وعدناكم الأسبوع اللي فات إننا نستكمل تقديم وصفات البيتزا بنكهات مختلفة.. والنهارده هنعمل مع بعض بيتزا باللحمة المفرومة وعيش الغراب، وبيتزا بالجمبري، وبيتزا الفراخ.. بيتزا باللحمة المفرومة وعيش الغراب المقادير: * عجينة بيتزا * 1/ 4 كيلو لحمة مفرومة * كوب مشروم مقطّع شرائح * ثمرة فلفل أخضر مقطّعة قطع صغيرة * بصلة صغيرة مقطّعة شرائح * فص ثوم مفروم * 2 ملعقة كبيرة صلصة بيتزا * 2 كوب جبنة موزاريلا * 2 ملعقة كبيرة زيت ذرة الطريقة: 1- سخّني الزيت في طاسة كبيرة على نار هادية، وابدئي في إضافة اللحمة المفرومة مع التقليب المستمر لمدة 10 دقائق علشان اللحمة ما تلزقش منك، بعد كده ضيفي المشروم والبصل والثوم والفلفل الأخضر وشوية ملح وفلفل، وقلّبيهم كلهم مع بعض، وسيبيهم على النار حوالي 10 دقائق كمان. 2- قطّعي عجينة البيتزا لقطع صغيرة مدوّرة، وافرديها على سطح خشبي مرشوش بالدقيق، وابدئي في فردها؛ بحيث إن مساحتها تغطي الصاج أو الصينية اللي هتعملي فيها البيتزا، وبعد كده حطّيها في صينية مدهونة بقليل من الزيت. 3- ضيفي صلصلة البيتزا فوق العجينة، وبعد كده رشّي عليها خليط اللحمة المفرومة اللي عملتيه، ورشّي الجبنة الموزاريلا على الوش، وبعدين قطّعي البيتزا على شكل مثلثات. 4- سخني الفرن على درجة حرارة 200 : 220 مئوية، وبعد كده دخّلي صينية البيتزا في الفرن لمدة 15 دقيقة، وبعد ما تلاقي وشها إحمرّ، خرّجيها.. وبالهنا والشفا.
*******************
طريقة عمل البيتزا بالسي فود شبه طريقة عمل البيتزا بالجمبري بيتزا بالجمبري المقادير: * عجينة بيتزا * 1/ 2 كيلو جمبري متوسّط ومقشّر * 4 ملاعق كبيرة صلصة بيتزا * فص ثوم مفروم ناعم * 1/ 2 ثمرة فلفل أخضر مقطّع مكعبات صغيرة * 1/ 2 ثمرة فلفل أحمر مقطّع مكعبات صغيرة * ثمرة طماطم مقطّعة مكعبات صغيرة * بصلة مقطّعة شرائح * كوب جبنة موزاريلا مبشورة * 1/ 2 كوب جبنة شيدر مبشورة * 2 ملعقة كبيرة زيت ذرة * ملح وفلفل * 1/ 2 حزمة كرفس الطريقة: 1- هاتي الجمبري ونظّفيه كويس، واغسليه أكتر من مرة، وبعد كده ضيفي له الثوم المفروم والملح والفلفل. 2- سخّني الزيت في طاسة على نار عالية، وبعد كده ضيفي الجمبري والثوم مع التقليب لغاية ما لون الجمبري يتحوّل للون البرتقالي. 3- قطّعي عجينة البيتزا، وافرديها بنفس الطريقة اللي قلنا عليها، وحطّيها في صينية مدهونة بقليل من الزيت. 4- ضيفي صلصة البيتزا فوق العجينة، وبعد كده ضيفي الجمبري والفلفل الأحمر والأخضر والطماطم والبصل، وبعد كده رشّي الجبنة الموزاريلا والشيدر على الوش، وقطّعي البيتزا على شكل مثلثاث، ودخّليها في فرن ساخن على درجة حرارة 200 : 220، وسيبيها لمدة 1/ 4 ساعة، وأول ما تلاقي وشها إحمرّ، خرّجيها وقدّميها.. وبالهنا والشفا. وعلى فكرة طريقة عمل البيتزا بالسي فود شبه طريقة عمل البيتزا بالجمبري، لكن بتضيفي مع المقادير كابوريا مقشّرة وسبيط مسلوق.
*******************
قطّعي البيتزا على شكل مثلثات ودخّليها في فرن ساخن بيتزا بالفراخ المقادير: * عجينة بيتزا * كيلو صدور فراخ * بصلة صغيرة مقطّعة قطع صغيرة * 1/ 2 كوب جبنة رومي مبشورة أو بارميزان * 1/ 2 كوب جبنة موزاريلا مبشورة * 1/ 2 كوب أوراق ريحان أخضر * 2 ملعقة كبيرة زيت زيتون * كوب شرائح زيتون أخضر * 1/ 2 كوب صلصة بيتزا * ملح وفلفل الطريقة: 1- قطّعي صدور الفراخ لقطع متوسّطة الحجم، وتبّليها بالملح والفلفل والبصل، وسيبيها لمدة ساعة ونصف، وبعد كده شيليها من البصل. 2- سخّني زيت الزيتون في طاسة على نار متوسّطة، وبعد كده ضيفي لها الفراخ مع التقليب لغاية ما تحسّي إن الفراخ استوت، وبعد كده ارفعيها من على النار. 3- قطّعي عجينة البيتزا بنفس الطريقة اللي قلنا عليها، وحطّيها في صينية مدهونة بقليل من الزيت. 4- رشّي صلصة البيتزا على العجينة، وضيفي لها قطع الفراخ والزيتون ونصف كمية أوراق الريحان، واخلطي الجبن الموزاريلا والجبن البارميزان، وبعد كده رشّيهم على سطح البيتزا، وقطّعي البيتزا على شكل مثلثات، ودخّليها في فرن ساخن على درجة حرارة 200 : 220، وسيبيها لمدة 15 دقيقة، وطلّعيها أول ما تلاقي وشها إحمرّ.. وبالهنا والشفا.
ولغاية هنا خلص عددنا النهارده.. واستنونا الأسبوع الجاي مع وصفات أكتر.. واوعوا تنسوا تبعتوا لنا رأيكم في وصفاتنا النهارده.. ********************* للتعرف على مزيد من الوصفات الشهية اضغط هنا "سفرة دايمة" *********************