بسم الله الرحمن الرحيم.. يمكن يكون فيه ناس كتير يقولوا على مشكلتي سهلة؛ بس أنا طول النهار متضايقة ومش بحب اتعامل مع أهلي خالص. المشكلة إن عمري ما فكّرت أحب، وكنت معترضة إني أحب تماماً لأن ماما وبابا علموني إن الحب ده حاجة عيب وغلط، وإن أي ولد لازم يكون بيضحك على البنت اللي بيحبها؛ بس لما قابلت زميل ليّ في الكلية، حسيت إني بارتاح له أوي، وهو كمان بيحبني أوي. المشكلة إني كمان بقيت بحبه أوي، ونفسي أعيش معاه عمري كله؛ بس بقيت متلخبطة، وكل كلمة بيقولها لي باحسّ إنها من قلبه بجد، وبعدها لما اتكلم مع ماما أو إخواتي يرجعوا يقعدوا يكلموني أو ينصحوني بالبعد عن أي ولد، وبابقى مش عارفة أعمل إيه معاه. أنا حكيت لأختي عنه؛ بس قعدت تقول لي إن كل تصرّف منه معناه إنه بيضحك عليّ وبيلعب بيّ؛ بس أنا مش باحس بكده، وكل الناس اللي يعرفوه بيقولوا لي إنه بيحبني أوي. ومشكلتى إني بقيت مش باصدّق منه أي حاجة وباعامله وحش جداً وهو صابر عليّ، ولفت نظري كذا مرة لكده، وكمان أهلي في البيت بقيت مش بحب أتكلم معاهم، وبقيت على طول قاعدة لوحدي ومش باتكلم مع حد. أنا مصدقاه أوي، وهو بجد إنسان محترم ونفسه يتقدم لي؛ بس مستني بعد سنة لما نخلّص ونكون في رابعة كلية، وأختي على طول تقول لي أبعد، وبابا عمره ما اتكلم معايا. أنا بجد مش عارفة أعمل إيه، وخايفة أخسره وأخسر أهلي مع بعض بسبب انطوائي وحزني على طول، وساعات عصبيتي من غير سبب.. أنا بجد مشتتة وحاسة إن نفسي أبعد عن الناس كلها على طول. رجاء الرد لأني بجد تعبت أوي ومش عايزة أخسر حد بحبه أوي أوي لو كان حبيبي أو أهلي.