السلام عليكم ورحمة الله وبركاته.. أنا عندي 23 سنة مهندسة برمجيات، الحمد لله قريّبة من ربنا، ومحترمة وكل اللي حواليا بيحبوني وبيحترموني، وده فضل من ربنا الحمد لله. وأنا في الكلية اتعرّفت على زميل ليّ كان شخص كويس، وكنت باحترمه، بس كان بالنسبة لي من ضمن زمايل كتير؛ لأني كنت رافضة فكرة الارتباط دي أصلاً؛ لأني كنت باعتبر إني كده باخد من حق زوجي في المستقبل وهو كان عارف رأيي ده. هو كان بيحبني من ساعة ما عرفني، بس ما قاليش إلا بعد ما خلصنا خالص الكلية واتخرّجنا، اعترف ليّ إنه بيحبني طول الفترة دي. أنا فكّرت فيه وحسيت بحبه، وحسيت إنه إنسان مناسب ليّ، يكفي إنه عرفني كويس جدًّا في كل حالاتي، وبرضه بيحبني زي ما أنا بحبه. المهم إني حبيته جدًّا، ويمكن مشكلتي إني لما بحب حد بحبه بجد ولما باعمل أي حاجة باعملها باحسها أوي زيادة عن أي حد تاني. المهم لأنه طبعاً مهندس جيشه كان 3 سنين، قال لي أنا ما أقدرش أشوفك متعذبة معايا طول الفترة دي، والمفروض نبعد وتشوفي نصيبك، أنا عارفة إنه بيحبني، وإنه بيعمل كده عشاني، أنا طبعاً ما قدرتش أبعد عنه، بالعكس كنت بحبه أكتر، وكنت باحاول كل مرة ما أزعلهوش عشان هو في الجيش والضغوط عليه كبيرة، وعلى فكرة هو كلّم أهله على ارتباطنا، وأهله قالوا له إنهم مش مستعدين يساعدوه خالص وإنه ما ينفعش يرتبط دلوقتي. لما قالي.. قلت له: أنا ممكن أقبل بس بدبلة تربطنا ببعض لغاية ما ظروفك تتحسّن!! قال لي إنتِ غالية، وهتفضلي طول عمرك غالية، وأنا مش هرخصك أبداً. المشكلة إنه حاسس إن وجوده في حياتي بيأذيني، وإنه لو بِعِد هلاقي اللي أحسن منه وأرتبط بيه، بس أنا مش حاسة كده أنا عايزاه وهو مش عارف يعمل إيه ولا أنا، أنا كل فترة حبي بيزيد ليه أكتر، خايفة أخنقه بحبي ده ويكرهني، وخايفة كمان أكون لما باقوله إني مستعدة أرتبط بيه تحت أي ظروف وهو بيرفض أبقى بارخص نفسي!! مع العلم إنه والله عمره ما حسسني بكده. المشكلة إنه مسافر دولة أوروبية في بعثة تبع الجيش، وأنا مش قادرة أحدد موقفي معاه مش عارفة أعمل إيه، ومشكلتي كمان إني حاسة إني محتاجة له طول الوقت مش عارفة أعيش في الدنيا دي لوحدي، ولما باكلمه باكلمه بكل صراحة ما باعرفش أعمل زي البنات كده وأتقل عليه أو أعمل حوارات، حاسة إني معاه بلاقي نفسي، وخايفة لو بعدنا ما لاقيش نفسي تاني لما بابعد عنه باكون إنسانة وحشة أوي، أنا مش عارفة أنا فكّرت والله أروح لدكتور نفسي بس هو قال لي لأ. engdo صديقتنا العزيزة... قال رسول الله صلى الله عليه وسلم: "يا معشر الشباب من استطاع منكم الباءة فليتزوّج", والمقصود بالباءة القدرة المادية على الزواج, وده خلاصة القول, يعني لما يبقى الشاب قادر يفتح بيت وينفق على زوجته وأولاده، ويعيّشهم عيشة كريمة، يبقى يتجوّز، غير كده