عزومة 30 رمضان

عصير الطماطم
عصير الطماطم من العصاير الغنية بالفيتامينات..
المقادير:
* 1/4 كيلو طماطم مقطعة قطعاً صغيرة
* كوب مية
* 1/2 كوب سكر
* مكعبات ثلج
الطريقة:
اخلطي كل المكونات دي مع بعضها، واضربيها في الخلاط، وبعد كده صفيها بالمصفاة، وصبيها في كوبايات العصير.

*******************
شوربة القرنبيط بالكريمة
شوربة القرنبيط بالكريمة
المقادير:
* قرنبيط مقطع لقطع صغيرة
* 2 بصل أخضر مقطع حلقات
* 3 أكواب شوربة فراخ أو لحمة
* كوب زبادي
* 4 ملاعق كبيرة كريمة لباني أو قشطة
* ملعقة كبيرة زيت ذرة
* ملح وفلفل وكمون
* بقدونس "للتزيين"
الطريقة:
1- حمري البصل فى الزيت لغاية ما لونه يبقى ذهبي، وبعد كده ضيفي إليه القرنبيط وشوّحيه معاه على النار لمدة خمس دقائق.
2- بعد مرور الخمس دقائق ضيفي إليه الشوربة والملح والفلفل والكمون، وسيبيه على نار هادية لمدة ربع ساعة لغاية ما القرنبيط يستوي بعد ما تلاقي إن القرنبيط استوى اطفي البوتاجاز، وسيبيه علشان يبرد.
3- بعد ما يبرد اضربيه في الخلاط لغاية ما ينعم، وبعد كده ضيفي إليه الكريمة والزبادي، واضربيهم مع بعض مرة كمان.
4- بعد كده حطي الشوربة في حلة وحطيها علي النار لغاية ما تغلي، وضيفي إليها الملح والفلفل وشوية مية لو كانت الشوربة سميكة، وبعد كده حطيها في طبق الشوربة.

*******************
سلطة الكرنب والجزر
سلطة الكرنب والجزر
المقادير:
* قلب كرنبة مسلوق ومقطع إلى قطع صغيرة
* جزرة كبيرة مبشورة
* بصلة صغيرة مبشورة
* 2 ملعقة كبيرة عصير ليمون
* ملعقة صغيرة خل
* ملعقة صغيرة سكر
* ملح وفلفل أسود
* 1/2 كوب زيت ذرة
الطريقة:
1- اخلطي زيت الذرة مع عصير الليمون والخل والسكر والملح والفلفل.
2- اخلطي الكرنب مع البصل والجزر وضيفي إليهم الخليط السابق وقلبيهم مع بعض كويس وحطيهم في طبق السلطة.

*******************
كفتة داود باشا
كفتة داود باشا
المقادير:
* 1/2 كيلو لحمة مفرومة
* بصلة كبيرة مبشورة
* 4 - 5 ثمرات طماطم
* ملعقة كبيرة معجون طماطم
* 1/2 كوب زيت عباد الشمس
* بهارات
* ملعقة صغيرة قرفة
* ملعقة صغيرة ملح وفلفل
الطريقة:
1- اخلطي البصل المبشور مع الملح والفلفل والبهارات والقرفة، وبعد كده ضيفي إليهم اللحمة المفرومة وقلبيهم مع بعض كويس، واعملي اللحمة دي على شكل كرات صغيرة.
2- هاتي طاسة وحطي فيها شوية زيت وسخني الزيت كويس على النار، بعد كده حمري الكفتة في الزيت من جميع الجوانب لمدة 3-4 دقائق. أو ممكن إنك تحطيها في الفرن لغاية ما تستوي.
3- بعد ما تخلصي تحمير الكفتة هاتي الطماطم واضربيها في الخلاط.
4- بعد كده هاتي حلة وحطي فيها حوالي خمس ملاعق كبار زيت، بعد كده حطي البصلة المفرومة وقلبي كويس لغاية ما لون البصلة يبقى أصفر.
5- ضيفي عصير الطماطم اللي إنتِ عملتيه، وبعد كده ضيفي إليهم معجون الطماطم والملح والفلفل، وسيبيهم على النار لمدة ربع ساعة، وبعد كده ضيفي الكفتة، وسيبيها لمدة ربع ساعة، بعد كده حطيها في طبق التقديم، وممكن تعملي معاها طبق مكرونة أو أرز أبيض.

*******************
فطيرة بالمكسرات والفواكه المجففة
فطيرة بالمكسرات والفواكه المجففة
المقادير:
* 2 كوب دقيق
* كوب كبير زبدة مقطعة
* 1/2 كوب سكر
* 1 ملعقة كبيرة سكر بني
* 2 بيضة
* 2 صفار البيض
* 2 ملعقة صغيرة عصير ليمون
* كوب تين مجفف أو قراصيا مقطعة
* 2 ملعقة كبيرة زبيب
* 2 ملعقة كبيرة عصير برتقال
* 1 ملعقة كبيرة قشر برتقال مبشور
* 1 ملعقة كبيرة مربى تين أو برتقال
* 2 ملعقة كبيرة عين جمل وجوز
* 1/2 كوب لوز
* 1 ملعقة صغيرة قرفة
الطريقة:
1- حطي الدقيق في طبق كبير، وضيفي إليه قطع الزبدة واخلطيهم مع بعض بإيدك، وبعد كده ضيفي إليهم البيض، والسكر، وصفار بيضة. وقلبيهم مع بعض كويس، وبعد كده ضيفي إليهم عصير الليمون واعجنيهم بإيدك، وبعد ما تتأكدي إن الخليط ده بقى عجينة متجانسة غطيها بغطاء بلاستيك وحطيها في الثلاجة لمدة نص ساعة.
2- حطي التين أو القراصيا في كوباية كبيرة فيها مية مغلية وغطيها لمدة 15 دقيقة، وبعد كده صفيها من المية وقطعيهم لقطع صغيرة. حمصي اللوز وعين الجمل وافرميهم.
3- اخلطي الزبيب، والتين، وعصير البرتقال، وقشر البرتقال، واللوز وعين الجمل، والقرفة والمربى مع بعض.
4- طلعي العجينة من الثلاجة وافرديها على سطح مغطى بشوية دقيق؛ بحيث يكون سمكها 1/2 سم. وبعد كده قطعيها إلى دوائر باستخدام فتحة كوباية مستديرة.
5- حطي ملعقة صغيرة من الحشو في منتصف كل دائرة. واضغطي على الحواف كويس بإيدك علشان تلزق وتقفل كويس.
6- سخني الفرن على درجة حرارة 180 درجة مئوية. وادهني صينية الفرن بالزبدة، ورصي عليها الفطائر. ادهني سطح الفطائر بصفار البيض ورشي فوقها السكر البني، ورصيها في صينية ودخليها الفرن لمدة نصف ساعة أو لغاية ما وشها يبقى أحمر وخرجيها.

وبكده تكون خلصت عزومتنا النهارده
وخلص شهر رمضان
وانتظروا المزيد والمزيد من المفاجآت في الأعداد القادمة بإذن الله
وكل سنة وأنتم طيبين
وعيد سعيد
سلااااااااااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************