النادى عيسوى يكتب : الست هنية البراوية

الست هنية البرّاوية , ست قادرة ومتعافية , فى المعاملة مفترية , على خلق الله مستقوية , تزعق يمين وتشخط شمال ولا كات فى مرّة مختشية , من بداية مجيتها وهيّ ولية مش عادية , طبت علينا كده من السما بشمسية إللى بيقولوا عليها مظلة جويّة , دي مش بجد بالدرجة ديّة , أصلى أنا حبّيت أقولها باستعارة مكنية , اللى الواحد منّا بيكتب كلام ويبقى فيه فى نافوخة معانى مستخبية , كنّا ساعتها الضهرية , وكل حى كان فى داره بيقيّل شوية , صحيت عشان أصلى العصرية , قابلنى الواد ابن وطنية اللى كان لسّة جى من الجهادية , وقال لى إلحق يا عم عطية , قولتله خير يا وله , قال لى فيه ولية سكنت دار ابن بهية , قلت له العمده عنده إخبارية , قال لى رحت أقول له هب فيّا , قمت ماشى والغل حينط من عينية , وسألت نفسى : هو العمدة ليه كلمنى بالطريقة ديّة؟ يبقى فيه حاجة بينه وبينها مدّارية , حلفت برحمة ستى نبوية لأعرفها مين دى هيّة , وف أى جحر متربية , ومبقاش إبن وطنية اللى اتعلم فى الجهادية شغل الإستخباراتية إن معرفتش منين جايّة , وعليها يا عم عطية أطقس عليها الصبحية والضهرية والعصرية والمغربية ولحد الفجرية , وأروح أنام لى شوية , قلت له وعرفت حاجة يا وله ؟ قال لى: شفت اتنين شكلهم بلطجية , بين العشا والفجرية , وفضلت لابد فى حتة مدارية , وبعد ساعة لقيتهم خارجين , واحد منهم فى إيديه إزازة كبيرة كانت ماليانة ميّة , والثانى كانت ويّاه لفة مطوية , قلت فى بالى جايز تكون عشّتهم عشوة من اللى هيّة , وإزازة المية دى خدوها يشربوا منها وهما ماشيين ع الزراعية , روّحت نمت وصحيت على صوت ناس رايحة وجايّة , قمت لبست الجلابية , وخرجت وعماصى فى عينية , وعرفت إن كات فيه كبسة على دار الواد هدية إبن شلبية , آل أيه الحكومة خدته عشان لقت عنده حشيش يا عم عطية , مع إنى طول عمرى ما شفتش واحد من غيطه لداره زى هدية إبن شلبية , بسّى إن جيت للحق الواد لسانه زالف شوية , دايما واقف للعمدة فى الرايحة وفى الجايّة , وأى حاجة متكنش هيّة , قلت له : زى أيه يا وله : قال لى : مانت راسي على كل شيء يا عم عطية , قلت أستهبل مع أنى راسى على الحكاية وقلت له ياوله بشويش عليّا , واحدة واحدة يابن وطنية , قال لى ماشى مع إنى عارف إنك بتستهبل عليّا , الحكاية وما فيها يا عم عطية : إن مرات العمدة كانت فى رحلة ترفيهية فى بلدة ساحلية فى عز الصيفية , قامت قابلت هناك الست المفترية وعملت معاها صحوبية , وعرفت منها إنها مش بس مستقوية لكنها زعيمة حرامية , قلت له يابن وطنية مالها حورية بالمواضيع دى هيّة , قال لى لأ ياعم عطية بلاش استهبال للدرجة ديّة ! إنت مش عارف إن حورية عندها ولد اهبل وعايزة تمسكه العمدية ! وانت عارف إن أبوه بعافية شوية , ويمكن نقوم ونصبح منلقهوش على ضهر الدنيا ديّة , وعارفة كمان إن فيه شباب فى البلد كلهم رجولية , منهم الواد هدية ابن شلبية , قلت له صح يابن وطنية , والواد كمّل وقال لى :النسوان اتفقوا على إنهم يخلصوا من شوية الشباب ديّة بس شوية شوية علشان الواد الاهبل يمسك العمدية , قلت له يابن الجنية أهو الكلام ده صح مية المية , وصحيح يا بن وطنية نفع معاك موضوع الاستخباراتية , ياللا ياواد روّح ونكمّل الليلة الجايّة 0 وإلى العدد القادم مادام فى العمر بقية.