كلام مسئول

محمد صلاح: يا مساء الخير فاكرين حسنين ومحمدين وشلبية اللي لو سمعت الكلام وراحت الوحدة الصحية مكانش بقى عددنا في مصر دلوقت 80 مليون الاحصائيات والارقام بتقول ان اذا توقف متوسط عدد اطفال الاسرة عند 3هنبقى 100 مليون عند سنة 2020، اذا اكتفت دلوقت كل اسرة بطفلين هنوصل برضه لل100 مليون لكن سنة 2029 يعني هنؤجل رقم ال100مليون دا 9 سنين ، ال100 مليون رقم كبير تاجيل الوصول ليه على 9 سنين مسالة مش سهلة وتحقيقها هيكون انجاز بكل المقاييس لكن الارقام رغم حيادتها قطعيتها واحيانا صدمتها تظل باردة ويظل الناس يتعاملوا معاها زي ما بيتعاملوا كده مع الخيال العلمي مع توقعات زي موضوع انفلونزا الخنازير اللي كتير مش شايفين خطورتها رغم الارقام اللي فضلت نازلة ترف علينا من بلاد بره لحد ماوصلت لنا .. كانت الناس بتتعامل مع الارقام دي زي ارقام الاحتباس الحراري مثلا يعني .....
من ايام انظر حولك ونسيتي تاخدي الحباية النهاردة واسرة صغيرة تساوي حياة افضل وحاجة ببلاش كده وتطبيق تنظيم الاسرة في مصر واخد منحى اختياري كانت الحكومات المتعاقبة عاقلة واقعية رفضت انزال العقاب بالطفل الثالث او الرابع راعت الموقف الشعبي والديني ماجريتش ورا دعوات بحرمان الطفل الزيادة من التعليم المجاني او العلاج في المستشفيات الحكومية او عدم اضافته لبطاقات التموين لكن الموقف الشعبي كمان ظل حساس جدا اقترب من التنظيم ببطء شديد خلى كتير من برامج التنظيم مالهاش جدوى وحول حسنين ومحمدين الى اغنية افراح بتتغنى في حفلات الزفاف لناس داخلين يخلفوا ..تحدي بقى ، سخرية تحويل مسار اغنية هادفة لكاريكاتير لذيذ بقت حسنين ومحمدين نكتة حبوب منع الحمل راحت لعلف الفراخ البيضا حاجات تانية بقت بالونات بالونة للعيل رغم تأييد شيخ الازهر والمفتي ووزير الاوقاف بالتنظيم الناس مش عايزة تقتنع واذا اقتنعت يبقى على مضض لانه طبعا فيه غيرهم من رجال الدين بيشككوا وفيه اللي حاسين بشبهات في التمويل الاجنبي لبرامج تنظيم الاسرة في المقابل اندفع ناس كتير للمقويات من غير لا اعلانات ولا حملات ولا دعم حكومي ولا حاجة رغم ان البعض وصل بيه التفكير من كتر العيال انه يبيعها واللي دبحهم علشان خايف على مستقبلهم طب ماكانش خلفهم احسن ..بنقل..؟ اه بنقل بس اقل من المفروض والنتيجة انفجار سكاني في بلد بيعيش معظم سكانه على شريط ضيق على نهر النيل وسايبين بقية البلد ..ضغط على البنية التحتية زحمة في الشوارع في المدارس في المستشفيات في الاسواق سكان مقابر زحمة يادنيا زحمة ، زحمة في كل حتة مع الزيادة ومع البطالة ظهر لنا بقى التوربيني واشباهه ولسه اطفال الشوارع موجودين دول ما بينزلوش من طبق فضاء دول بيشرفونا من فتحات التسرب في المدارس من الجهل من المناطق العشوائية من واحد مخلف9 ومعندوش بال يعمل احصا كده بالليل يشوف من اللي مش بايت في البيت بييجي في باله انه يمكن وفر عشاه يمكن وفر غطاه وتكون النتيجة مزيد من البطالة ، الفقر ، البلطجة ، الجرايم ، امية، امراض .. هل الفقر هو اللي افرز هذه النوعية من الحياة ولا الحياة دي لا يمكن تنتج الا الفقر .. تنظيم الاسرة، السكان والمراة والفقر واطفال الشوارع كل دا هيكون لينا معاه النهاردة كلام مسئول
فاصل
محمد صلاح: القضية السكانية في مصر مش بس قضية تنظيم اسرة ومنع الختان انما تنمية وتعليم اعادة توزيع السكان الارتقاء بحياتهم توعية المقبلين على الزواج ، الامومة والطفولة ، معالجة الادمان..
