عزومة 20 رمضان

عصير الجوافة باللبن
العصير ده مفيد جداً، وبيحتوي على فيتامين سي..
المقادير:
* 5 ثمرات جوافة مقطعة قطعاً صغيرة
* 3 أكواب لبن مثلج
* 1/4 كوب عصير ليمون
* 1/2 كوب سكر
الطريقة:
اخلطي كل المقادير دي مع بعضها، واضربيها في الخلاط وبعد كده صفيها وصبيها في كاسات العصير.

*******************
شوربة الشعرية
شوربة الشعيرية
المقادير:
* 1/2 كيس شعيرية
* 5 أكواب شوربة فراخ أو لحمة
* 2 ملعقة كبيرة زبدة أو سمن
* 2/1 كوب لبن (اختياري)
* ملح وفلفل
* جزر مقطع مكعبات
الطريقة:
حمري الشعيرية في السمنة لغاية ما لونها يبقى ذهبي، وبعد كده ضيفي إليها الشوربة والملح والفلفل والجزر، وسيبيهم مع بعض لغاية ما تغلي، وبعد كده هدي البوتاجاز، وسيبيهم لمدة ربع ساعة أو لغاية ما الشعيرية تستوي، وبعد كده ضيفي إليها اللبن، واغليهم مرة كمان، وبعد كده حطيها في طبق الشوربة.

*******************
سلطة الفرايداي
سلطة الفرايداي
المقادير:
* ثمرة طماطم
* ثمرة فلفل أخضر
* ثمرة فلفل أصفر
* ثمرة جزر
* ثمرة خيار
* ثمرة بصل
* عصير ليمونة
* ملعقة صغيرة خل
* ثمرة بنجر مسلوقة
* 1/2 ملعقة صغيرة نعناع مفروم
* 1/2 ملعقة صغيرة ثوم مفروم
* 1/2 ملعقة كبيرة زيت زيتون أو ذرة
* 1/2 ملعقة كبيرة ملح وزعتر
* 1/2 ملعقة صغيرة كمون
الطريقة:
1- هاتي البصل وقطعيه إلى حلقات رقيقة جداً ورشي عليه شوية خل.
2- قطعي جميع الخضراوات ما عدا الجزر إلى قطع صغيرة جداً وابشري الجزر.
3- هاتي كوب وحطي فيه الزيت والخل وعصير ليمونة والملح والكمون والزعتر والثوم المفروم والنعناع وقلبيهم مع بعض كويس.
4- هاتي طبق السلطة وحطي فيه البصل وجميع الخضراوات، ورشي عليه الخليط اللي إنتِ عملتيه، وقلبيهم مع بعض كويس.

*******************
مندي الدجاج
مندي الدجاج
المقادير:
* فرخة كاملة
* 4 أكواب أرز
* ملعقة صغيرة فلفل أحمر
* ملح وفلفل
* 4/3 كوب زيت ذرة
* 2 ملعقة كبيرة كمون
* ملعقة كبيرة قرنفل
* ملعقة كبيرة كزبرة جافة ومطحونة
* 3 عيدان قرفة
* 2 ليمونة
* 3 ثمرات فلفل أخضر
* 2 ملعقة كبيرة كركم
* 2 ملعقة كبيرة عصير ليمون
* بصلة مقطعة شرائح
* مكعب مرقة دجاج
* ملعقة كبيرة حبهان مطحون
الطريقة:
1- اغسلي الفرخة ونظفيها كويس، وبعد كده قطعيها إلى نصفين، وتبليها بخليط من الكركم وملعقة كمون والفلفل الأحمر وعصير الليمون وربع كوب زيت والملح والفلفل وسيبيها في الخليط ده لمدة ساعتين علشان تتبل كويس.
2- هاتي الأرز واغسليه كويس، وبعد كده انقعيه في المية لمدة نص ساعة.. وبعد كده صفيه وحطيه في صينية فرن وضيفي إليه باقي الزيت ودوّبي مكعب مرقة الدجاج في كوب مية وضيفيه إلى الأرز.
3- ضيفي الحبهان المطحون والكزبرة والقرنفل والقرفة وملعقة كمون والملح، وقلبيهم مع الأرز، وبعد كده غطي الصينية بورق فويل، واعملي ثقوب في الورق باستخدام الشوكة.
4- هاتي الفرخة، وحطيها على الورق الفويل المغطى به الأرز وبعد كده غطي الفراخ مع الصينية بورق الفويل كويس.
5- سخني الفرن على درجة حرارة عالية، ودخلي الصينية الفرن لمدة ساعتين.. وبعد كده خرجيها من الفرن وشيلي ورق الفويل، ودخلي الصينية تاني علشان الفرخة تحمر.
6- بعد ما تلاقي الفرخة احمرت خرجي الصينية من الفرن، وحطي الأرز الأبيض في طبق التقديم ومن فوقه حطي الفرخة.

*******************
بسيسة
بسيسة
المقادير:
* كوب ونصف سكر بودرة
* 4 بيضات
* 1/2 كوب سمن أو زبد
* 1/4 كوب زيت
* 2 ملعقة بيكينج باودر
* 1/4 ملعقة كربونات الصودا
* 2 كوب دقيق
* كوب دقيق ذرة
* 2 كوب زبادي
* ملعقة فانيليا
الطريقة:
1- اضربي البيض والسكر والفانيليا مع بعض وبعد كده ضيفي إليهم الزبدة والزيت، استمري في الضرب، وبعد كده ضيفي إليهم الزبادي واضربيهم مرة كمان مع بعض.
2- انخلي الدقيق مع دقيق الذرة، وضيفي إليهم بيكينج باودر وكربونات الصودا، وضيفيهم إلى الخليط السابق واضربيهم مع بعض.
3- شغلي الفرن على درجة حرارة متوسطة، وبعد كده ادهني الصينية بالزبدة، وبعد كده صبي فيها عجينة البسيسة ودخليها الفرن، وأول لما تتأكدي إنها استوت ووشها احمر خرجيها.

*******************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************