زي ما وعدناكم إننا كل أسبوع هنقدم لكم عزومة مميزة جداً مع الشيف يسري... النهارده هنشوف مع بعض فكرة لوجبة جديدة ممكن إنك تعمليها لأسرتك أو تعمليها لما يكون عندك عزومة... وعلى فكرة الوجبة اللي معانا النهارده بالرغم من إنها جديدة إلا إن مقاديرها بسيطة جدا وفي متناول الجميع.. يلّا نشوف مع بعض الشيف يسري هيعمل لنا إيه؟!! شوربة الطماطم النهارده هاقدّم لك طريقة جديدة لعمل طبق شوربة الطماطم... المقادير: * 1/2 كيلو طماطم * ثمرة بطاطس * جزرة * بصلة * 2 عود كرات * شوربة فراخ * ملح وفلفل وزعتر
الطريقة: 1- نقطع البطاطس والجزر والبصل والكرات بطريقة عشوائية. 2- بعد كده نجيب حلة ونحط فيها ملعقة زبدة ونشوح فيها كل الخضراوات المتقطعة وبعد كده نضيف إليها شوية ملح وفلفل وبهارات، وبعدين نقطع الطماطم لقطع كبيرة ونضيفها إلى الخضراوات السابقة ونسيبها على النار لمدة خمس دقائق وبعد كده نضيف إليها شوربة الفراخ نسيبهم على النار لغاية ما كلهم يستووا مع بعض. 3- بعد الشوربة ما تستوي نطفي البوتاجاز ونسيبها علشان تبرد وبعد كده نضربها في الخلاط وبعدين نصفيها بالمصفاة في حلة ونسخنها على البوتاجاز مرة كمان. 4- بعد ما الشوربة تغلي حطيها في طبق التقديم.. وعلى فكرة ممكن إنك تزيني الطبق بشوية كريمة من الوش.. وبالهنا والشفا.
إضغط لمشاهدة الفيديو: سلطة المشروم بالريحان المقادير: * 1/4 كيلو مشروم طازة * زيت ذرة أو عباد الشمس * شرائح جبنة بارميزان * 3 ملاعق ريحان * عصير ليمون * زيت زيتون * خس كابوتشا * خل بلسمك * مسطردة الطريقة: 1- هاتي طبق واسع وحطي فيه المسطردة والزيت والخل والملح، وبعد كده قطعي المشروم لمكعبات وعليه شوية عصير ليمون وقلبيهم مع بعض. 2- وبعدين هاتي طبق تاني قطعي فيه خس الكابوتشا وحطي عليه المشروم بالصوص اللي عملتيه وفي الآخر ضيفي شرائح الجبنة البارميزان وعليهم شوية زيت وخل بلسمك.. وبالهنا والشفا.
إضغط لمشاهدة الفيديو: الخرشوف المحشي باللحمة المفرومة ده طبق معروف أوي وفيه ناس كتير بتحبه لأنه طبق بسيط وغني بالعناصر الغذائية اللي محتاج إليها الجسم ودي أبسط طريقة ممكن إنك تعمليه بيها ومش هياخد منك وقت خالص.. المقادير: * 1/2 كيلو لحمة مفرومة * 2 كيس خرشوف جاهز * ملعقة ثوم مفرومة * 2 بصلة مفرومة * جبنة مبشورة * 2 ملعقة دقيق * كوب لبن * زبدة * شرائح جزر مسلوق "للتزيين" الطريقة: 1- عصجي اللحمة المفرومة، بإنك تحطي الزيت في طاسة ومعاه البصل وبعدين ضيفي ملعقة صغيرة ثوم مفروم وقلّبيهم مع بعض لغاية ما البصلة تبدأ تذبل، وبعد كده ضيفي اللحمة المفرومة والبهارات والفلفل وقلبيهم كلهم مع بعض لغاية ما اللحمة تستوي وبعد كده ضيفي الملح. 2- بعد كده بتحضري الصوص الأبيض وهو عبارة عن ملعقة زبدة + 2 ملعقة دقيق + كوب لبن، وقلبيهم مع بعض وأثناء التقليب حطي نصف كوب جبنة مبشورة وزوديهم بشوية مية مع التقليب علشان مافيش حاجة تكلكع منك. 3- هاتي الخرشوف وحطيه في طبق بايريكس وأحشيه باللحمة المفرومة. 4- ومن فوق اللحمة حطي الصوص الأبيض اللي أنتِ عملتيه وغطي بيه الخرشوف والصينية كلها، وبعد كده حطي شوية جبنة مبشورة فوق الوش، وبعدين دخّليه الفرن تحت الشواية لمدة عشر دقائق، وبعد كده خرّجيه وجمّليه بشرائح الجزر المسلوق.. وبالهنا والشفا.