وزارة الاسرة والسكان هي تجميع لجهود اتشكلت عبر سنين وبقت في حزمة واحدة لان كل القضايا دي مرتبطة ببعضها كلمة واحدة في ايد وزيرة الاسرة والسكان السفيرة مشيرة خطاب اللي هيكون لينا معاها النهاردة كلام ......... مسئول , ومن كلام الوزيرة مشيرة خطاب "نتمسك بشعار طفلين لكل اسرة في المرحلة المقبلة للارتقاء بالخصائص السكانية ومعالجة قضايا مثل عمالة الاطفال ومكافحة المخدرات" ، "تعديلات قانون الطفل مصرية 100% وهي نتاج عمل اللجنة التشريعية في المجلس القومي للأمومة والطفولة على مدار 5 اعوام" ، وقالت الوزيرة مشيرة خطاب "ضرورة الاهتمام بكافة العناصر الاسرة باعتبارها اخطر مؤسسة في أي دولة سواء كانت متقدمة او نامية فالاسرة عماد أي مجتمع ويجب توجيه الاهتمام لها" ، "النمو السكاني يجب ان يؤدي الى الاسراع بمعدلات النمو الاقتصادي وحينما يعرقل النمو السكاني النمو الاقتصادي فهذا يدل عل وجود مشكلة لابد من معالجتها" ، "يوجد عصابات تستغل الاطفال وتستفيد منهم ووجودها ليس لانخفاض سن المسئولية الجنائية ولكن لغياب الاهتمام بالاطفال وهدفنا استيعاب الطفل واعادته الى عائلته " .....
الوزيرة مشيرة خطاب وزيرة دبلوماسية لوزارة شعبية ما بتتعاملش فيها مع السفرا والياقات البيضا والفساتين السهرة انما مع الستات في الريف والمناطق الشعبية عالترعة وفي الحواري وتحت الكباري مع اطفال الشوارع سكانها مش سكان الزمالك وجاردن سيتي والكومباوند دول سكان المقابر والعشوائيات معركتها مع ثوابت قعدت معششة قرون النسل وتنظيمه الختان وحدوده المراة وحقوقها عمالة الاطفال وادمانهم كل القضايا دي هيكون لينا مع وزيرة الاسرة والسكان السفيرة مشيرة خطاب عنها كلام ....... مسئول
فاصل
محمد صلاح: ارحب بوزيرة الاسرة والسكان السفيرة مشيرة خطاب منورة ياسيادة الوزيرة.. انت بتفضلي يتقالك سفيرة ولا وزيرة ؟
السفيرة/ مشيرة خطاب - وزيرة الأسرة والسكان: يعني بحكم العادة بس مشيرة بتفرحني اكتر
محمد صلاح: طيب يتبادر في الذهن الاول ان كل وزارة يبقى لها مقر وكل مقريبقى عليه لافتة ايه اخبار اللافتة والمقر ؟
السفيرة مشيرة خطاب: عندنا لافتة وعندنا مقر مش لازم يبقى عندنا حاجة شياكة المهم انها حاجة تساعد على العمل وتشجع على العمل الدولة النهاردة بتوفر وبتحاول انها ترشد الانفاق فمفيش بقى الفخفخة في المقار
محمد صلاح: مفيش فخفخة عندك خالص
السفيرة/ مشيرة خطاب: لا احنا انا قاعدة في نفس المكتب وعندنا يافطة الحمد لله قدرنا نحط يافطة والشغل ماشي هو اهم حاجة ان الشغل يمشي بصرف النظر بقى انت عندك مبنى شيك ولا معندكش يعني احنا ما بنبصش للمظاهر قوي
محمد صلاح: سيادة الوزيرة وزارة الاسرة والسكان هي الوزارة المعنية بملف تنظيم الاسرة قد يكون الملف ملمّس مع وزارات اخرى الثقافة التعليم بطبيعة الحال الاوقاف وغيرها يعني ..ملف او برنامج تنظيم الاسرة بدا تقريبا من الخمسينات مر بعدة مراحل ووصل الى مراحل تتعلق بحسنين ومحمدين وحاجة ببلاش كده ونسيتي تاخدي الحباية النهاردة يعني بقى من المفردات اللي الناس بصراحة تسخر منها انت شايفة حكاية الاغاني والعناوين دي ادت لنتيجة
السفيرة/ مشيرة خطاب: احنا حققنا تقدم كبير جدا في التوعية لتنظيم الاسرة وقت ما كانت وزارة للاسرة والسكان لان دا زي ما حضرتك قلت ملف كبير وملف معقد عايز حد متفرغ له لان برضه زي ما حضرتك قلت دا متعلق بمعتقدات وعادات وتقاليد عايز تفرغ وعايز تركيز والاهداف ما بتتحققش بين يوم وليلة الناس لحد النهاردة لسه بتفتكر حسنين ومحمدين والكلام دا معناه انها اثرت فيهم
محمد صلاح: ما ممكن اثرت فيهم اللحن كان حلو كلمات لطيفة بتتغنى وكانت بتتغنى في افراح في ليلة دخلة الناس داخلة تخلف