يبقى يصبر ويصون نفسه لحد ما ربنا يفرجها, وإذا كان هو غير قادر؛ لأنه لحد دلوقتي لسه بيقضي فترة تجنيده, وكمان أهله أعلنوا إنهم مش هيقدروا يساعدوه نهائياً, يبقى ما بقاش فيه إلا سكة واحدة قدامكم, وهي أهلك, يعني هل أهلك على استعداد إنهم يساعدوه في تكاليف الزواج والحياة, ولّا هيرفضوا ده, فتكلّمي مع أهلك بصراحة ولو هم هيقدروا على ده يبقى خير, مش هيقدروا يبقى فيه كلام تاني. أنا مقدّرة حبك وتعلّقك به بس.. وأخرتها؟ هل الوضع اللي أنتِ فيه دلوقتي يرضي ربنا أو حتى الناس؟!! طبعاً ربنا بيكون راضي بس عن العلاقة الشرعية وهي الخطوبة والجواز, أما غير كده فالله وحده يعلم مقدار هذا الذنب عنده, وأنتِ في غنى عن ده, في غنى إن حبيبك يبقى هو ذنبك اللي يبعدك عن ربنا, مش معقول يكون الحب هو السبب في تعاستك, وطبعاً مش ممكن ده يرضي أهلك أو أي حد عاقل تسأليه من الناس, أنا مقدّرة حبك له وناس كتير ممكن تقدّره, بس اللي مش ممكن نقبله هو ظلمك لنفسك بالطريقة دي, لدرجة إنه هو نفسه حاسس إنه بيظلمك, فالعمر بيجري, صحيح إنتِ وهو بتكبروا مع بعض, بس بطريقة مختلفة في عيون الناس, الناس مهما مرت سنة واتنين عليه وهو لسه في الجيش أو بيدوّر على شغل هيقولوا شاب بيكوّن نفسه, وده باشمهندس ومستقبله مضمون بإذن الله, وألف بنت ساعتها هتتمناه حتى لو بقى عنده خمسة وتلاتين سنة, أما أنتِ فالناس بتعد عليك الأيام, فلانة اتجوّزت وهي أصغر منها, فلانة بقى عندها تلات ولاد وهي لسه ما اتجوّزتش, مش بس الناس اللي هتفكر كده كمان أهلك هترعبهم الفكرة دي, وأنتِ نفسك هترعبك الفكرة دي والعشرينات بتعدي والتلاتينات بتقرّب, مش باقول لك كده علشان أخوّفك أو أحبطك أو لأني باتكلّم وبافكر بطريقة الستات العواجيز, أنا للأسف باكلمك بمنطق المجتمع اللي بنعيش فيه دلوقتي, باكلمك عن الراجل اللي بيشوف إنه من حقه يتجوّز بنت صغيرة تدلعه حتى لو كان كبير في السن, وعن الأهل اللي بيشوفوا إن البنت اللي جابت الخمسة وعشرين كبرت, صحيح إن سنها بيبقى صغيّر بس الناس بتفكّر كده, كل الناس بقت بتفكّر كده, اللي عنده بنت وصلت للاتنين وعشرين بيحط إيده على قلبه, واللي عنده ولد يقعد يفرز في بنات الناس دي صغيّرة ودي مش حلوة ودي.. ودي.. ودي, وتتعرّض البنات لمواقف محرجة ومؤلمة, وكل ده لأنها في نظر الناس كبرت. مرة تانية أحب أقول لكِ إني مش باقول الكلام ده علشان أحبطك أو أخوّفك؛ فأنا بنت زيك ولي أخت وأصحاب، وحاسة ومقدّرة ومتفهمة اللي بتحسّي بيه, بتحبيه وصعب تعيشي من غيره, بس برضه مش هتقدري تعيشي بيه ومعاه, هو بعيد وهيفضل بعيد لحد ما دبلته تبقى في إيدك, ففكري إزاي ده يحصل علشان ربنا يكون راضي عنكم, واستخيري ربنا وادعيه يهديكِ لما فيه الخير, وابقي طمنينا عليكِ. لو عايز تفضفض لنا دوس هنا