بشوفها

كل يوم قاعده .
عند " أحمد أمين .."
مدلدله رجليها للدنيا ..
وبتسلم على الماشين !
***
الصبح ..
كانت تنادي الشمس تطلع !
كانت تروح السوق وترجع
_بالبسكويت الساده _
وارب معاها الشاي ..
وتفتح الراديو
***
كانت ..
تداري صبرها ع المر/ تبكي
لفرحة البنتين ..
_بصورة بنت صاحبتها _
ف ليلة العمر !
***
كانت ..
لما الغيوم تكتر ..
والسما تمطر .
تنزل تد الشمس
تطلع م الغروب !
***
كانت بترسم كل يوم الصبح ف عينيا ..
وتعين الزمن ليا .
_ وكالعاده _
بنام على حجرها
وقلبي مطمن ..
اكسرلها الطبقين
والفجر بيسنن ..
واعمل بصلي وبقرأ الفاتحه !
فتجيني وتأمن .
يا صدرها فرحان أنا بحضنك ..
يا شعرها ما تنام على خدي ..
وأنام أنا جمبك .
***
وف يوم ..
نادت عليها : ستي ..
ما تقومي يلا تشغلي القرآن
وتغسلي ..
ذنوب البيت من ع الحيطان !
وترشي نور الشمس ف السكه ..
وتفتحي الدكان !
***
على كتف الحمام ..
كانت ونامت .
معرفش فين رايحين ؟
وليه الصبح كان باهت ؟.
- فاكر
قالتلي فيوم أنا هبقى مهوره ..
-يمكن ؟
لكن بكيت ساعة ما شوفت الناس بتبكي ..
***
رصيت مع الدفان قوالب قبرها
/حضنتها ..
ووديتها بدراعي ..
قلبته الاسمنت .
وكتبت بصباعي ..
اسمي واسمها ..
وقلب بسهم بين لإتنين!
***
ستي ..
الي الزمن شخبط على جبينها !
كل يوم الصبح
_
وتطبطب على كتفي ..
لساها بتغني "عيون القلب "
وتبوس ودان الناس ..
وتمر من جنبي
الشاعر /
مصطفى أبو مسلم