السفيرة/ مشيرة خطاب: اه معلش ما هي لازم الناس هتخلف بس هي الفكرة ان انا بقوله فكر وانت بتاخد قرار الخلفة احنا النهاردة بنحط برنامج اعلاني جديد او حملة اعلامية جديدة بتبني على الماضي ومشكلتنا في مصر ان معندناش تراكمات احنا عايزين الاستدامة فعملنا دراسة وتقييم لكل الجهود المبذولة في هذا المجال وعندنا استراتيجية اعلامية جديدة ان شاء الله يعني تقريبا اكتملت ملامحها هننزل بيها في رمضان ونامل بقى مساندتكوا جميعا انكم تذيعو لنا هذه التنويهات لان التليفزيون من اكثر الوسائل تاثيرا في عقل ووجدان المواطن المصري
محمد صلاح: يعني انا افهم من كلام حضرتك انت شايفة ان الحملات نجحت ؟
السفيرة/ مشيرة خطاب: بص حضرتك احنا نجحنا.. ما هو احنا كان ممكن نوصل لاكتر من كده لكن مشكلتنا ان احنا في ال10 سنين اللي فاتوا معدلات تخفيض الزيادة السكانية قلت كان فيه تخفيض في الزيادة السكانية لكن المعدلات قلت فاحنا عايزين نرجع نصعد الاهتمام ونننشط وعي المواطن بخطورة الزيادة السكانية
محمد صلاح: الحملات كانت قايمة على مسائل تتعلق بالترغيب مش الترهيب يعني مكانش فيه عقاب مثلا للطفل التالت اوالرابع وكان دايما الحملات قائمة على انه التنظيم كويس علشان هيحقق كذا وكذا وكذا وحسنين احسن من محمدين مش شايفة انه الجدل حول اجراءات ربما تكون عقابية تكون مؤثرة اكتر يعني ان احنا نلزم الناس بقانون نلزم الناس باجراء؟
السفيرة/ مشيرة خطاب: طبعا ..هو الحقيقة فيه دول اسلامية اخرى الزمت الناس بقرارات زي ايران وحققت تقدم واندونيسيا وحققت تقدم والقضية دي محل نقاش كبير اللي هي الحوافز الايجابية والسلبية هي الدولة النادرة وهي بترشد الدعم من المنطقي انها تربط الدعم بعدد الاطفال في الاسرة بحيث مثلا انه ايران مثلا قالت الطفل الرابع بعد صدور سنة من صدور القانون مش هياخد أي امتيازات يبقى انا مابحرمش حد بستفيد من الامتيازات النهاردة لكن قدامك سنة لو خلفت بعد السنة دي مش هتاخد هتتحرم
محمد صلاح: دا في ايران؟
السفيرة/ مشيرة خطاب: في ايران والمفروض ان انا افكر فيه ماحنا عندنا بس اني انا فكرت حاجة وان انا اطلع بقرار حاجة تانية لازم تجس النبض هل دا يجيب نتيجة ولاّ لا
محمد صلاح: جسيت النبض ولاّ لا يا سيادة الوزيرة ؟
السفيرة/ مشيرة خطاب: جسينا طبعا انا عايزة اقول لحضرتك على حاجة انت عندك مشاكل معقدة في المجتمع المصري عندك ناس بتخلف وما بتسجلش المواليد ناس بتتجوز وما بتسجلش الزيجات فهل انت عايز تفضل عايش بصورة غير كاملة عن وضعية السكان ولاّ انت عايز تعرف انت بتتعامل مع كام شخص فهي دي الاعتبارات يعني انا في بداية عملي في المجلس القومي للطفولة والامومة لما ناس جم قالولي نتكلم على تسجيل المواليد قلت لهم ايه الكلام الفارغ دا كل المواليد في مصر بيتسجلوا النهاردة احنا اكتشفنا ان فيه قرى باكملها ما بتسجلش
محمد صلاح: ما بيسجلوش ليه ؟
السفيرة/ مشيرة خطاب: لعدة اسباب اولا البنت بتجوز صغيرة جدا يعني احنا النهاردة رفعنا السن الادنى للزواج من 16 ل18 اكتشفنا حالات البنت بتتجوز 12 و13 و14 واللي اسوا من هذا ان احنا لما جينا نقترح رفع السن الادنى زواج الفتاة ووجهنا بمعارضة اشد من المعارضة لتجريم الختان ودا بيورينا ان النظام القيمي عندنا في المجتمع محتاج نظرة انا بادعي ان انا بحب بنتي وبخاف عليها وفي نفس الوقت لازم اقول لازم اضربها او اضربه علشان هو مش فاهم وهو صغير وانا الكبير، بجّوزه وهو صغير واحط عليه مسئوليات فانا عندي محتاج ابص على القيم اللي بتحكم المجتمع مش القيم اللي انا وحضرتك بنتكلم عليها في التليفزيون او القاهرة اللي انا بنزل لقاع المجتمع واشوف ايه القيم اللي بتحكم هذا المجتمع واتعامل معاها بايجابية وباحترام وفي نفس الوقت اقدر أؤثر عليها طب عملية معقدة جدا عايزة دراسة متعمقة وانا بقول لحضرتك انا من يوم ما اتعينت في هذا المكان وشرفت بهذا المنصب انا عندي 4 حاجات تحت الوزارة القضية السكانية واخدة الاهتمام الاول ودا بناء على اهتمام السيد رئيس الجمهورية واهتمام السيد رئيس مجلس الوزراء والواقع اللي احنا عايشينه دي الاولوية المطلقة طبعا لو المواطن محسش ان فيه مشكلة عمره ما هيغير سلوكه
