لا تستبقي الأحداث

سلام عليكم، أنا عندي مشكلة إني كنت بحب واحد من زمان، وهو كان بيقول كده برضه؛ بس كان كل مرة بيسيبني من غير سبب ويرجع تاني كتير؛ بس آخر مرة شتمته وقلت له: مش هارجع. المهم بعد 3 سنين كلمني من الخارج وبيقول إنه هييجي بعد سنتين علشان يخطبني.
وأنا وافقت إني أرجع له، وبنتكلم نت وتليفون؛ بس المشكلة إنه كل شوية يقول لي: قولي لي كلام حب وحشتني وكده، وأنا مش بارضى، يقفل الموضوع ويرجع تاني، وأنا أرفض وكده، وكمان عايز صور كتير ليّ، وأنا مش راضية لأني شاكة في الإلحاح ده، وكمان حاسة إنه بخيل لأني عارفة إنه بيكسب فلوس كتير، وبيكدب وبيقول إنه الفلوس مش زي ما انا فاكرة، وهو أصلا غني فحسيت إنه بخيل، أنا مش قادرة أحكم على تصرفاته، ومش فاهمة هو بيعمل كده ليه، حد يفهمني؟؟ (H)