شرائح اللحمة بصوص المشروم

النهارده هنعمل شرائح اللحمة بصوص المشروم، ودي تعتبر وجبة متكاملة تقدري تقدّميها على سفرتك في أي عزومة، جرّبوها وابعتوا لنا رأيكم فيها، وماتنسوش تقولوا لنا كل الوصفات اللي عايزين تعرفوها..
شرائح اللحمة بصوص المشروم
المقادير:
* 4 قطع لحمة استيك
* 1/ 2 1 كوب شوربة لحمة
* 2 ملعقة كبيرة كريمة طبخ
* 2 ملعقة كبيرة زبدة
* ملعقة صغيرة دقيق
* 1/ 2 علبة مشروم
* 1/ 4 كوب خل
* ملح وفلفل
* 2 فص ثوم
* بصلة
الطريقة:
1- هاتي حلة وحطّي فيها الزبدة على النار، وشوّحي فيها اللحمة لمدة 3 دقائق؛ لغاية ما تتحمرّ من الناحيتين.
2- ارفعي اللحمة من على النار، وبعد كده حمّري البصل في نفس الحلة، وبعدين ضيفي عليه الثوم والخل.
3- اخلطي الدقيق مع الشوربة في الخلاط، وبعد كده ضيفي الخليط ده على البصل، وسبيهم على النار لغاية ما الخليط يبدأ يغلي.
4- بعد كده ضيفي اللحمة وقطّعي المشروم عليهم، وسبيهم على النار لحد ما تحسي إن اللحمة والمشروم استووا، وبعد كده تبّليهم بالملح والفلفل.
5- ضيفي الكريمة على اللحمة، وسيبي اللحمة تسخن شوية، وبعد كده حطيها في طبق التقديم، وممكن تعملي معاها أرز أبيض.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،