محمد صلاح: طب المواطن اللي بيخلف كتير مش حاسس ان في مشكلة ؟
السفيرة/ مشيرة خطاب: لا.. مش حاسس ان فيه مشكلة ودا عالم اخر كل ما المستوى الاقتصادي والاجتماعي قل كل ما حجم الاسرة زاد وعدد الاطفال زادوا ليه..؟ لانه بيرى في الطفل قيمة اقتصادية الطفل عيل يعني انا كبالغ اعوله ..ظلا .. هي الاية مقلوبة عند الاسر دي
محمد صلاح: سيادة الوزيرة الكلام دا كان شوية ايام ما كان الطفل بيشتغل في الارض وفي الزراعة دا مستمر دلوقت ؟
السفيرة/ مشيرة خطاب: دا مستمر واكتر ، احنا حصرا لاطفال العاملين طلع 2.8 تقريبا وماوصلناش للاطفال اللي بيشتغلوا لدى وماوصلناش لكل الاطفال في القطاع الزراعي وخدمات المنازل ..لا مشكلة عمالة الاطفال في مصر مشكلة كبيرة وهي اللي بتغذي الزيادة السكانية وانا بدعو الناس انها تبص على خطاب الرئيس في المؤتمر القومي للسكان هو ربط بين عمالة الاطفال وزيادة السكان ..تعديلات قانون الطفل النهاردة بتجرم حرمان الطفل من التعليم انا النهاردة بطلب من المجتمع ان هو يراقب تنفيذ هذه التعديلات
محمد صلاح: هو مين المجتمع ..المجتمع دا انا وحضرتك ووزارتك والشرطة والاجهزة الرقابية والمحافظات والمحافظين والثقافة والتعليم هودا المجتمع هو نفس المجتمع اللي خلانا نوصل ل80 مليون برضه ؟
السفيرة/ مشيرة خطاب: ما هو فيه عناصر فاعلة ومؤثرة في المجتمع اكثر من غيرها وسائل الاعلام مثلا لم بكتشف حالة ختان مثلا وبالاعلام بيقوم وما يقعدش دي بتبقى حاجة دي حاجة جيدة جدا عايزة اعمل نفس الحاجة وهي بتحصل الحمد لله النهاردة البنت اللي بتتطلق وعندها 10 سنين مادي شكلة فظيعة عايزة اعمل نفس الرجة على الاطفال اللي بيشتغلوا ومحرومين من التعليم
محمد صلاح: في الاشارات وفي الشوارع دول موجودين في كل حتة مش محتاجة مجتمع
السفيرة/ مشيرة خطاب: ومع ذلك فيه مثقفين في المجتمع وبيكتبوا في الجرايد بيدافعوا عن عمالة الاطفال وبيتهموني ان انا بقول الاطفال ما يشتغلوش وهما مش لاقيين ياكلوا ..لا ..دا الاطفال لازم يخشوا المدارس ولو الاهل مش لاقيين ياكلوا فيه وسائل اخرى غير ان هم يشغلوا اطفالهم وبقول للي بيكتب كلام زيدا روح بصفي اسر الاطفال العاملين هتلقيها 10 و16 عيل و18 عيل ليه ..؟ لان مالاب بيستغل الاطفال لو هوما بيستغلش الاطفال هيخلف اتنين ويقف زي ما حضرتك وانما بقول
محمد صلاح: طب دلوقت التناقض اللي موجود في الصورة قدامنا زي ما حضرتك بتقولي دلوقت مصدر للرزق لكن في نفس الوقت فيه حد وشفنا وحوادث موجودة يعني حد باع اولاده قتل اولاده عشان مش قادر يصرف عليهم عايز يدخلهم الجنة عشان جهنم بالنسبة له الدنيا
السفيرة/ مشيرة خطاب: بص حضرتك حد باع اولاده لا مفيش في مصر كتير بيبيع اولادها لكن هو بيبيع اولاده بصورة اخرى بيبيع اولاده انه يبعته يشتغل ان هو يديه لحد ومايهموش الولد دا يحصل له ايه المهم ان هو يقبض في اخر النهار فدي بالظبط زي ما بيبيع اولاده وبرضه الاسر اللي بتاخد ولادها ويروحوا الجمعيات يقولوا خدوا العيال دول احنا مش قادرين نصرف عليهم احنا كمجتمع لازم الاولوية تكون ان الطفل يقعد مع عيلته نساعد العيلة انها تخلي بالها على ولادها
محمد صلاح: كلام جميل وكلام معقول بس ....
