حاسة بغربة خانقاني وبين أهلي مش لاقياني

أنا سعيدة أوي إني باتكلم معاكم؛ لأني مش لاقية أي حد أتكلم معاه؛ أنا مشكلتي إني من ساعة ما أبتديت أكبر وأفهم يعني إيه دنيا وأنا باقع وباتصدم.

وأنا عندي 18 سنة حبيت واحد أوي وهو حبني، وأمي وأختي ماوافقوش عليه بعد ما تعبت أنا وهو أوي؛ علشان نحاول نرضيهم، واللي وفقوا عليه وأنا في 3 جامعة طلع بني آدم سيئ جدا.

ده غير سلطة أختي المبالغ فيها وأنا طيبة أوي، ومابابينش إني بازعل بسهولة، كله جوايا، وفي النهاية من مدة قريبة بابا بقى بيتخانق معايا ويتلكك لي على أي حاجة؛ وده علشان سقطت سنة في الجامعة، مع العلم إن دي أول مرة تحصل لي؛ لأني دايما من المتفوقين.

كمان زميلتي اللي معايا من 10 سنين اتخلت عني؛ بعد ما لقت الشخص اللي حبته، حاسة كأننا أصبحنا أغراب، أنا حزينة من الغربة اللي أنا عايشاها، وزعلانة منهم كلهم أوي، وبادعي ربنا يفرجها إن شاء الله، وآسفة لو كنت طولت عليكم؛ بس أنا كان نفسي أتكلم.

R.m


لو عايز تفضفض لنا دوس هنا