شوربة الكوسة بالكريمة والخضار بالبشاميل على "سفرة دايمة"

النهارده هنقدّم لكم عزومة مكوّنة من: عصير التفاح بالزبادي، وطبق السلطة المشكّلة، وشوربة الكوسة بالكريمة، وصينية الخضار بالبشاميل، وصينية تفاح بالفواكه المجففة...
عصير التفاح بالزبادي
المقادير:
* 3 تفاحات
* 1/2 كوب سكر
* كوب زبادي
* رشة فانيليا
* مقدار مناسب من المية
الطريقة:
اخطلي كل المكوّنات دي مع بعضها في الخلاط ، وبعد كده صبّيها في كوبايات العصير، وممكن تزيّني كل كوباية بشريحة من التفاح، وبالهنا والشفا.

*******************

ممكن تزيّني الطبق بالبقدونس المفروم
شوربة الكوسة بالكريمة
المقادير:
* 3 ملعقة كبيرة زبدة
* فص ثوم مفروم ناعم
* بصلة متوسّط مفروم ناعم
* 3 ملعقة كبيرة دقيق
* 1/2 جزرة متوسّط مقطّعة إلى شرائح
* 5 ثمرات كوسة متوسطة مُقطّعة إلى شرائح
* 4 كوب شوربة فراخ أو لحمة
* ملح وفلفل
* فلفل رومي أحمر مُقطّع إلى مكعبات صغيرة للتزيين
الطريقة:
1- سخّني الزبدة على نار متوسطة، وضيفي إليها الثوم والبصل مع التقليب لمدة 4 دقائق.
2- ضيفي الدقيق مع التقليب لغاية ما كل المكوّنات تتجانس مع بعضها، وبعد كده ضيفي الجزر والكوسة.
3- ضيفي الشوربة مع الاستمرار في التقليب؛ علشان مفيش أي كتل تتكوّن، وغطّي الحلة، وسيبيها على نار متوسّطة لمدة 15 دقيقة أو لغاية ما الكوسة تستوي مع الاستمرار في التقليب من حين لآخر.
4- ارفعي الخليط من على النار، وسيبيها تبرد شوية، وبعد كده اضربيه في الخلاط الكهربائي، لغاية ما كل المكوّنات تمتزج مع بعضها.
5- بعد كده حطّي الخليط مرة تانية على نار متوسّطة، وممكن تضيفي شوية شوربة أو مية أو لبن لتخفيف كثافة الشوربة، وبعد كده تبّليها بشوية ملح وفلفل وقدّميها.. وبالهنا والشفا.

*******************

طبق سلطة مليان بالفيتامينات
طبق السلطة المشكّلة
المقادير:
* بصل أخضر أو بصل عادي
* ملعقة خل أو عصير ليمونة
* ملعقة كبيرة زيت زيتون
* جبنة مقطّعة مكعبات
* بقدونس مفروم
* زيتون أسود
* ملعقة زيت
* طماطم
* فجل
* خيار
* كرفس
* خس
* ملح
الطريقة:
هاتي الخضراوات دي كلها، واغسليها، وبعد كده قطّعيها شرائح، وبعد كده حطّيها في طبق السلطة، وحطّي عليها الزيتون والجبنة والزيت والخل أو الليمون و الملح.. وبالهنا والشفا.

*******************

صينية خضار بالبشاميل تحفة
خضار بالبشاميل
المقادير:
* كيلو كوسة
* 1/2 كيلو بسلة
* 3 جزرات
* 2 حبة بطاطس
* 1/2 كيلو لحمة مفرومة معصجة
مقادير البشاميل:
* 1/2 كوب دقيق
* 4 ملاعق سمن
* 3 كوب لبن
* 2 بيضة
* ملح وفلفل
طريقة عمل البشاميل:
1- سخّني السمنة في صينية، وبعد كده حطي الدقيق، وقلّبي السمنة مع الدقيق كويس لغاية لما تلاقي لون الدقيق بدأ يصفر.
2- ضيفي اللبن على الدقيق مع التقليب المستمر، لغاية ما تلاقي العجينة أصبحت سميكة نوعاً ما، وده علشان تتماسك مع الخضراوات، وبعد كده شيليه من على النار.
3- بعد ما البشاميل يبرد، هاتي البيض وحطيه في طبق، واضربيه بالمضرب مع الملح والفلفل، وبعد كده ضيفيه للبشاميل.
طريقة عمل الخضار مع البشاميل:
1- قطّعي الخضار، وبعد كده اسلقيه مع شوية شوربة، وبعد ما تسلقيه صفّيه من المية اللي فيه في المصفاة.
2- بعد كده هاتي صينية، وادهنيها بشوية بشاميل، وبعد كده هاتي الخضار، ورصّي نصفه في الصينية، ومن فوقه حطي اللحمة المفرومة المعصّجة، وبعد كده حطي باقي الخضراوات، وبعد كده حطي البشاميل على الوش.. وبعد كده دخليه الفرن على نار هادئة لغاية ما لونه يحمر وبعد كده خرّجيه.. وبالهنا والشفا.

*******************

ممكن تزيّني التفاح بالكريم شانتيه فوق الوش
التفاح بالفواكه المجففة
المقادير:
* كوب مشمش مجفف
* كوب قراصية منزوعة البذر
* 8 حبات تفاح أصفر متوسّط الحجم
* 2/1 كوب عصير ليمون
* 50 جم زبدة
* 3 ملاعق كبيرة قرفة
* 3/2 كوب سكر
* 2/1 كوب زبيب

الطريقة:
1- قطّعي المشمش والقراصية إلى قطع متوسّطة الحجم، وحطّيهم في طبق، واخلطيهم بالسكر، وقلّبيهم مع بعض كويس.
2- هاتي التفاح، وقشّريه، وبعد كده شيلي قلب التفاح مع الاحتفاظ بالتفاحة كاملة.
3- هاتي عصير الليمون، وادهني التفاح من بره، ومن جوه باستخدام فرشاة رفيعة.
4- ادهني صينية الفرن بالزبد، ورصّي فيها التفاح واقفاً، وحطّي جوه كل تفاحة ملعقة صغيرة من خليط السكر والمشمش والقراصية، ورشّي باقي الخليط في الصينية.
5- هاتي الزبدة، وقطّعيها إلى مربعات، وحطّيها على التفاح وفي الصينية.
6- سخني الفرن إلى 180 - 200 درجة مئوية، ودخّلي صينية التفاح في الفرن، وسيبيها لمدة ربع ساعة، وأول ما تلاقي إن التفاح بقى لونه ذهبي طلّعيه، وحطّيه في طبق التقديم، وممكن تزيّنيه بالكريم شانتيه من على الوش.. وبالهنا والشفا.
وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لنا النتيجة كانت إيه
*********************
للتعرف على مزيد من الوصفات الشهية
اضغط هنا "سفرة دايمة"
*********************