السفيرة/ مشيرة خطاب: نظري عايز تقول نظري ما هو دا بيوري لك الانفصال بين النخبة وقاع المجتمع
محمد صلاح: ندخل في العملي بقى
السفيرة/ مشيرة خطاب: هو دا الكلام اللي بقوله هو دا العملي ..العملي ان انا النهاردة اساعد الاسر ..فيه قانون النهاردة يبقى اعمل على تنفيذ القانون وبعدين اساعد الاسر مفهوم النهاردة في مصر لازم يتغير دي القيم الليانا بتكلم عليها
محمد صلاح: قدمي افكار بقى ؟
السفيرة/ مشيرة خطاب: اقولك افكار في رمضان بدل ما تفرد لي موائد الرحمن خد الفلوس دي وادفع بيها مصروفات مدارس الاطفال اللي ما بيروحوش وعندنا قوائم قد كده والاسرة اللي تودي ولادها المدرسة تدفع فلوس لرب الاسرة اما ان انا ادفع اروح ادي فلوس للراجل كده غير مرتبطة باي شروط هياخدها ويتجوز واحد تانية
محمد صلاح: طب كان فيه جدل دايما حول مفهوم التنظيم والتحديد مع انه التنظيم هو التحديد والتحديد هو التنظيم انتي مخططة تدخلي ازاي في المنطقة اللي تتعلق بالالفاظ لانه دا مجتمع واضح بتفِرق فيه الالفاظ كتير ؟
السفيرة/ مشيرة خطاب: طبعا .. انا بحترم هذه الالفاظ وانا لما ابقى داخلة عشان اغير نظرة معينة او اغير اقتراب الانسان من قضية معينة لازم احترم الوضع القائم اسخر منه واشتغل من خلال الوضع القائم يبقى انت ما بتقوليش تحديد لا ما تقوليش تحديد تنظيم طب انا هاقولك تنظيم ننظم انت كل واحد بينظم الاسرة بما في ذلك اللي مخلف 16 واللي مخلف 18 هو بعد ال16 قرر يتوقف فيه واحد تاني بعد 2بيقرر يتوقف فاللي يقولي لانه ما بيظلمش الاسرة غير صادق لانه ممكن قوي نشوف حالات الست بتتجوز 14 او 16 سنة او 18 سنة وسن الانجاب لحد 40 او 45 سنة ممكن قوي تخلف 30 عيل
محمد صلاح: 30 عيل؟
السفيرة/ مشيرة خطاب: طبعا ممكن لو هو فعلا زي ما بيبقول سايبها كده هيخلف فعلا 30 لكن هو بينظم في قرارة نفسه وهو قالي وبعدين بقى انا محتاجة اني اوري16.. 18 انت شكلك ايه وولادك شكلهم ايه ومراتك شكلها ايه او مراتاتك شكلهم ايه وبص للي خلف اتنين هو شكله ايه ومراته شكلها ايه وولاده شكلها ايه وابتدي ارفع سقف طموحات المواطن المصري يقولك احنا كده كويسين يعيش عيشة غير ادمية يقولك ايه الحمد لله وكل شوية الست عمالة تخلف الحمد لله على كل حاجة بس ربنا قالى اسعى يا عبد وان اسعى معاك وانت تستحق اكتر لازم يبقى عندك احساس بالكرامة
محمد صلاح: دا هيفتح لنا مجال عن دور رجال الدين رغم انه شيخ الازهر والمفتي ووزير الاوقاف ومعظم رجال الدين اللي بيظهروا على التليفزيون والمساجد اتكلموا بشكل ايجابي عن تنظيم الاسرة لكن يظل فيه هاجس يتعلق بموقف الدين بشكل عام الفضائية حضرتك عارفة طبعا شبكة الانترنت وغيرها من وسائل الاتصال الحديثة بقى لها تاثير برضه على الناس احنا عندنا مشكلة ؟
السفيرة/ مشيرة خطاب: انت عندك رجال الدين ماتقدرش تعمم ودا بينسحب على الدين الاسلامي وعلى الدين المسيحي عندك ناس مستنيرة وناس لسه بترجع لورا المشكلة في الدين المشكلة في تفسير الدين يعني المشكلة ازاي الناس تفسر الدين
محمد صلاح: ما هو اللي بيفسر الدين رجال الدين احنا عايزين اللي هما بيرجعوا ورا دول بتتصرفوا معاهم ازاي؟
