ستيك اللحم بصوص الفلفل الأسود.. على "سفرة دايمة"

علشان دايمًا تجددي من أكلك وطريقة تقديمك، هنقدم لك النهارده طريقة عمل الستيك بصوص الفلفل الأسود بطريقة سهلة ولذيذة، تابعينا وماتنسيش تبعتي لنا كل الوصفات اللي عايزة تعرفيها.

ستيك اللحم بصوص الفلفل الأسود
المقادير:
* 3/ 4 كيلو ستيك لحمة
* 2 ملعقة فلفل أسود مجروش خشن
* 1 : 2 كوب مية أو شوربة
* 1/ 2 كوب كرفس مفروم
* 3 ملاعق كبيرة زبدة
* 3 ملاعق كبيرة زيت
* 2 ملعقة كبيرة دقيق
* 2 ملعقة صويا صوص
* 2 ثمرة بصل مقطعة شرايح
* 2 ثمرة جزر مقطعة شرايح
* ملح وفلفل
الطريقة:
1- هتجيبي قطع الستيك تكون متقطعة سميكة، وتبّليها بالملح والفلفل، وبعدين شوّحيها في الزيت مع الزبدة لمدة دقيقتين على كل جانب؛ لحد ما يبقى لونها بني.
2- بعد كده هتكمّلي تسوية الستيك في الفرن، هتجيبي صينية وتحطي فيها شرايح البصل والجزر، وتحطي الستيك عليهم، وممكن تحطي شوية كمان فوق اللحمة؛ علشان ينزّلوا عصارتهم مع اللحمة، وتحطي 1/ 4 كوب ميه عليهم، ودخّليهم الفرن لحد ما اللحمة تستوي.
3- علشان تعملي الصوص حطي شرايح من البصل والجزر والكرفس في نفس الطاسة اللي شوّحتي فيها اللحمة، وتشوحيهم شوية لحد ما يدبلوا.
4- بعدين هتحطي عليهم ملعقتين زبدة وملعقتين دقيق، وتقلبيهم لحد ما الدقيق يتحمر، وبعد كده حطي عليهم كمية المية أو الشوربة، وقلّبي علشان الدقيق يدوب، وسبيه يغلي شوية لحد ما السائل يبقى سميك.
5- صفّي الصوص من الخضروات، وحطيه على النار تاني، وتبّليه بالصويا صوص، وخلي بالك ماتزوديش الملح؛ لأن الصويا بتكون مالحة، وحطي الفلفل الأسود وقلبيه هتلاقي لونه بقى غامق وقوامه متماسك.
6- ممكن لو فيه عصارة نزلت من اللحمة تضيفيها على الصوص؛ هيديها طعم حلو أوي.
7- رصي الستيك في طبق التقديم وحطي عليه الصوص، وممكن تقدميه مع الخضار السوتيه.. بالهنا والشفا.

خلصت وصفتنا النهارده..
استنونا مع وصفة جديدة..
وابعتوا لنا كل طلباتكم على "سفرة دايمة"..
سلام،،،