جمالك بالألوان مع جيلان.. العباية لإطلالة جديدة ومميزة في رمضان

وصلتني رسايل كتيرة منكم الفترة اللي فاتت بتطلبوا فيها إني أقدّم لكم حلقة عن موضة العبايات...
علشان كده فكّرت إني أقدّم لكم الحلقة دي خصوصاً وإحنا في شهر رمضان الكريم، وبنكون عاوزين نغيّر شكلنا والاستايل بتاعنا، وبنات كتير بتحب تلبس عبايات في شهر رمضان...
يلّا بينا نشوف هاقدّم لكم إيه النهارده....
* عباية أوف وايت مشجّرة
العباية اللي هنشوفها دلوقتي لونها أوف وايت ومشجّرة باللون الزهري والموف، والعباية دي هتناسب الناس اللي مش بيحبوا يلبسوا ألوان غامقة أوي، وكمان هتناسب أي عروسة لسه متجوّزة قريّب؛ لأنها ممكن تحضّر بها الفطار أو السحور.
والعباية دي مشغولة، وفيها تطريز، علشان كده أنا استغنيت عن الإكسسوارات، واستبدلتها بربطة طرحة فيها شغل وضفاير على الأطراف، والربطة دي بتليق مع أصحاب الوش الرفيع والطويل؛ لأنها بتدوّر الوش.

إضغط لمشاهدة الفيديو:

* عباية سوداء بتطريز شرقي
العباية دي شكلها مختلف وجديد، عليها تطريز شرقي لونه فضي في أسود، والعباية دي خامتها من الشيفون، وأكتر حاجة بتميّزها هو الشغل والتطريز اللي عليها، والعباية دي ممكن نلبسها لو عندنا مناسبة؛ لأن شكلها مميز وشيك وشرقي جداً.
وبالنسبة لربطة الطرحة، فأنا بافضّل دايماً مع العبايات إني أعمل ربطات تقليدية؛ لأن الإسبانش والربطات اللي بتكون على ورا بيكون شكلها غريب ومش متناسق مع الطابع الشرقي للعباية.
ومع العباية دي عملت الربطة بالشكل الخليجي، بس جبت التطريز اللي موجود في الطرحة على قدام علشان ما يبقاش الشكل كله أسود.

إضغط لمشاهدة الفيديو:

* عباية أسود × بينك
العباية دي عبارة عن فستان من تحت طويل، وعليها تلبيسة شيفون متفرّغة ومشغولة باللون البينك، العباية دي قَصتها ضيقة من فوق ونازلة على واسع، والقصَّة دي بتناسب الجسم المليان؛ لأنها بترفّع الجسم ده غير إن اللون الأسود كمان بيبيّن الجسم أرفع.
وبالنسبة لربطة الطرحة، فأنا دخّلت اللون الأسود مع اللون البينك اللي موجود في العباية وعملتها بشكل تقليدي؛ لأن ده بيتناسب أكتر مع العباية زي ما اتفقنا قبل كده.

إضغط لمشاهدة الفيديو:

* عباية سوداء مطرزة بالأورجانزا
فيه ناس مش بتحب تلبس غير اللون الأسود في العبايات، ومش بتحب تدخل مع اللون الأسود أي لون تاني، والعباية دي بقى ميزتها إنها سوداء، بس عليها شغل بسيط من نفس اللون عبارة عن فراشات ودواير من الأورجانزا.
وربطة الطرحة شكلها تقليدي، بس أنا حبيت إني أجيب التطريز اللي موجود في الطرحة على قدام، والربطة دي هتليق مع أصحاب الوش الرفيع؛ لأن التطريز اللي في الطرحة هيعمل حجم زيادة للوش، يعني لو وشك مليان ما فيش داعي إنك تجيبيها على قدام؛ لأنها هتكبّر وشك أكتر.

إضغط لمشاهدة الفيديو:

* عباية مغربي بشكل جديد
معروف إن العبايات المغربي بيكون لونها أبيض ومطرزة بلون تاني، لكن العباية اللي هنشوفها دلوقتي لها نفس الاستايل المغربي، لكن عملناها باللون الأسود والتطريز اللي عليها باللون التركواز، والعباية دي بتناسب البنات اللي سنها صغير؛ لأن شكلها شبابي ورقيق.

إضغط لمشاهدة الفيديو:
وفي النهاية أُحبّ أشكر كل الناس اللي ساعدوني علشان أقدر أقدّم لكم حلقة النهارده:
عبايات: "منال" - تليفون 0123336463
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583
وفي النهاية أتمنّى إن الموديلات اللي قدّمتها لكم النهارده تكون عجبتكم..
وتابعوني كل أسبوع في رمضان..
علشان هاقدّم لكم موديلات جديدة مناسبة للشهر الكريم..
ومن هنا للأسبوع الجاي..
هاستنى تعليقاتكم ورأيكم في الموديلات اللي قدّمناها...
سلام،،،