السفيرة/ مشيرة خطاب: احنا نفسنا طويل جدا بنعمل دورات تدريبية ونعمل توعية وانا ببص على اللي عملناه في الختان ..في الختان اخدنا من رجال الدين حلفاء وحضرتك ارجو انك تتابع الخطاب الديني تجاه قضية الختان الخطاب الاعلامي اختلف احنا عملنا شغل جامد جدا بمنتهى الهدوء والدبلوماسية واحترام الثقافة السائدة في المجتمع علينا صوت المناوئين للختان ووحدة الظروف الاقتصادية العالمية واللي بتتاثر بها مصر وفي ظل السلبية اللي بيتسم بيها المواطن المصري انت تبقى ماشي بتشوف طفل ماشي يشحت تديله قرش ولاّ جنيه وماتتكلمش معاه كلمة انا عايزة الناس تنخرط اكتر في مشاكل اطفال الشوارع
محمد صلاح: اديني روشتة يا سيادة الوزيرة يعني معنى ان انا دلوقت معدي ؟
السفيرة/ مشيرة خطاب: كلم خط النجدة اتكلم 16000 اتكلم مع الطفل قوله انت عاجباك العيشة دي
محمد صلاح: يعني انت شايفة ظروف المجتمع تسمح بهذا ان حدد يكلم خط النجدة ويستنى النجدة لما تيجي ؟
السفيرة/ مشيرة خطاب: ليه المكالمة مجانا
محمد صلاح: رايح شغل رايح مشوار ما انا رايح استرزق برضه
السفيرة/ مشيرة خطاب: روح مشوارك بس لم النجدة مجاني وكلم 16000 وقولهم فيه طفل في الحتة الفلانية
محمد صلاح: انا عايز اقول لحضرتك دول مش محتاجين لنجدة ما هم موجودين دا احنا لو خرجنا هنلاقي سبعتلاف في المنطقة اللي حوالينا صح ولاّ لا؟
السفيرة/ مشيرة خطاب: طيب.. انا عاوزة اقولك على حاجة اديني شوية من وقتك ورب ودا برضه جزء من الزكاة انك لما تشوف طفل اقف اتكلم معاه واتطلب16000واشِغل الطفل شوية لحد ما يجيله حد ياخده او بلغ خط النجدة وروح استخبى ورا كده ما تخليش الولد بيشوفك وشوف لو جاله حد هيلاقيه ولاّ لا 99% هيلاقي الولد اختفى
محمد صلاح: لما ياخده ايه الخطوات اللي بعد كده ؟
السفيرة/ مشيرة خطاب: اولا يا اما احطه في جمعية اهلية
محمد صلاح: دا تحت مسئوليتك واحد من ملفاتك
السفيرة/ مشيرة خطاب: اه طبعا ما هو دا اللي انا بقوله اضعف الايمان اعمل مكالمة تليفونية طبعا الايمان اللي احسن من كده اتبرع لمساعدة هؤلاء الاطفال
محمد صلاح: طب خليكي معانا لسه الكلام مخلصش ,.. لسه لكلام مخلصش؟
فاصل
محمد صلاح: سيادة الوزيرة مشيرة خطاب عندنا اشارات كده لظاهرة اطفال الشوارع نشوفها مع بعض حاليا
السفيرة/ مشيرة خطاب: قوي
محمد صلاح: نشوف التقرير
فاصل تقرير مصور
محمد صلاح: هو الفقر سبب الحياة دي ولاّ الحياة ماتجيبش الا الفقر سيادة الوزيرة
السفيرة/ مشيرة خطاب: اولا دا واقع اللي احنا شايفينه دا واقع بيعيشه اطفال كتيرة بس كان المفروض نغمي عينيهم احتراما لخصوصيتهم يعني هو" فقر الفكر" مش الفقر لوحده لان فيه ناس فقرا كتير قوي ما بيتخلوش عن ولادهم انما بيخططوا لحياتهم وبيبقى عندهم طموح فدا فقر الفكر لدى الاسر
محمد صلاح: المشكلة افراز ليها اطفال الشوارع مسال التسرب من التعليم مستمرة بقالها سنين كتيرة مع ان أي طفل بيدخل يتعلم المفروض اسمه موجود وعنوانه موجود لما بيتسرب بيغيب وبعد كده ينقطع ما بتتمش المتابعة ليه بشكل جدي وتحصل عندنا بعد كده ظاهرة نتكلم عنها ؟
