أنا بصراحة مش عارفة إيه مشكلتي، بس أنا نفسي أفضفض مع حد يسمعني، أنا كنت بعت ليكم قبل كده إني كنت بحب واحد، وإنه سابني علشان أهله كانوا أغنى مننا، بس المشكلة إن أنا بعدها بفترة صغيرة أوي اتقدّم ليّ واحد والمشكلة إني حسيت إني مقتنعة بيه أوي مع إن فيه فرق كبير أوي بينا في التعليم أنا في كلية وهو مش مكمّل تعليم، وكمان كان متجوّز بس مراته ماتت وهي بتولد، بس دي بالنسبة لي ما كانتش مشكلة؛ لأني بحب الأطفال أوي ونفسي إني أربي البيبي ده. بس المشكلة إن أنا بقيت باحس إن أنا كنت موافقة في البداية علشان أنا كنت مجروحة، وخصوصا بعد اللي أنا كنت بحبه ما خطب واحدة تانية بس لما خطيبي ده بيبقى طيب وحنين معايا وبيحسسني بحبه ليّ أنا باحس إن أنا بحبه أوي، بس المشكلة إن أنا كل لما أشوف اللي أنا كنت بحبه باحس إني مش طايقة نفسي ولا طايقة خطيبي، وباكلمه بأسلوب مش كويس، مع إني عارفة إنه بيحبني أوي وإنه ما يقدرش يعيش من غيري وهو عمل أكتر من موقف علشان يثبت ليّ كده بس أنا مش عارفة أنا بحبه ولا لأ؟ ومش عارفة أكمل معاه ولّا مش هاعرف أحب غير حبيبي الأولاني؟ أعمل إيه؟ ص . ر