"البيتزا" على طريقة "داليا".. و"بيف ستروجانوف" من "منة"

النهارده صديقتنا العزيزة "منة الله" هتقدّم لنا وصفة جديدة وسهلة، تعالوا نشوف مع "منة" وصفتها عبارة عن إيه..
السلام عليكم أسرة "بص وطل" دي وصفة أنا جرّبتها وطلعت ممتازة، ويا رب طبعاً تعجبكم وتشجعوني إني أجرّب أكتر..
المقادير:
8 شرائح لحم فيليه.
1 بصله مفروم ناعم.
1 ملعقة صغيرة توم مفروم.
1 فلفل أخضر.
كوب ونصف زبادي.
4 ملعقة كبيرة زيت ذرة.
2 ملعقة كبيرة دقيق.
ملعقة كبيرة مسطردة.
ملعقة كبيرة بهارات لحم وملح وفلفل.
الطريقة:
1- اغسلي شرائح اللحم، وقطعي كل شريحة إلى شرائط.
2- سخني الزيت في المقلاة، وضيفي إليه البصل وقلبيه لغاية ما يصفر وبعدين ضيفي الثوم وقلبيه.
3- ضيفي شرائح اللحم على البصل والثوم، وقلبيها على نار متوسطة إلى أن يصبح لونها بني.
4- قطعي الفلفل إلى حلقات وضيفيه على اللحم وقلّبيهم مع بعض لمدة دقيقة.
5- في طبق خارجي، اخلطي الزبادي مع بهارات اللحم والمسطردة والملح والفلفل واضربيهم جيداً وضيفيهم على اللحم، وضيفي عليهم من كوب إلى كوبين ماء، واتركيهم على نار متوسطة حتى تمام النضج.
6- ذوبي معلقتين الدقيق في كوب ماء وضيفيه على اللحم حتى يتماسك الصوص وقدّميه.. وبالهنا والشفا.

طريقة عمل البيتزا الإيطالية
وصفة ال"بيتزا" من "داليا"
وصديقتنا العزيزة "داليا رجب" بعتت لنا وصفة جامدة جداً وهي طريقة عمل البيتزا الإيطالية، تعالوا نشوف مع بعض وصفة "داليا عبارة عن ايه...
أولاً أحب أشكر الموقع جداً جداً، أنا بقالي 3 سنين صديقة ليكم وبعت تقريباً في كل المجالات وإنتم بقيتم جزء من حياتي اليومية، وبصراحة ما شفتش موقع بيهتم بأصدقائه وبيبعت لهم زيكم كده ميرسي كتير ليكم..
أنا النهارده جايبه لكم طريقة عمل ال"بيتزا الإيطالية" بصراحة أنا جربتها وهي تحفة، والعجينة باعملها في البيت.
المقادير:
1 كيلو دقيق.
2 كوب ماء.
1 كوب زيت.
رشة ملح ورشة فلفل أسود.
4 ملاعق لبن بودرة.
صلصلة.
وطبعاً بتحطوا الحشو اللي إنتم عايزينه فلفل (بجميع ألوانه)، زيتون، بصل، مشروم، بسطرمة، سجق، جبنة تركي أو شيدر، وجبنة موتزاريلا وأي حاجة نفسكم فيها.
مكوّنات الخميرة:
باكو خميرة.
معلقة سكر.
نصف كوب ماء دافئ.
الطريقة:
1- أولاً نضع الدقيق والزيت واللبن البودرة مع بعض ونقلّبهم.
2- بعدين نحط باكو الخميرة في نصف الكوب الماء الدافئ وعليه معلقة السكر، ولازم يكون الماء دافئ مش ساخن علشان الخميرة ما تموتش، ونستنى 10 دقايق لحد ما الخميرة تحسي إنها بدأت تعلى عن المستوى اللي إنتِ حطاه، وبعدين نحطها على الدقيق.
3- بعد كده بنحط الماء (ممكن دقيق ياخد 2 كوب أو كوب ونص حسب ما تشوفي العجينة محتاجة أد إيه)، وتعجنيها بإيدك لحد ما تبقى متجانسة معاكِ، وبعدين تحطيها في مكان دافئ لحد ما تخمر.
4- بعد لما تخمر طلعيها وقسميها كور على قد الصواني اللي عندك علشان تكون أسهل في الفرد.
5- حطي نقطة زيت صغيرة في الصينية وافردي العجينة، وبعد كده ادهني وشها صلصة (على فكرة أنا باحط صلصة عادية من العلبة كده على طول)، وممكن لو عايزة تقطعي ثوم وتشوّحيه في شوية زيت وتحطي عليهم الصلصة ممكن برضه بيدي طعم حلو، وما تنسيش تحطي شوية ملح علشان ساعات بتطلع دلعة.
6- بعد ما تدهني العجينة بالصلصة ابدئي برص الحاجات اللي إنتِ محضّراها، أولاً الفلفل وممكن البصل لو بتحبيه، وبعدين المشروم أو الزيتون، وبعدين السجق أو البسطرمة، وحطي شوية جبنة تركي أو موتزاريلا بتديها طعم حلو.
7- بعد كده دخليها فرن متوسط الحرارة، ولما تحسي إنها خلاص قربت تستوي، وبدأت تحمر شوية طلعيها وغطيها بالجبنة الموتزاريلا أو التركي أو الشيدر أو لو عندك نوع واحد ممكن برضه (ساعات باعملها بالشيدر لما ما يكونش عندي موتزاريلا)، ودخليها الفرن تاني بس ما تسيبيهاش كتير لحد بس ما الجبنة تسيح وقطعي وكلي وادعي لي بقى.
يا رب تكون عجبتكم.. نفسي حد يجرّبها واسمع آراءكم.. ولسه كمان عندي أكلات كتير وحاجات من اختراعي..

وفي النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي..
ويا ريت تجرّبوها فعلاً..
وفي انتظار آرائكم..
وكمان وصفاتكم الجامدة على لينك..
ورينا شطارتِك،،،