كلام مسئول

محمد صلاح: مساء الخير وكل سنة وانتوا طيبين رمضان جانا اغنية جميلة بتغذي الروح لكن على ارض الواقع مجيء شهر رمضان عند الاسرة المصرية يعني غذاء المعدة رمضان كان بيجي فجاة تلقى كل حاجة ولعت زحام في الشوارع في السوبر ماركت عند البقالين خطط طوارئ للمرور الحمد لله ان رمضان جانا السنة دي بعيد عن المدارس والجامعات شايفين حركة جامدة تاكيدات ان الاسعار زي ما هي ..كل ربة بيت عندها قايمة باللي غلي سكر زيت لحمة رز ازمات بتتكرر مخاوف حوالبن رغيف العيش وفرته جودته الطوابيرانبوبة البوتاجاز برضه توفرها سعرها مفيش كلام رمضان شهر كريم محدش بيبخل او ييوفر فيه كل واحد بقى على حسب مقدرته بنشتري يمكن اكتر من اللازم الناس كلها حتى الغلابة بيتبشرقوا شوية كده حتى في رمضان في الاحصائيات الاسرة المصرية تنفق في رمضان قد اللي بتصرفه في 3 او 4 اشهر ماشي يكاد العرف يكون قانون نرفع له كمان القبعة شهر رمضان منظومة لوحده فعلا شهر غير كل الشهور بتعكس كل اوضاع الاسرة المصرية يمكن احنا حبين بقى نطمن على نفسنا شوية نطمن ان احنا هناخد السلعة بتمنها من غير جشع من غير ما يقولولنا عايزين ترجعوا بقى نظام التسعيرة الجبرية السوق الحرمش معناه الفوضى دا معناه الضمانات منع الاحتكار حماية المستهلك السلع الغذائية مهمة في رمضان عايزين نعرف قد ايه متوفرة وداخل الجمعيات والمنظمات الاهلية موائد الرحمن القمح وبطاقات التموين الذكية الاسر الاولى بالرعاية خط الفقر وعلى فين ياخط مودينا رغم مسئوليات وزارات كتيرة عن دي كلها على بعضها يمكن مسئولية الحكومة كلها وزارة التضامن الاجتماعي وبعد ما جمعت في اصل تكوينها وزارة التموين والشئون الاجتماعية اصبحت الوزارة الاخطر انشغالا بمتوسطي ومحدودي الدخل في البلد هما دول اللي بيشكلوا الشعب شهر رمضان في الاكل والشرب معدة المصريين الاسر الاكثر احتياجا موائد الرحمن رغيف العيش الدعم وسنينه كل دي موضوعات هيكون لينا عنها النهاردة كلام ....... مسئول
فاصل
محمد صلاح: والله بعودة يا رمضان لكن الاسعار غليت الناس بتدور على الاسعار المنخفضة لسلع المدعومة اللي حصل من ساعة ما وزارة التضامن الاجتماعي اتعملت ييجي من اربع سنين كده هل الوزارة نجحت في عمل التضامن دا في صياغة عقد اجتماعي جديد تشارك فيه الحكومة والقطاع الخاص هل اتحلت معضلة الدعم الازلية دعم عيني ولاّ دعم مادي الدعم لمستحقيه ولا كلنا كده على بعض حسنت الوزارة مستوى الحياة بحجة ان الفقرا قلّوا والمرتاحين زادوا ولاّ العكس بطاقات التموين بعد ما كنا نسيناها من سنين رجعت تاني بس ذكية يا ترى ذكاءها دا درجته وصلت لكام وزير التضامن الاجتماعي د علي مصيلحي هيكون لينا معاه كلام ........ مسئول
ومن كلام دعلي مصيلحي "الاحتياطي الاستراتيجي من القمح 2.3 مليون طن موجودة في الداخل والتعاقدات تكفي حاجة الاستهلاك" ، "مشروع بطاقات التموين الذكية سيرى النور خلال الفترة المقبلة حيث يتم حاليا ميكنة كافة البيانات المتعلقة بالمواليد والتي سيستفيد منها 62 مليون مواطن باجمالي 11.5 مليون بطاقة" ، "الرقابة التموينية ستاخذ في الفترة المقبلة اتجاهات مؤثرة ولصالح المستهلكين ومن اهمها توفير منافذ توزيع الخبز وزيادة حصص بعض المخابز في المناطق المزدحمة بالسكان اضافة الى دفع سيارات كبيرة محملة بانابيب البوتاجاز في الاماكن العامة وزيادة عمل العاملين بالادارات التموينية التابعة لتلك المناطق" ، " الوزارة في طريقها لتعميم تجربة الكوبونات لتوزيع العيش والبوتاجاز فتلك الكوبونات هي الطريق المثلى لضمان حقوق المواطن وفرض الانضباط في المنظومة التموينية" ,معدل استهلاكنا للغذا خلال شهر رمضان بيرتفع بنسبة 30% عن المعدلات الطبيعية احتياطات مصر من السلع التموينية تكفي من 5 الى 9 شهور احنا طبعا بعاد حبتين يعني عن حكاية الاكتفاء الذاتي يمكن الانتاج اللي بناكله يعني توفير السلع في رمضان وباسعار مش هنقول مخفضة لكن عادلة او معقولة الافران رغيف العيش لسه ما وصلناش بقى لكعك لعيد والبسكويت انابيب البوتاجاز الخضار واللحمة احتياجات الاسرة المصرية في شهر هيكون لينا عنها مع وزير التضامن الاجتماعي د علي مصيلحي كلام ...... مسئول
