرا كان بيقول ان المية المتجددة دي المية اللي بتزل من الامطار على شمال السودان وتجينا بس المسافة اللي بتقطعها حوالي 234 سنة
هالة ابوعلم: انا افتكرتها جاية من الامطار اللي على ساحل شمال مصر
د/صبري حمد: لا .. جاية من جنوب السودان وتشاد فاحنا بناخد بالرايين دول ولا شك ان هناك بعض الابار والعيون سواء اللي موجودة في الواحات الخارجة او الواحات البحرية اللي نعرفها جيدا ان لها مصادر مياه النيل قبل بناء السد العالي
هالة ابوعلم: معانا الاستاذ محمد الغباشي الخبير الاستراتيجي اهلا بيك ياستاذ محمد احب اني اسمع راي حضرتك
محمد الغباشي - الخبير الاستراتيجي : اولا باحيي دكتور ابراهيم والدكتور صبري ان هما عاملين بحث جيد جدا ولكن انا ليا راي خاص ان هما معتمدين على البحث على نقل مية من بحيرة ناصر الى منخفض القطارة دلوقت عشان بس يبقى البحث باسلوب علمي المسافة اللي هيتنقل بيها المية من بحيرة ناصر الى منخفض القطارة دي هتبقى مسافة بعيدة ما بين 1200 ل1300 كيلو متر
هالة ابوعلم: طيب نسمع رد الدكتور ابراهيم طول المسافة رد حضرتك عليها ايه؟
د/ابراهيم غانم: انا متفق مع سعادته
هالة ابوعلم: طيب كمل يافندم
محمد الغباشي - الخبير الاستراتيجي : نمرة اتنين هو الفكر كويس جدا ولكن احنا محتاجين ان احنا يبقى عندنا دراسة جدوى للاجراءات اللي هيتم ليها المشاريع دي يعني انا عندي طول المسافة دي هيخلي التكلفة بتاعة المتر المكعب من المنية اللي هيوصل الى نقطة النهاية هيبقى عالي جدا ومش عارف الدكتور ابراهيم عمل الحسابات بتاعته من طرمبات وانابيب لنقل المية من مسافة 1200 كيلو نمرة اتنين لوحدات رفع وخصوصا ان الاراض بتختلف من بحيرة ناصر عن منخفض القطارة والارض تتجه الى الشمال فيه مناطق عتبقى منبسطة ومناطق هتبقى مرتفعة
هالة ابوعلم: طيب انا خايفة ياستاذ محمد ان احنا نواجه نفس المشكلة اللي واجهناها في ارض توشكى بالنسبة لطرمبات الرفع وبخرالمياه يعين هي نفس المشاكل
محمد الغباشي - الخبير الاستراتيجي : تماما يافندم.. النقطة التالتة ان احنا هنخل بمنسوب المية في بحيرة ناصر وبحيرة ناصر المفترض ان الدكتور ابراهيم بيقول البيان الكامل ليها ان طولها حوالي 500 كيلو متر منهم حوالي 350 كيلو مكتر ما يسمى بالجزء المصري منم بحيرة ناصر و150 كيلو متر من حدود السودان بيسموه بحيرة النوبة وبالتالي احنا لما نسحب من بخيرة ناصر حتى لو وصل مستوى المية فيها من 179ل 180 ودا اقصى مستوى للمية ممكن تتحمله بحيرةة هيبقى فيه اضرار بمصالح الاخوة في السودان واعتقد ان هما لن يسمحوا بهذا
هالة ابوعلم: اشكرك استاذ محمد غباشي الخبير الاستراتيجي ..دكتور ابراهيم التحديات اللي ذكرها الاستاذ محمد دي تحديات بتواجهك في مشروعك نقدر نتغلب عليها
د/ابراهيم غانم: نعم نعم.. الفكرة الجديدة اللي انا جاي اطرحها مكا اتقالتش لسه منين اجيب المية لانه شوية المية دول ال8 ملياردول مش هيكفوا ..انا دورت على مورد يكون عندنا واتوفر وفي نفس الوقت يكون محتاجينه دول حوض النيل بشدة وبالحاح وفي نفس الوقت مايقدرش غيرمصر تديلهم الموردج دا زي ماهما عايزين لقيت ايه سطوع الشمس في البحيرات اولا الطاقة الشمسية ، طاقة كهربائية شمسية من عند الواحات وهي اكبرمنطقة في العالم بتستخدم طاقة شمسية ، نيل الواحات نفسه وهو بيصب في منخفض القطارة هيبقى بيولد طاقة،الطرق اللي متفرعة منه وهتنزل الواحات هتولد طاقة والطاقة الشمسية الي هتتولد من الواحات هتزولد طاقة كبيرة ، دول حوض النيل ما بينهم اتفاقيات ربط كهربائي وهما كلهم دول يعني محتاجة محتاجة الطاقة بشكل غير عادي يعني اصدر لهم فائض طاقة يدوني المية
