مسافر ؟... طب خد

نفسك تسافر صح ؟ ويا حبذا لدولة من دول الخليج مظبوط ؟ طيب يا سيدى شوف .. انت يلزمك شوية نصائح ومعلومات وارشادات قبل ما تتوكل على الله وتغادر ارض الوطن .. واليك القواعد الذهبية العشر .. تحفظهم زي عينيك
القاعدة الاولى : اوعى تصدق اللى يقولك ان مفيش تأشيرات بتطلع للمصرين فى الدولة الفلانية او العلانية .. واحنا متفقين اننا بنتكلم هنا عن دول الخليج .. كل التأشيرات بتتطلع سواء كانت زيارة او عمل بس هو الموضوع بياخد شوية وقت .
القاعدة الثانية : وصلتك التأشيرة .. زيارة مش عمل ؟ ولا يهمك المطلوب منك فى الحالة دي طبعا انك تتمتع بإصى درجات الانسانية ويكون عندك دم حقيقى مش اى كلام .. يعنى تعمل حسابك فى الفلوس كويس اوي ويا حبذا لو معاك الف دولار تبقا انت كده فى المعقول لغاية ما تلاقي شغل وتنقل اقامتك عليه اللى هى الكفالة يعنى .. ليه بقا باقولك يكون عندك دم .. علشان صاحبك او قريبك او حتى اخوك او اختك للى حضرتك هتبرشط عليه مش فاتح بنك ومعبي شوالات فلوس .. يعنى تشارك فى الاكل والشرب والنظافة وتكون ريحك خفيفة وتحفظ الشارع بدرى بدرى علشان تتحرك لواحدك.
القاعدة الثالثة : اظبط السيرة الذاتية بتاعتك كويس جدا ومتكتبش فيها خيالات .. اكتب الحقيقة وبس .. لان ممكن يطلب منك شهادات من الاماكن اللى اشتغلت فيها قبل كده .. ولو مش موجوده اصلا هيبقا شكلك وحش جدا ..كمان لازم تتمتع بشياكة ولباقة ولغة معقولة .. انت مش لواحدك وامنافسة شرسة خاصة من الاخوة الشوام .. ودول بقا اساتذة فى تسويق انفسهم .
القاعدة الرابعة : التأشيرة عمل مش زيارة ؟ يبقا الف الف مبروك .. بس لازم الاول تقرا عرض الراتب .. وتشوفه كام بالظبط ومتحسبهاش بالمصري ارجوك .. لكن عموما لو بنتكلم عما يوازي الف دولار شهريا مبدئيا يبقا اشطه .. لا..مش هتحولهم لمصر مجمدين .. انت هتصرف نصهم او اكتر سكن ومواصلات لغاية ما تجيب سيارة .
القاعدة الخامسة : لو كان مكان العمل موفرك سكن يبقا تمام جدا .. غرفة مثلا لوحدك او زميل واحد فى الغرفة اوك تقدر تمشى امورك وتستحملوا بعض .. لكن مش موفر .. يبقا هتدور على سكن .. اياك تهين نفسك فى سكن حقير مع 50 نفر فى شقة واحدة .. خليك نزيه وعيش عيشة بنى ادمين على قد ما تقدر .
القاعدة السادسة : اياك والحريم يا شحاته .. تلم نفسك كده وتتقى الله علشان يباركلك فى رزقك .. واعرف ان رزق الغربة ده بيكون ليك ولناس تانية .. فحاول تتصدق على قد ما تقدر .
القاعدة السابعة : عايز تحول فلوس لمصر ام الدنيا .. حول بالدولار يا معلم .. ع الاقل فرق السعر ينفعهم فى مصر لما ييجوا يحولوها للمصري .
القاعدة الثامنة : نازل اجازة .. هتجيب هدايا يعنى هتجيب هدايا .. البس يا حلو .. بس دايما خللى للوالد والوالده حاجه مخصوص .
القاعدة التاسعة والعاشرة : اتكلم عن مصر كويس فى الغربة .. مش ناقصاك احياة ابوك