أنا مُطلّقة.. وأهلي بيعاملوني كأني طفلة!!

بصراحة مش عارفة ابتدي منين.. أنا عندي 22 سنة، ومريت بتجربة جواز فاشلة فشل صعب ماستمرّتش سنة، ودلوقتي أنا خلاص خايفة أرتبط تاني من غير حب؛ لأنه كان جواز تقليدي، واتعقدت منه؛ لأني ماباعرفش أحكم على الأشخاص بسرعة، بالعكس ممكن أتغش فيهم، وفي نفس الوقت صعب أحب وأرتبط؛ لأن الحياة عندي أو المجتمع اللي أنا عايشة فيه مابيسمحش بكده وبيرفضه، وبيقولوا إن المطلقة إنسانة ماينفعش حتى إنها تكلم راجل.
أنا مش مقتنعة بكده؛ بس في نفس الوقت بتقي نفسي شر الشبهات، بس عرفت واحد من النت، وكان كلامنا كلام أصدقاء، بس اتشدينا لبعض، هو حَب احترامي، وإني رافضة أقابله أو يكون فيه حاجة غير رسمية بينا، وأنا حبيت فيه حنيته وخوفه عليّ، بس المشكلة إن كل ما ينوي يتقدّم تحصل مشكلة عندي أو عنده.
ولما أهلي عرفوا بصراحة رفضوا العلاقة دي، واتعاملوا معايا على إني طفلة وماينفعش، ومنعوا حتى التليفون والخروج، والله كلامنا كان باحترام وحب، وهو لو عايز حاجة تانية أكيد كان فيه طرق كتير يقدر يعمل بيها اللي هو عايزه.
مش عارفة مين الصح ومين الغلط!! ساعات أقول أهلي الصح هما أدرى، وساعات أقول لأ ده مش حرام؛ لأنه لغاية دلوقتي -وربي شاهد- لسه ماشفناش بعض، وكله حب صادق.
والمشكلة إني مش وحشة؛ يعني بييجي عرسان بس أنا رافضة الجواز التقليدي ده، ونفسي فعلا أتجوز عن حب، بس حب يكون صادق ومحترم.
يا ريت تردّوا عليّ.. وأعرف أنا كده صح وأصبر عليه، ولا أبعد وأرضى بالأمر الواقع، ولا أعمل إيه؟!!
basnt
لو عايز تفضفض لنا دوس هنا