السفيرة/ مشيرة خطاب: بص حضرتك هو موضوع التسرب من التعليم ابتدى ياخد اهتمام عن الاول وبرضه عايزة اقول انه الفضل بيرجع للتركيز على قضايا الاطفال وعمالة الاطفال واطفال الشوارع انه وزير التربية والتعليم كتر خيره عمل ادارة للتسرب من التعليم على مستوى المركزي والمفروض هيعمل ادرات على المستوى الاقليمي او المحلي كثافة الفصول ارجع تاني لتداعيات الكثافة السكانية كثافة الفصول الفصل اللي فيه 100 او 150 والحصة 45 دقيقة المدرس مش هيعرف يرصد عدد الاطفال مين اللي غايبين ولو اننا وصلنا لتقنيات في منشية ناصر احنا عندنا تجربة رائعة في منشية ناصر مع المدارس ان المدرس بيقسم الفصل لمجموعات وكل مجموعة بتشوف الحضور والغياب وبدل ما تقعد تنده على الولاد كلهم بتنده على 5 اسامي يقولك فلان غايب وفلان غايب وفلان غايب برضه بنحفز المدرسين انهما يروحوا ورا الاطفال اللي غايبين دور الجمعيات الاهلية هنا مهمة قوي لو جمعيات اهلية بتشتغل على اطفال الشوارع او بتشتغل على عمالة الاطفال لازم تشتغل على التسرب من التعليم لان دا هو الحنفية لرصد التسرب من التعليم وانا مش هاركز على كل انحاء الجمهورية انا هركز على المناطق الفقيرة اللي قاطنيها لايروا جدوى للتعليم لكن موضوع التسرب من التعليم دا لازم ياخد اهتمامك اكتر لانه اهدار لموارد الدولة التي تنفق على التعليم
محمد صلاح: لما اتعمل اخط الساخن للطفل اللي حد بيستغله يعني البعض قال انه هيعمل تفسخ اسري لانه الطفل هيبلغ عن اهله الخط عمل تفسخ
السفيرة/ مشيرة خطاب: ابدا اطلاقا بالعكس دا زاد من التماسك الاسري بالعكس البالغين او اولياء الامور اتصلوا بينا اكتر بكتير من الاطفال اللي اتصلوا بينا ..الاطفال اللي اتصلوا بينا بلغوا عن اسرهم يعني تكاد تكون نسبة لا تذكر ..الاتصالات اللي جات لنا من اولياء الامور هي اللي خلتنا نعمل برنامج للارشاد الاسري وكان الفضل في هذا يرجع للسيدة الفاضلة سوزان مبارك وهي في المجلس لاعلان خطة العمل الوطنية للقضاء على عمالة الاطفال فبالصدفة وكانت زيارة غير مخطط لها اتفضلي حضرتك تبصي على خط النجدة وهي داخلة خط النجدة رن التليفون فقلتها طب ما حضرتك تردي على المكالمة فخدت التليفون وردت على المكالمة طلعت ام بتشتكي انها مش عارفة تتعامل مع ولادها ولما ردت عليها قالت لها مين اللي بيتكلم قالت لها انا سوزان مبارك فالست افتكرتها بتضحك عليها بعد ما حطت السماعة قالت ما تعملوا برنامج لمساعدة الاسر دي وفعلا النهاردة انا عندي شهريا بعمل جلسة للاسر اللي بتشتكي على خط النجدة وبنجيب معاهم دكتور نفسي يقعد يسمع ويساعدهم وحلينا مشاكل كتير جدا وحلينا امراض اجتماعية كبيرة جدا احنا هدفنا من خط النجدة من تعديلات قانون الطفل من كل السياسة اللي احنا بنشتغل عليها دعم الاسرة ..المشكلة السكانية هتتحل لو الاسرة قامت بواجباتها تجاه افرادها
محمد صلاح: طب مش ممكن ما اسالكيش على مسالة تخصيص مقاعد للمراة في البرلمان ايه رايك في الفكرة دي ؟