هالة ابوعلم: طيب هما دلوقت بيعملوا سدود عندهم عشان المية
د/ابراهيم غانم: ما انا واخد بالي .. احنا عندنا السد العالي هما مش هيعملوا سد عالي مستحيل
هالة ابوعلم: سد الالفية دا مش سد واحد بيصل عددهم الى 7 سدود كمان
د/ابراهيم غانم: مش هيوصل الى السد العالي فهما في مسيس الحاجة الى كهرباء لانها دول لسه فقيرة ومعندهاش اقتصاد صناعي ولا اقتصاد سياحي دول زراعة بس
هالة ابوعلم: طيب ايه تاني اللي حضرتك عايز تقوله بخصوص المشروع
د/ابراهيم غانم: بخصوص المشروع هو دا ابيع لهم الكهربا وابادلها بالماء هتجيلي مية زي ما انا عايز ممكن تجيلي 50 مليار مترمكعب كمان عارفة حضرتك بحيرة فيكتوريا منبع من منابع النيل البحيرة دي وزاسعهة جدا من اوسع البحيرات احنا لو ردمنا تلتها الدول التلاتة اللي بتقع عليها كينيا واوغندا وتنزانيا هتسعد ليه لانه هيبقى عندهم ارض زراعية جديدة وهنوفر المسطح المائي بتاعها من البحر هتفضل نفس المية هي نفس المية بس هجيب منها جزء من هنا
هالة ابوعلم: طيب دكتور صبري انا عايزة اسمع تعليق حضرتك بعد ما الصورة الى حد كبير اكتملت او وضحت من خلال كلام الدكتور ابراهيم
د/صبري حمد: اولا بالنسبة لحوض النيل انا ارى ان هناك صعوبة شديدة الان في ظل الموقف السياسي العالمي والموقف الاقليمي واتفاقيات جديدة اذا كان هما مش راضيين على نصيبنا ال55.5 مليار حتى الان واحنا في سبيلهم لاقناعهم عشان كده وحضرتك بتقولي 7 سدود ..لا ..هما 30 سد
هالة ابوعلم: سد الالفية اللي في اثيوبيا
د/صبري حمد:اثيوبيا عندها مشروع ل30 سد هو الاعلام عندهم كهربا ولكن الى اي مدى الدراسات متضاربة اللي بيقول هتحوش مية وتمنع واللي بيقول لا فانا المية دي محدد رئيسي ممكن يفشل الموضوع او ينجحه ، انا عندي اعمل تكامل مع مقترح الدكتورابراهيم وممرالتنمية واعادة توزيع السكان وعندي مجموعة دروب 12 درب طرق قديمة ما بين الفيوم والواحات البحرية ، بني سويف والواحات البحرية ، المنيا والواحات البحرية ، اسيوط وواحات الفرافرة
هالة ابوعلم: هذا الدرب بيسمح بايه بقى ؟
د/صبري حمد: الدرب دا مكان عبارة عن طريق قديم ممر للابل والقوافل لانه التوجيه الجغرافي للواحات زمان كان مع وادي النيل الطرق دي فيها مواقع لابار وعيون قديمة موجودة قد تكون الرمال غطت بعضها ولكمن من خلال مسح جيولوجي ومتكاملة جغرافية استراتيجية ممكمن نوضح هذه الاماكن انا يمكن بخبرتي الجغرافية وانا بسافر على طريق الواحات البحرية من الجيزة فيه منطقة اسمها البحور انا كنت متيقن تماما انها فيها مية اولا منسوبها على سطح البحر ما بين 58 و68 متر منسوب الواحات ما بين 34
يمكن سيوة المنطقة الوحيدة اللي هي تحت مستوى سطح البحر وانا كنت متيقن تماما انه فيه منطقة مية هنا وفعلا حفروا بيرين مية اللي سمعته ان وزارة المية هي اللي عملت البيرين دول وطلعت مية متدفقة
هالة ابوعلم: طيب استاذنك نطلع نشوف راي الناس ونطلع نكمل
فاصل
مواطن1: عمر ما هيرجع النبيل زي النيل دا ابدا هتجيب ميته منين
مواطن2: نهر تاني !!! هو نهر النيل اللي احنا فيه دا ونحمد ربنا نشكر فضله علينا اهم حجاجة المية ما تتقطعش علينا
مواطن3: هنعمل مشروع نهر وهمي زي حكاية توشكى اللي خدت مية بملايين الامتار ..وهم وما استفدناش منه بشئ لسه هنعمل نهر تاني ونقعد عشرات السنين عشان نعمل نهر تاني
مواطن4: والله اذا كان المشروع دا هيفيد البلد وهيعود عليها بالخير يبقى ياريت
