الجمعيات التعاونية فى المنوفية خرابة

تحولت الجمعيات التعاونية الاستهلاكية بمحافظة المنوفية إلى خرابة. وأكد العاملون فى فروع الجمعيات قيام مجلس الإدارة ببيع العديد من الفروع الخاصة
بالجمعية فى مراكز المحافظة بحجة الحاجة إلى المال لتسديد رواتب الموظفين والعمال، وقال العاملون إن مجلس الإدارة الحالى للجمعيات الاستهلاكية يرفض رقابة التموين والهيئات الرقابية المختلفة مما جعل الجمعيات الاستهلاكية تدخل فى العديد من القضايا التى رفعتها التموين.
يقول حماد عفيفى، أحد العاملين: «إحنا مش لاقيين نقبض، أنا متعين من 27 سنة وراتبى 900 جنيه ومفيش أى حوافز أو بدلات وأنا إدارى، ومش راضيين يزودونا وبيقولولنا إنهم بيبيعوا فروع الجمعية علشان يقبضونا ومش لاقيين بضاعة فى الفروع»، كتبنا شكاوى لرئيس الوزراء ورئاسة الجمهورية والمحافظة ومحدش سأل فينا وإحنا نناشد المسئولين أننا معدومين لأننا كنا جمعية محترمة وكان عندنا رصيد فلوس ولكن الآن أصبح رصيدنا صفر، والفروع مبقاش فيها أى بضاعة ودا بيأثر علينا بالسلب.
وأضاف «عفيفى»: «عاوزين أى جهة تساعدنا وتتولى الإدارة واحنا عندنا الفروع والعمال وتوقفنا على رجلينا، مش عاوزين نتسول إحنا عاوزين حد يقبضنا وإحنا على أتم الاستعداد للشغل من جديد، وكمان إحنا معندناش رقابة على الجمعية الرئيسية ومجلس الإدارة ما اجتمعش بينا من أكثر من ثلاث سنين.
ويضيف محمد عماد، محاسب فى الجمعية الاستهلاكية: أنا بشتغل من أربع سنوات وراتبى 330 جنيهاً وأنا عندى بيت وأسرة والدولة شالت الدعم وكل حاجة غليت إلا مرتباتنا وعندنا فروع المفروض أننا نشغلها ولكن الإدارة مش عاوزة كدا وبتستسهل وبتبيع الفروع وعلى آخر السنة ما نلقيش لينا أى فرع.
وأضاف «عماد» أن مجلس الإدارة رفض الرقابة من التموين ومن أى جهة مما جعل التموين تحرر محاضر ضدنا ومفيش أى حد بيدور على حقوقنا، مشيراً إلى أن كل مطالبهم هى لقاء الدكتور هشام عبدالباسط، محافظ المنوفية، ودا حقنا كعمال، وعاوزين ننضم إلى أى قطاع حكومى مثل التموين أو نتبع المحافظة بحيث إن أى جهة تاخد الفروع دى وتشغلنا وتقبضنا، إحنا حوالى 100 عامل وعاوزين الحكومة تقف معانا ولازم الدولة تقف معانا وتشوفنا عاوزين إيه.
واستطرد هانى بدوى: «إحنا معندناش أى مراقبة حتى لما التموين يأتى أو أى جهة تيجى علشان تشوف الدفاتر، الإدارة ترفض ولهذا رفعت وزارة التموين علينا قضايا لأن الإدارة مش راضية تديله ورق، مضيفاً: أنا بقالى 7 سنين وبقبض 300 جنيه ودا مرتب ميجيبش عيش حاف، وكل ما يتحججوا يبيعوا فروع وبيقولوا إنهم بيقبضونا منها، مضيفاً: نناشد المحافظ عاوزين نقابله وعاوزين يشوف لنا حل.
وكان مجلس إدارة الجمعيات التعاونية الاستهلاكية بالمنوفية قد باع خلال الفترة الماضية ما يزيد على 12 فرعاً من فروع الجمعية فى مراكز أشمون والباجور وتلا ومنوف مما دفع الموظفين إلى الثورة على المجلس مطالبين المحافظ بالتدخل السريع لحل الأزمة.