أشهى الأطباق × عيد الأضحى على "سفرة دايمة" (2)

أهلاً بكل أصدقاء "بص وطل" و"سفرة دايمة"...
نتمنّى إنكم تكونوا بتقضّوا عيد سعيد مليان بالأحداث الجميلة والمبهجة...
وترجعوا بعد الأجازة دي وكلكم نشاط وحيوية...
وزي ما وعدناكم إننا هنكمّل معاكم وصفاتنا الخاصة بعيد الأضحى...
النهارده هنقدِّم لكم مجموعة من الوصفات اللي طلبتم إننا نقدِّمها لكم خلال الأسبوع اللي فات...

*******************

ممكن تقدّميهم على شكل ساندويتشات
الكلاوي والسجق
المقادير:
* 1/ 2 كيلو كلاوي
* 1/ 2 كيلو سجق
* 2 ثمرة طماطم مُقشّرة ومُقطّعة مكعبات صغيرة
* كوب شوربة لحمة أو مية (على حسب الرغبة)
* 2 ملعقة كبيرة بقدونس مفروم
* 2 ملعقة صغيرة صلصة طماطم
* 4 ملاعق كبيرة زيت زيتون
* بصلة كبيرة مفرومة ناعم
* ملعقة كبيرة دقيق
* ملح وفلفل
الطريقة:
1- نظّفي الكلاوي كويس، واغسليها وقطّعيها لنصفين.
2- سخّني ملعقتين من زيت الزيتون في طاسة على نار متوسّطة، وبعد كده ضيفي الكلاوي، وحمّريها لغاية ما لونها يبقى مائل للبني، وبعد كده ارفعيها من على النار، وسيبيها على جنب.
3- ضيفي السجق على نفس الطاسة، وحمّريه لمدة 5 دقائق أو لغاية ما لونه يحمرّ، وبعد كده ارفعيه من على النار.
4- بعد كده ضيفي باقي الزيت على الطاسة، وضيفي عليه البصل مع التقليب لمدة 5 دقائق أو لغاية ما لونه يبقى ذهبي، وبعد كده قلّلي الحرارة، ورشّي عليه شوية دقيق مع التقليب لمدة دقيقتين.
5- بعد كده ضيفي الطماطم والصلصة والشوربة على الدقيق والبصل مع التقليب لغاية ما كل المكوّنات تتجانس مع بعضها، وبعد كده تبّليهم بشوية ملح وفلفل.
6- ارفعي درجة الحرارة، وغطّي الطاسة، وسيبيها لغاية ما الخليط يبدأ في الغليان مع التقليب من حين لآخر لغاية ما الصلصة تبقى سميكة شوية.
7- بعد كده ضيفي الكلاوي والسجق ونصف كمية البقدونس وشوية ملح وفلفل، وبعدين غطّي الطاسة مرة تانية، وقلّلي درجة الحرارة، وسيبيه لمدة 20 دقيقة أو لغاية ما تحسّي إن كل المكوّنات استوت مع التقليب من حين لآخر.
8- ولما تتأكّدي إن كل حاجة وصلت لدرجة السوى اللي إنتِ عايزاها، حطّيهم في طبق التقديم وزيّنيه بالبقدونس، وممكن تقدّميهم على شكل ساندويتشات.. وبالهنا والشفا.

*******************

ممكن قبل ما تقدّميها تزيّنيها بالبقدونس المفروم
طاجن الكرشة
المقادير:
* كيلو إلا ربع كرشة
* 3/ 2 كوب زيت زيتون
* 2 بصلة مفرومة كبير
* 6 فص ثوم مفرومين
* 3 ملاعق صغيرة فلفل أحمر مطحون
* 3 ملاعق صغيرة زعتر طازج مفروم
* كوب وربع شوربة
* 3 ملاعق كبيرة صلصة طماطم
* كوب حمص مسلوق
* 2 كوب طماطم مقطّعة
* 1/ 2 كوب بقدونس مفروم
* فلفل أخضر حار مفروم
* 2 ورقة لاورا
* ملح وفلفل
* قرنفل
الطريقة:
1- نظّفي الكرشة كويس، وحطّيها في مية مغلية، وبعد كده ارفعيها، وانقعيها في مية باردة لمدة 10 دقائق، وبعدين اشطفيها تاني كويس، ونشّفيها، وقطّعيها إلى مربعات متوسّطة الحجم.
2- سخّني الزيت في إناء على نار متوسّطة، وضيفي إليه البصل، وقلّبيه لمدة 5 دقائق لغاية ما تحسّي إن البصل بقى طري شوية، وبعد كده ضيفي الثوم وقلّبيه لمدة دقيقتين.
3- بعد كده ضيفي قطع الكرشة والفلفل الأحمر المطحون والشوربة، وسيبيهم على النار لغاية ما يغلووا.
4- بعد كده ضيفي قطع الطماطم والصلصة والفلفل الحار وباقي التوابل، وقلّبيهم كلهم مع بعض، وتبّليهم بالملح والفلفل، وغطّيهم ودخليهم الفرن لمدة ساعة.
5- بعد كده شيلي ورق اللاورا من الطاجن، وضيفي عليه الحمص، وقلّبيهم مع بعض، وغطيهم ودخّليهم الفرن مرة تانية لمدة ساعة إلا ربع تقريباً، وممكن قبل ما تقدّميها تزيّنيها بالبقدونس المفروم.. وبالهنا والشفا.

