لحمة بصوص المشروم على "سفرة دايمة"

النهارده هنعمل مع بعض لحمة بصوص المشروم ليكي ولأسرتك، وممكن تقدميها مع المكرونة أو الرز.
لحمة بصوص المشروم
المقادير:
1⁄4 كيلو لحمة ستيك مقطعة شرائح
10 قطع مشروم مقطعة شرائح
1⁄2 كوب صلصة طماطم
ملعقة كبيرة زيت زيتون
ملعقة كبيرة زيت نباتي
2 ملعقة صغيرة توابل
21⁄2 ملعقة كبيرة زبدة
ملح وفلفل أسود
كوب شوربة
الطريقة:
1- تبلي اللحمة بالملح والفلفل الأسود، وبعد كده ادهني الطاسة بالزيت النباتي وحطي اللحمة وسيبيها على النار لحد ما تستوي كويس على الناحيتين، وبعد كده شيلي اللحمة على جنب.
2- حطي زيت الزيتون وملعقة زبدة في الطاسة وضيفي عليها المشروم والملح وقلبيهم على النار لمدة 10 دقائق لحد ما يكون لون المشروم بني، وبعدين ضيفي صلصة الطماطم وقلبيهم مع بعض لمدة 6 دقائق.
3- ضيفي الشوربة على المشروم وقلبيهم على النار وضيفي عليهم فلفل أسود وسيبيها لحد ما تغلي، وبعد كده غطي اللحمة في الصوص على نار هاديه لمدة 5 دقائق، وبعدين شيلي اللحمة من الصوص.
4- سيّحي ملعقة ونصف زبدة في الصوص على النار وضيفي عليهم التوابل وقلبيهم مع بعض، وبعد كده شيلي الصوص من على النار وضيفيه على اللحمة وقدميهم.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،