عمار يا مصر...السوريسااااار

راجعين فى امان الله انا والاولاد من تدريب السباحة...طلعت فى دماغهم يا كلوا كشرى...وقفنا عند بتاع الكشرى وضربنا ست علب مخصوص..ورحنا مرصوصين على الرصيف قدام البحر زى شحاتين السيدة ...وبعد ما انخرطنا فى عزف جماعى ودمرنا العلب ..انتبهت ان شهد لسة بتنفض رجليها من رملة البحر وانها ماكلتش...وأول مافتحت العبة بتاعتها أأكلها لقيت صرصار من الحجم المحترم ممدد على وش الكشرى ..اول ماشفت المنظر انتابتنى حالة من الذعر..وقعدت أضرب ايدى فى العلب من ايدين العيال زى فيلم الدواء الذى أرسلت ابنتك فى طلبه فيه سم قاتل....وكأى شخص متحضر لميت العلب ورميتها..وذهبت للرجل اعاتبه عتاب الأحباب...اسكت مش لقيت صرصار فى علبة الكشرى؟؟ رد علية وكانى عثرت على كوبون مسابقة: لا والله؟؟؟ علبة واحدة واللا كلهم؟ وياترى لقيتيه فى العدس واللا فى المكرونة واللا فى البصل؟؟ على فكرة احنا اكلنا نضيف بس هو تلاقيه طار من عند الجيران ووقع فى الخلطة/ ولم أجد الرد اللائق بحضرة المحترم...فأخدت العيال ومشيت وانا أسأل الله الرحمة...للصرصار طبعا