فاصل
محمد صلاح: ارحب بوزير التضامن الاجتماعي د علي مصيلحي كل سنة وانت طيب.. سيادة الوزيرعايزين نطمن منك كده في البداية على موضوع مطبخنا في رمضان اخباره ايه ؟
د/ على مصيلحي – وزير التضامن الاجتماعي: بناء على اللي نعمله والمتاح والموجود انا بطمن كل السادة المشاهدين ان كافة السلع الاساسية تم العمل على توفيرها وهي متوفرة تم التنسيق والتعاون بين كل الوزارات المعنية ودي مهم جدا ان احنا بنتكلم ان الحكومة بتشتغل كلها مع بعض وزارة التجارة والصناعة وزارة الاستثمار وزارة التضامن في الاجتماع الشهر الماضي في مجلس الوزراء كان البند الاساسي هو توفير احتياجات رمضان بحيث يكون سواء مستوى المخزون الموجود بالاضافة الى التنسيق مع الغرف التجارية مع شركات قطاع الاعمال مع القطاع الخاص بحيث يكون هناك منافسة شريفة في عرض السلع بهدف ان احنا عارفين انه في موسم رمضان وفي مثل هذا الشهر الفضيل بيزيد الاستهلاك وبالتالي ما ينفعش ان احنا نسيب الموضوع والسوق حساس جدا لو زاد الاستهلاك والعرض لا يتناسب مع الطلب بتلاقي على طول الازمة والسعر واختفاء السلع الامور اعلى بكتير جدا من انك انت تخطط لها وبتبقى فرصة للمنتجين بسبب كل منتج عايز يبيع حاجته وفي نفس الوقت بالنسبة للمستهلك لكن احنا لازم نقتصد ليس فقط عشان تقليل الاستهلاك لكن عشان يبقى عندنا ترشيد في البيت المصري وخاصة المناسبات الكريمة زي رمضان
محمد صلاح: سيادة الوزير كمواطن انت شايف ان الناس بتحس رمضان زي ما يكون يعني انت كوزير اتكلمت ان الناس بتحس انه كان رمضان جه فجاة يعني بمجرد ان الرؤية بتعلن الناس بتنزل تجيب بقى الزبادي وتقف على طوابير العيش وتشوف انبوبة البوتاجاز اخبارها ايه دا بيتعبك على المستوى العملي؟
د/ على مصيلحي: كلام حضرتك صح بس دي جزء من طبيعتنا ان احنا عارفين ان رمضان جاي وعارفين كل حاجة وكل دا موجود ولكن دايما في الشخصية المصرية ان احنا بنشحذ الهمة بتاعتنا قبل الموضوع على طول بس اتعودنا على كده ويجب ان نحب اللي احنا اتعودنا عليه وفي الاخر بيحقق الغرض بتاعه ومش هنقدر نقول بقى هنستعير الشخصيات التانية اللي بتقعد تخطط للموضوع قبليها ب3 اشهر وقبليها ب6 اسابيع احنا مش كده انما دائما تيجي قبل المدارس نفس العملية تيجي قبل العيد الكبير انما بنطمن الناس ان كل السلع متوفرة
محمد صلاح: طب خلينا نتكلم بقى في الاسعار سيادة الوزير زمان في فترة سابقة كان المفروض انه الاسعار بتتحدد بحسب الدخول يعني عن طريق التحكم في الاسعار التسعيرة الجبرية دلوقت الاسعار حرة والدخول مش حرة خالص انت كمسئول عن توفير السلع للناس موفرها انت مش مسئول عن الدخول صحيح بس انت عضو في الحكومة اللي بيفترض انها توفر دخول عشان الناس تعرف تشتري السلع اللي انت بتوفرها يعني تحل المعضلة دي ازاي ؟