مواطن5: المشروع دا بالعكس دا هيحقق لنا موارد للاكل وموادر لكل حاجة غير فرص العمل لينا جميع الشباب العاطل وسبب من اسباب البلطجة وسبب من اسباب كتيرة جدا هيوفر فرص عمل للناس دي وهنقضي على جرايم كتيرة جدا
فاصل
هالة ابوعلم: دكتور ابراهيم حضرتك صاحب المشروع وصاحب الفكرة كنت حضرتك بتقول ان المشروع دا ممكن يوفر لنا 6 مليون فدان صالحين للزراعة اي انواع الزراعة
د/ابراهيم غانم: اي زراعة ماعدا القطن والقصب احنا هنعمل مصر تانية وهيأوي ويعول ما بين 30 الى 40 مليون مصري في هذا الوادي الجديد واحنا لو ماعملناش مشروع زي دا طب احنا هنروح فين
هالة ابوعلم: طيب ليه حضرتك مافكرتش في استكمال بعض المشروعات اللي قايمة بالفعل ليه لانه فيه مشروع حضرتك بتبني عليه بيقلل في التكلفة يببقى انت بتكمل زي مشروع ترعة السلام وليه حضرتك مارحتش الصحرا الشرقية بدل الصحرا الغربية
د/ابراهيم غانم: احنا في الوادي والدلتا الارض ضاقت بنا لازم نخرج ملايين الناس وعشالن نخرج ملايين الناس من وادي الدلتا مافيش غير مشروع زي كده في حديث نبوي شريف بيقول " من أعيته المكاسب فعليه بمصر وعليه بالبر الغربي " اي الصحراء الغربية صدق الرسول صلى الله عليه وسلم فانا انطلقت من هذا الحديث وفعلا الصحراء الغربية فيها فعلا خيرات فيها 6 مليون فدان انا عايز اكتر من كده ايه
هالة ابوعلم: طيب الدكتور صبري
د/صبري حمد: اولا التكلفة الماديسة دي متروكة لاهل الاختصاص يعني اقتصاد او ما الى ذلك يعني على سبيل المثال اعلن عن ممر التنمية 34 مليار انا بقول ياجماعة البرالغربي بتاع اسيوط ولو خدنا الطريق الموجود اللي زي ماشرحته لحضرتك من اسكندرية ل6 اكتوبر للفرافرة للداخلة للخارجة هو موجود بالفعل ما اعمل دراسة مسحية انا اعمل سكة حديد من ابو طرطورفي الوادي الجديد وتطل على البحر الاحمر، عندي سكة حديد من الواحات البحرية لحد التبين ايه المانع اني اعمل منفذين لسكة حديد واحد على البحر المتوسط وواحد على البحر الاحمر انا محتاج دراسة مسحية عشان اوصل ابو طرطور للبحرية واخد سكة حديد تاني من جنوب غرب مدينة 6 اكتوبرلاسكندرية يعني الحاجات الخمسة اللي قال عليها ممر التنمية طريق كبير انا عندي الطريق موجود بس حارة واحدة رايح جاي اكبره يتكامل مع مشروع الدكتور ابراهيم بدل ما حارة اخليه اتنين تلاتة اربعة
هالة ابوعلم: وحضرتك شايف ان احنا نحصل على مياه مقابل اعطاء طاقة لدوزل افريقيا دي مسالة قابلة ..؟
د/صبري حمد: هو طبعا فيه بعد سياسي اذا استطاعت السياسة ان تكسر حدة هذا الموضوع فممكن
هالة ابوعلم: طيب باختصار يادكتور صبري حضرتك شايف ان هذا المشروع اللي اتقدم بيه الدكتور ابراهيم غانم شايف انه مشروع جدير بالاهتمام وجدير بالبحث وجدير بالدراسة وبان الحكومة اوالدولة تعطيه الاهتمام اللازم لربما قدرنا ان احنا نحققه في المرة اللي جاية
د/صبري حمد: هو مشروع جدير بالاهتمام ويتكامل مع ممر التنمية ويتكامل مع اعادة توزيع السكان الذي يتبناه الان الدكتور ممدوح حمزة وان كان الجغرافيين قد بداوا قبله بعشرات السنين كل دي مشروعات تتكامل وتتلاقى الافكار
هالة ابوعلم: اشكرك شكرا جزيل استاذ صبري حمد استاذ ورئيس قسم الجغرافيا البشرية بكلية الدراسات الانسانية جامعة الازهرعلى وجود حضرتك معانا النهارده وبشكرحضرتك صاحب هذا الجهد وهذه الفكرة الدكتورابراهيم غانم استاذ ورئيس قسم الجغرافيا جامعة طنطا والحقيقة بنشجع كل افكارجديدة وبنشجع كل صاحب بحث وفكرجديد ونلتقي دائما على خير ومصر دائما بخير بعطاء ومجهود اولادها ..الى اللقاء