إضغط لمشاهدة الفيديو: الفراخ على الطريقة المغربية المقادير: * كيلو صدور فراخ * 6 ثمرات فلفل ملون مقطع قطع كبيرة * 1/4 كيلو ليمون مخلل ومخلي من البذر * 1/4 كيلو زيتون أخضر مخلل ومخلي من البذر * 2 جزرة مقطعة شرائح * 2 بصلة مقطعة مكعبات صغيرة * 2 ملعقة دقيق * ملح وفلفل * زيت زيتون * كاري * كيس كسكسي "موجود في السوبر ماركت" الطريقة: 1- نجيب طاسة ونحط فيها شوية زيت زيتون ونشوّح فيها الجزر والبصل والفلفل الملون. 2- بعد كده نجيب طاسة تانية ونحط فيها زيت زيتون ونشوح فيها الفراخ بالملح والفلفل والكاري مع التقليب المستمر. 3- بعد كده نضيف ملعقتين دقيق على طاسة الخضراوات ونقلبهم كويس. 4- بعد ما الفراخ تتشوّح كويس نضيفها على الخضار ومعاها الدقيق ونحط عليهم مية ونسيبهم علشان يستووا على النار ويعملوا صوص ونضيف عليهم شوية كاري وبعد كده نضيف الليمون والزيتون المخلل ونغطيهم ونسيبهم لمدة خمس دقائق. 5- نجيب طبق بايريكس ونحط فيه الكسكسي ونضيف إليه شوية ملح وفلفل وزيت زيتون وزيت عادي ونقلبهم مع بعض كويس. 6- نسخن مية ونحطها على الكسكسي ونغطيه بورق فويل وندخّله الفرن لمدة ست دقائق. 7- بعد مرور الست دقائق نطلع الكسكسي من الفرن ونقلبه ونجيب طبق التقديم ونحط فيه كمية من الكسكسي في نص الطبق، وبعد كده نرص الفراخ حوالين الكسكسي ونفس الشيء مع الخضار، وفي النهاية نحط الصوص من على الوش.. وبالهنا والشفا.
إضغط لمشاهدة الفيديو: آيس كريم ببسكويت الشيكولاتة المقادير: * 400 جرام شيكولاتة مطبخ "هتلاقيها في السوبر ماركت" * بسكويت من أي نوع * 1/2 كوب كريمة * آيس كريم فانيليا جاهز من أي سوبر ماركت الطريقة: 1- نحط الشيكولاتة في حلة صغيرة ونضيف إليها الكريمة، ونحطهم على نار هادية لحد ما الشيكولاتة تسيح وتذوب خالص. 2- بعد كده نجيب قالب ونحط فيه بلاستيك شفاف ونفرد البلاستيك بحجم القالب ونحط عليه الشيكولاتة السايحة. 3- بعد كده نبتدي نكسّر البسكويت على الشيكولاتة في القالب، وبعدين نجيب الآيس كريم الجاهز ونحطه على البسكويت ونقفل القالب بباقي البلاستيك وندخّله الفريزر لمدة خمس دقائق علشان يتجمّد. 5- نطلع القالب من الفريزر ونشيل من عليه الكيس ونحط محتويات البسكويت بالشيكولاتة بالآيس كريم في طبق ونقطّعه إلى قطع متوسطة الحجم ونحط كل قطعتين في طبق ونحط عليهم ملعقتين كراميل.. وبالهنا والشفا.
إضغط لمشاهدة الفيديو:
وبكده تكوني جهزتي لأسرتك وجبة فطار لذيدة وسهلة.. وفي انتظار آرائكم وأسئلتكم.. ونشوفكم على خير الأسبوع القادم... مع وجبة جديدة ولذيذة،،، ********************* للتعرف على مزيد من الوصفات الشهية اضغط هنا "سفرة دايمة" *********************