السفيرة/ مشيرة خطاب: هو مش حل امثل لكن في ظل الظروف القائمة هو اقل ما يمكن ان تقدمه لاصلاح وضع معووج المراة نصف المجتمع وهي ممثلة بنسبة هزيلة جدا في مجلس الشعب فانت بتحاول تحل طبعا المقاعد الاضافية دي مش هتحسن النسبة قوي لان بتحسب النسبة بالنسبة للمقاعد الكلية دا اجراء مؤقت مش هيستمر الى الابد وهينتهي بعد فترة معينة كاجراء مؤقت يجب ان نضمن نجاحه لان كان عندنا قبل كده حصة مخصصة للمرة ولما اتلغت نزلنا لاقل من نسبة تمثيل المراة انا النهاردة بشتغل في ظل مناخ ثقافي صعب جدا وانا شفت المقالة اللي كتبتها الكاتبة فريدة النقاش في الاهالي بتاريخ 3 يونيو وانا باضم صوتي لصوتها وبضم صوتي لمقالات كتبتها الاستاذة لميس الحديدي برضه عن وضع المراة وكتبها الاستاذ جابر عصفور وانا بطلب الناس تكتب اكتر عن هذه القضية لان احنا عايشين تناقض كبير بين تقدم مادي وتراجع فكري وتراجع ثقافي كله موجه ضد المراة ولن يدفع التمن احد الا المجتمع ككل والرجال في المقدمة فانا النهاردة بحاول اصلح الوضع المعوج ان انا امكن المراة لكن لازم يكون فيه برنامج متكامل يستفيد من اخفاق التجربة السابقة اللي خصصت حصة للمراة واضمن انه اول ادفع بنماذج اثبتت وجودها وليها نجاح وهتاخد اصوات انتخابات حرة نزيهة كوادر هتقنع المجتمع بقيمة اسهام المراة في نفس الوقت اللي الكوادر دي عندها خدمات معاونة زي ما بنشوف في برلمانات العالم يبقى فيه خدمات معاونة لبرلمانيين المعلومات ويعرضوا عليهم المستجدات ويقدموا لهم النصيحة وهلم جرا ودا طبعا المفروض يبقى موجود للرجال والنساء انما انا بما ان الرجال في وضع افضل من النساء
محمد صلاح: مش كتير قوي .
السفيرة/ مشيرة خطاب: هما الاغلبية يعني هما 90 % او 91 % يعني فانا
محمد صلاح: لا انا بتكلم على الرجال بشكل عام مش في البرلمان .
السفيرة/ مشيرة خطاب: لا انا بتكلم على البرلمان..وبعدين اجهز صف تاني من الكوادر اللي هتتبوأ هذه المقاعد وفي نفس الوقت اعمل على تغيير الثقافة السائدة الثقافة اللي بتحكم على المراة بشكلها وبتعامل المراة على انها مجرد جسد وبتعامل المراة على انها بتدفعه للرذيلة وتحرض على الفسق وان الرجل لا حول له ولا قوة وان عنده غرائز وساعدوه يا جماعة يتحكم في هذه الغرائز دا وضع فيه اهانة للرجل بصراحة انا بشوف وضع مش مظبوط فانا لازم اصلح هذا المناخ وارجع تاني للستينيات الفترة اللي انا اتربيت فيها وضع المراة ثقافيا انه افضل بكتير من وضعها النهاردة ولما اعدل الكفة انا ساعتها هاسحب هذه التدابير المؤقتة بس وانا بابدا فيها من النهاردة ابقى عارفة انها تدابير مؤقتة والدولة عليها التزام على فكرة عشان الناس اللي بتتكلم عن القانونية وعدم القانونية والدستورية وعدم الدستورية الدولة تحت التزام قانوني باتخاذ تدابير تمييز ايجابي لصالح الفئات المهمشة التي يتم التمييز ضدها وبشرط ان تكون هذه التدابير مؤقتة لحين انتهاء التمييز
محمد صلاح: الاهتمام بالخصائص السكانية واضح انه مسالة مش سهلة مش زر هندوس عليه فينصلح الحال محتاجين شغل كتير, قالت وزيرة الاسرة والسكان السيدة مشيرة خطاب كلامها ولما تتكلم جناب السفيرة معالي الوزيرة السيدة مشيرة يارب يكون كان كلام جميل معقول كلام مقبول بس اكيد كان كلام .......... مسئول
خلص الكلام نلتقي في الحلقة القادمة