كيك بصوص الرمان والليمون على "سفرة دايمة"

طبعا كلنا عارفين الفوايد العظيمة لثمرة الرمان، النهارده على "سفرة دايمة" هنقدم لكم كيكة هنستخدم فيها الرمان؛ وهي عبارة عن كيك بصوص الرمان والليمون، جربوها وقولوا لنا رأيكم فيها.
كيك بصوص الرمان والليمون
المقادير:
* 1 1/ 2 كوب دقيق
* 2 بيضة
* كوب سكر
* 1/ 2 كوب زبدة
* كوب عصير رمان
* كوب صغير زبادي
* 2/ 3 كوب حبات رمان
* 1/ 2 ملعقة صغيرة ملح
* 1 1/ 2 كوب سكر بودرة
* 4 ملاعق صغيرة بشر ليمون
* 1 1/ 2 ملعقة صغيرة بيكنج بودر
* رشة فانيليا
الطريقة:
1- أول حاجة اخلطي الدقيق والبيكنج بودر والملح، وانخليهم مع بعض.
2- بعدين اضربي السكر والزبدة مع بعض لحد ما السكر يدوب كويس، وبعدين ضيفي عليهم البيض تدريجيا، واخفقي كويس أوي بعد كل بيضة.
3- بعد كده ضيفي 1/ 2 كوب عصير رمان، وملعقتين من بشر الليمون، وقلبيهم لحد ما يتجانسوا، وبعدين حطي خليط الدقيق على الخليط السابق وقلبيهم مع بعض، وفي الآخر حطي الزبادي وقلّبيه.
4- حضري القالب؛ بإنك تدهنيه زبدة، ورشيه بالدقيق، وبعدين صبي فيه الخليط، ودخلي القالب في فرن ساخن لحد ما الكيك تستوي لمدة 25 دقيقة.
5- بعد ما تستوي طلعيها من الفرن، وسيبيها تبرد لمدة ربع ساعة.
6- في الوقت ده حضري الصوص: بإنك تخلطي السكر البودرة، وباقي كمية عصير الرمان والفانيليا، وملعقة بشر الليمون وقلبيهم كويس.
7- دوسي على سطح الكيك بشوكة، وصبي الصوص عليها وافرديه، وبعدين دخليها التلاجة تبرد، وبعد كده طلعيها ووزينيها بحبوب الرمان، وقدميها.. بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،