بيكاتا بالمشروم وكفتة مشوية بمناسبة عيد الميلاد المجيد

كل سنة وكل الأخوة المسيحيين طيبين، النهارده على "سفرة دايمة" هنقدّم أطباق لحوم مختلفة.. وكل عام وأنتم بخير..
كفتة مشوية
المقادير:
1⁄2 كيلو لحمة مفرومة
3 : 4 ملاعق لبن
كيس بقسماط
ملح وفلفل
2 بصلة مفرومة
الطريقة:
1- حطي البصل على اللحمة في وعاء كبير واخلطيهم مع بعض كويس، وضيفي الملح والفلفل.
2- بعد كده هاتي البقسماط وحطيه في طبق وحطي عليه اللبن، وممكن تزوّدي أو تقللي كمية اللبن، المهم إنك تحصلي في الآخر على عجينة متماسكة.
3- حطّي الخليط ده على الكفتة، واخلطيهم مع بعض وسيبيهم نص ساعة.
4- صبّعي الكفتة، ورصّيها في صينية وغطّيها كويس، وحطّيها على نار هادية على البوتجاز من فوق.
5- لما تلاقي الكفتة لونها بدأ يتغيّر ونزّلت الميه بتاعتها، وبدأت تستوي اطفي عليها، ودخّلي الصينية الفرن، وولعي الشواية، وسيبيها لحد ما تتحمر.. وبالهنا والشفا.

*******************
سيبي البيكاتا على النار لمدة نصف ساعة
بيكاتا بالمشروم
المقادير:
1⁄2 كيلو فراخ مقطعة شرائح
كوب كريمة لباني "موجودة في السوبر ماركت"
كوب مشروم "موجود في السوبر ماركت"
1⁄2 كوب سمن أو زيت
بصلة مفرومة
ملح وفلفل
2 كوب ماء
دقيق
الطريقة:
1- تبّلي الفراخ بالملح والفلفل وبعد كده غطيها بالدقيق.
2- هاتي طاسة وسخّني فيها الزيت أو السمن، وشوحي فيها الفراخ مع الدقيق لغاية اللحمة ما تأخذ اللون الذهبي.
3- ارفعي الفراخ من الطاسة وبعد كده حطي البصل في نفس الطاسة لغاية لونه ما يبقى ذهبي، وبعدين ضيفي عليه المشروم، واستمري في التقليب لغاية ما المشروم لونه يبدأ يتغير.
4- بعد كده ضيفي الكريمة وقلبي الخليط وبعدين ضيفي الميه، وأول ما الخليط يبدأ يغلي، ضيفي الفراخ مرة تانية، وممكن تحطي معاها مكعب مرقة دجاج.
5- سيبي البيكاتا على النار لمدة نصف ساعة تقريباً أو لغاية ما تحسي إن الصوص تماسك مع بعضه، وبعد كده قدّميها.. وبالهنا والشفا.

*******************

قدّمي مع الاستيك مكرونة أو رز أبيض
استيك اللحمة بالصلصة البيضاء والمشروم
المقادير:
1⁄2 كيلو لحم بقري مقطع لشرائح
علبة مشروم "متوافر في السوبر ماركت"
شرائح جبنة شيدر أو جبنة رومي
ثمرة فلفل أخضر مقطّعة قطع صغيرة
ثمرة طماطم مقطعة قطع صغيرة
زيت أو زبدة
ملح وفلفل
مقادير الصلصة البيضاء:
4 ملاعق كبيرة دقيق أبيض
2 كوب لبن
ملح وفلفل
ثوم مفروم
زبدة
جبنة كيري أو نستو "اختياري"
الطريقة:
1- تبلي اللحمة بالبصل والملح والفلفل، وسيبيها شوية لغاية ما تتشرّب من التتبيلة بتاعتها.
2- أحضري طاسة وحطي فيها شوية زيت وزبدة، وحطيها على النار، وابدئي شوّحي فيها قطع اللحم لغاية ما لونها يبدأ يميل للإحمرار، وبعد كده قلّبي شريحة اللحم على الوجه الآخر واستمري على كده لغاية ما تحسي إن اللحمة استوت.
3- أحضري طاسة تانية، وحطي فيها كمية من الزيت والزبدة علشان تشوّحي فيها المشروم وبعد ما يدخل في السوى ضيفي الفلفل والأخضر والطماطم، وقلبيهم كلهم مع بعض.
4- لتحضير الصلصة البيضاء؛ حطّي الدقيق واللبن والثوم والملح والفلفل الأبيض والجبنة مع بعض في الخلاط، واضربيهم كويس لغاية ما تحسّي إن كل المكوّنات تجانست مع بعض، وممكن تزوّدي ميه لو احتجتي، وبعدين حطّي الخليط ده على نار متوسطة مع التقليب المستمر لغاية ما تحصلي على القوام اللي إنتِ عايزاه.
5- بعد كده اخلطي الصلصة البيضاء مع خليط المشروم والفلفل الأخضر والطماطم، وقلّبيهم كلهم مع بعض كويس على نار هادية لمدة 10 دقائق.
6- في النهاية، حطّي الخليط ده على الاستيك في طبق التقديم، وممكن تقدّمي معاه مكرونة أو رز أبيض.. وبالهنا والشفا.

وبكده تكون خلصت وصفاتنا النهارده..
مع تمنياتنا لكل الأخوة المسيحيين بعيد سعيد..