موقعة الحضن..بقلم : حسين الحانوتى

الناس اللي نازله لوم وتريئه في الاعلام والسوشيال علي الجامعه وان الجامعات بقت مكان لعرض الازياء للبنات و اصبح فيها من الموبقات اكتر من العلم والتعلم…واصبحت عرض للانحلال والتسيب ..او الانفتاح زي مابيسموه
قبل ماتلومو الجامعه لومو نفسكم لومو استهتاركم لومو اسلوب تربيتكم لاولادكم لا دين ولا قيم ولا اخلاق ولا اصول نعرفها ويعرفها مجتمعنا..استهتاركوا في التربيه كان سبب في تدنيس ارض العلم…ارض الجامعه رمز العلم..لالا دا عرض وشرف الجامعه كمان ان مكنش عرض البلد كلها
زمان كانت البنت رغم سنها تخاف تخرج الشارع الا وشعرها متغطي ولو حد مرسال عاوز ابوها او اخوها ترد ومتظهرش والجيل ده طلع منه عالمات وطبيبات ومكنش لا نت ولا تلفزيون ولا مسلسلات تركي واجنبي
مش تيجي بنت و ايه كمان في جامعة الازهر..لا ..دي تروح بنفسها للشاب في جامعه اخري عشان تحضنه ويحضنها ادام الزملاء ..مات الكسوف والحياء في زمن رمزه الغباء
متلوموش غير نفسكم استهترتم بالقيم و الاخلاق اللي اتربيتوا عليها ومزرعتوهاش في ولادكم بقي الشارع والمواصلات والمدرسه ملهمش حرمه ولا حيا بتلاقي غرائب وعجائب في الشوارع وانحلال اخلاقي في اللبس والعري و مفيش احترام للمدرس ولا المدرسه وجاي تقول العيب علي الجامعه..وناسي عيوبك وغلطاتك وطريقة تربيتك
زمان كان فيه معلم يعني استاذ لو قابلك في الشارع من بعيد كنت تتداري وتقول يا ارض انشقي وابلعيني رغم انك مغلطش لكن كان المدرس له هيبه وقيمه ورهبه ولو بيعلمك وضربك وقطع لحمك اهلك ابوك او امك يساعدوه ويقولوله انت كمدرس التربيه والتعليم ورغم ان قلوبهم بتتقطع عشانك لكن كانوا عاوزينك حاجه كبيره يكبروا بيك و مستقبلك يهمهم ويخصهم…النهارده انت اللي بتنهر المدرس ليه ضربت ابني هو عمل ايه وممكن كمان ايدك تتمد عليه .طيب اهو المدرس وصل لحالة عنه ما اتعلم هو هينفعني ولا هيعطيني.طيب لو ربيته انت في البيت المدرس هيعلمه وهو كمان من تربيتك هيعمل للمدرس الف حساب خوفا من عقابك انما انت اعطيته فرصه يبقي متنمر لا لا لا معاق اخلاقيا يعني بالفلاحي قليل الادب وانت السبب مش المدرس…شوف جيلك زمان.. اتربيت ازاي وعشت ازاي واكلت ازاي ونمت واتعلمت ازاي لو كنت متعلم وكنت بتلبس ايه وازاي كنت بتحترم اهلك وجيرانك وتعمل حساب الكبير وتخاف حد يشوفك في الشارع وانت بتعمل غلط..النهارده الشوارع مليانه شباب وبنات كلها غلط في غلط وانت كأب السبب انت وانت بتربيه كنت بتقوله تف علي عمو ..اشتم جدو. اشتم خالو..ونسيت اصل تربيته وتقاليدك ومقلتش لابنك او بنتك وقت الغلط دا غلط عشان كده طلع محدش مالي عينه وفكر انه الصح والباقي كله غلط حتي انت بالنسباله غلط بقيت دقه قديمه ..وانت السبب..وهيجي وقت التف عليك
واللي حصل في الجامعه والناس شافته ممكن يكون فيه اكبر منه ومبنشوفوش ولا نعرفه ..ايوا ماهي بقت خلطبيته والسبب ان الشباب مشوش القيم بتاع مجتمعنا الشرقي اللي هو نسيها لا لا لا اصلا معرفهاش منك واللي هي اساس من الدين بتاعنا وابوك زرعها فيك وانت معرفتش تزرعها في ولادك..طيب وهما معلمين الجامعه من دكاتره او حتي رئيس اي جامعه مش هيوقفوا عساكر او يراقبوكل طالب وطالبه ويشوفوا بيعمل ايه برا المحاضره و يقولولهم دا صح ودا غلط. دي فطره ربنا فطر الناس حتي الانعام عليها.. الانعام اللي هي البهايم بتتحرج تعمل غلط ادام صاحبها او عموما البني ادامين..
لوم نفسك وارجع لاصلك وقيمك عشان تماسك المجتمع الشرقي النضيف اللي كنا بنسمع عنه في جامعات مصر في الخمسينات ايام الميني جيب واللبس القصير المكشوف ورغم كده مكنش فيه تطاول او انحلال او حتي نظره غلط لبنت زميله او نسمع انه ضايقها او لمسها.. مش حضن..حضن يا ابن المفتريه في الجامعه..حضن يعني انهيار مجموعة القيم و الاخلاق اللي ابوك وابوها كانوا السبب في انتحارها علي عتبة التحضر وقت تربيتك
دا ابوك كان يخاف يمسك ايد امك ادام الناس وهي تفتكرها عيبه وفضيحه والناس هتجيب في سيرتهم مع انها مراته شرعا وقانونا..انما توصل لحضن.. والاخر تقولوا الجامعه اساس الفساد .. طيب هي الجامعه ربت..
لا ياسيدي انت وهي الفساد بدأ من بيتكم من ابوك وامك واهلك..هما اساس الفساد وهما المخرجين والمنتجين لموقعة الحضن اللي انتو ابطالها..
واخيرا اذا كنت ترضي بنتك او اختك يحصلها كده يبقي انت ديوث وماتت فيك النخوه والرجوله وحقك ترضاها علي اي حد لانك بدون كرامه ولا ترقي ان توصف بالرجل..انتحرت ايضا النخوه والاصول في هيئه الامعات اشباه الرجال