*******************

دخّليه الفرن وسيبيه لمدة ربع ساعة وقدّميه سخن
الحواوشي
المقادير:
* 1/2 1 ملعقة صغيرة خميرة
* 1/4 1 كوب ماء دافئ
* 3 أكواب دقيق
* 1/ 2 ملعقة صغيرة ملح
للحشو:
* 2 ملعقة كبيرة زيت زيتون
* 1/ 2 كيلو لحمة مفرومة
* بصلة متوسّطة مفرومة ناعم
* ثمرة فلفل أخضر مفروم ناعم
* ثمرة فلفل أحمر حار مفروم ناعم (اختياري)
* ملح وفلفل
الطريقة:
1- لتحضير العجينة، ذوّبي الخميرة في 4/ 1 كوب من الماء الدافئ، وسيبيه لمدة 5 دقائق حتى تتفاعل.
2- اخلطي الدقيق والملح مع بعض، وبعد كده ضيفي خليط الخميرة مع العجن، وبعد كده ضيفي الماء تدريجياً مع الاستمرار في العجن، لمدة 10 دقائق أو لغاية ما كل المكوّنات تندمج مع بعضها كويس والعجينة تبقى ناعمة معاكِ.
3- حطّي العجينة في وعاء عميق مدهون بالزيت، وغطّيه وسيبيه لمدة نصف ساعة علشان يتخمّر كويس، وبعد كده اعجنيها مرة تانية على سطح مرشوش بقليل من الدقيق لمدة 5 دقائق، وقطّعيها لقطع متساوية في الحجم.
4- بعد كده افردي قطع العجين اللي عندك لغاية ما تحصلي على دوائر قطرها حوالي 15 سم وسمكها 4/ 1 سم، ورصّيهم في صاج مرشوش بقليل من الدقيق وغطّيه، وسيبيه يتخمّر مرة تانية لمدة نصف ساعة كمان أو لغاية ما حجمه يتضاعف.
5- بعد كده دخّلي الصاج في فرن ساخن على درجة حرارة عالية، وسيبيه لمدة خمس دقايق.
6- لتحضير الحشو، سخّني الزيت في إناء على نار متوسّطة، وبعد كده ضيفي عليه اللحمة وقلّبيها لمدة 5 دقائق.
7- بعد كده ضيفي البصل، وقلّبيه لمدة خمس دقائق، وبعدين ضيفي الفلفل الأخضر والفلفل الحار والملح والفلفل، وسيبيه على النار لمدة خمس دقائق كمان أو لغاية ما السائل اللي في اللحمة يبدأ يتبخّر مع التقليب من وقت للتاني.
8- سخّني العيش اللي عملتيه على الشواية؛ علشان ياخد علامات الشواء، وبعد كده افتحي كل رغيف واحشيه باللحمة المفرومة المعصّجة، واقفليه مع الضغط الخفيف.
9- هاتي ورق زبدة وقطّعيه على شكل مربعات أكبر من حجم الرغيف، وممكن تدهنيه بشوية زيت، وبعد كده حطّي الرغيف فوقه، ولفّي أطراف ورق الزبدة حول الرغيف، ودخّليه الفرن، وسيبيه لمدة ربع ساعة أو لغاية ما يستوي تماماً وقدّميه سخن.. وبالهنا والشفا.

*******************

ممكن تدهنيه بشوية زيت صغيرين وتدخّليه الفرن لغاية ما وشه يحمرّ
الممبار
المقادير:
* 1/ 2 كيلو ممبار
* 2 كوب أرز
* 2 بصلة مبشورة مبشورة
* 7 ثمرات طماطم مبشورة
* ملح وفلفل
* بقدونس مفروم
* كزبرة خضراء مفرومة
* نعناع أخضر أو ناشف مفرم
* شطة
* سمنة أو زيت
الطريقة:
1- انقعي الممبار في مية فيها خل وملح لمدة ساعة، وبعد كده اغسليه كويس جداً وادعكيه بالملح الخشن كويس، وبعد كده اشطفيه تاني، وكرري غسله أكتر من مرة علشان تتأكّدي إنه نظف من جوه ومن بره، وبعد كده سيبيه يصفّي المية بتاعته.
2- اغسلي الأرز كويس، وسيبيه يصفّي ميته.
3- حضّري الخلطة اللي هتحشي بها الممبار، وكل اللي عليكِ إنك تخلطي كل المكونات مع بعضها؛ وهي الشبت والبقدونس والكزبرة والنعناع والطماطم والبصل والملح والفلفل والكمون والشطة وشوية سمنة أو زيت، وتقلّبيهم كويس.
4- هاتي القمع، وابدئي احشي الممبار، بس خلّي بالك إنك ماتمليش الممبار أوي بالخلطة يعني كفاية تحشيه للثلث أو النصف، وبعد كده تضغطي على الممبار بإيدك على خفيف علشان توّزعي الخلطة كويس، وممكن بعد كده إنك تربطي أطراف الممبار بخيط صغير علشان الأرز ما ينزلش منه أثناء السلق.
5- هاتي حلة كبيرة، وحطّي فيها مية وملح، وسيبيها على النار لغاية ما المية تغلي، وبعدين ابدئي نزّلي الممبار واحدة واحدة، وطبعاً هتلاحظي إن الممبار انكمش وحجمه صغر أول ما ينزل في المية، وبتسيبيه على النار لغاية ما تحسي إنه استوى، وهو بياخد وقت من 30 إلى 50 دقيقة على النار.
6- بعد ما يتسلق بتحمّريه في الزيت، أو ممكن ترصّيه في صينية، وتدهني وشه بشوية زيت صغيرين، وتدخّليه الفرن لغاية ما وشه يحمرّ.. وبالهنا والشفا.

ولغاية هنا خلصت وصفاتنا النهارده..
ومستنيين نعرف رأيك في الأصناف دي بعد ما تعمليها..
وكمان ابعتي لنا لو عايزة تعرفي وصفة معينة..
وإحنا هنقدّم لك طريقتها في أسرع وقت..
وكل سنة وكلكم طيبين،،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************