د/ على مصيلحي: اولا نتكلم في اساس تراجع مفهوم التسعيرة الجبرية وكلنا عارفين انه كان نظام التخطيط المركزي وملكية دولة لكل وسائل الانتاج واتحكم في كل الامور حصل تغير في النظام الاقتصادي وارتضينا بنظام السوق الحر بما له من مميزات وما عليه من مآخذ اهمية تواكب الدخول مع الاسعار اعتقد ان كلنا نعرف ان في البرنامج الانتخابي لسيادة الرئيس كان هناك تعهد بمضاعفة الاجور وخاصة بالنسبة للموظفين الحكوميين وهما اكتر الناس اللي بيشعروا بعدم الاتزان اللي حضرتك قلت عليه بسبب القطاع الخاص في القطاع الخاص بتتحكم برضه اجورهم عن طريق العرض والطلب وعن طريق مراعاة الارتفاع في اسعار تكلفة المعيشة هذه المعادلة هتفضل موجودة وهناك توجه حدث زيادة ليست كما نتمناها في الاجور ولكن بتعمل الدولة جاهدة على زيادة الاجور حتى في الازمة الاقتصادية اللي احنا بنمر بيها كلها والعالم بيمر بيها وجه سيادة الرئيس بزيادة العلاوة 10% صحيح بنقول ان فيه معدلات تضخم وكانت اكتر من 10%
محمد صلاح: الناس تعمل ايه؟
د/ على مصيلحي: انا من وجهة نظري هناك نوع من رؤية للاقتصاد نوع من رؤية لتقليل الفاقد نوع من الرؤية لاهمية الموائمة اللي حاصل كمان بالاضافة للدخول وعدم اتزانها مع قيمة الاسعار وكذلك التطلع للسلع الاستهلاكية الغالية للاستهلاك اللي حضرتك تعلمه جيدا قد يكون غير واجب
محمد صلاح: انت شايف ان بعض الاسر تستهلك اللي المفروض ما تستهلكوش؟
د/ على مصيلحي: انا من وجهة نظري ظاهرة قد يكون لها ميزة ولكن ضاغطة على انفاق الاسرة زي التليفون المحمول لما نوصل النهاردة ل45 مليون يعني تقريبا عندنا 17 مليون اسرة اعلى من معدل 2 تليفون لكل اسرة حتى لو كنا بنقول بالاشتراك ولاّ ب5 جنيه ولاّ ب10 جنيه ما هو برضه نوع من الانفاق لما نيجي بقى نتكلم في النهاردة لما كنا بنعمل بحوث الاسرة كنا بنتكلم عن السلع المعمرة اللي احنا زي التلاجة والبوتاجاز والغسالة لم تعد هذه السلع تمثل أي نوع من المؤشرات ان انا اقول هو قادر او غير قادر او فقير ما بقاش ..دلوقت مابقاش النقطة دي اللي نستغرب له التليفون الثابت استهلاكه هو ابتدا انه يبقى ظاهرة انه لو اسرة دخلها قليل هتجد ان التليفون الثابت هو يا دوب الاشتراك الكهربا لا تزال مؤشر بتمثل درجة الاستهلاك انما الحق يقال هناك محاولة جادة من الحكومة لمواكبة الدخول مع تكلفة المعيشة
محمد صلاح: طب خلينا نتكلم في الاجراءات او السياسات اللي ممكن انت في وزارتك تاخدها علشان تعمل نوع من التوازن نتكلم على تجربتين تجربة معارض المستلزمات وتجربة الجمعيات الاستهلاكية ؟
د/ على مصيلحي: معارض المستلزمات مستلزمات رمضان او غيره المدارس ظاهرة جديدة وفعلا بتحل المشكلة انه فيه نوع من المنافسة فبيقللوا شوية تجار الاسعار المجمعهات الاستهلاكية كانت زمان بتوفر بعض السلع اللي مكانتش موجودة في الخارج يعني فاكرين كلنا فيه فراخ في الجمعية فنجري نجيب والبيض لانه مكانش فيه بيض برة اصلا دلوقت الجمعيات دي فيها نفس السلع اللي تقريبا موجودة برة ولكن الاسعار مش فارقة كتير برضه نتكلم عن الجمعيات الاستهلاكية النهاردة وخاصة الفئات الاكثر احتياجا لما نتكلم عن اللحمة المجمدة لما نتكلم عن بيع بسعر الجملة بالذات في الزيت الحر او السكر الحر او المسلي الحر او المكرونة او الحاجات الاساسية النهاردة على قد ما كان في لحظة من اللحظات ودا الكلام دا من 5 او 10 سنين كان هناك توجه لعدم وجود جدوى من للجمعيات الاستهلاكية الحق يقال اصبح هناك جدوى الان وخاصة بالنسبة للمناطق الشعبية والمناطق الاكثر احتياج ود محمود محي الدين احد الشركات القابضة اللي تتبع وزارة الاستثمار عرض منذ عامين تقريبا خطة لتطويرها واحنا بننسق معاهم في كافة المواسم يعني مثلا لما نيجي ندخل على العيد الكبير بنوفر الخرفان الحية بنوفر الخرفان المدبوحة بنوفر لما نعوز نستورد 30 طن الى 100 طن ..احنا بنتكلم مثلا في لحوم مجمدة واللحوم المجمدة من اعلى جودة لحوم لما نتكلم عن لحوم برازيلي او ارجنتيني او من السودان او من المراعي من اعلى جودة لحوم ولكن عشان تيجي بالمراكب لا يمكن تيجي الا عن طريق التجميد انما هناك ثقافة للمستهلك عايز اللحمة البلدي
محمد صلاح: ما هي بتطلع حاجات اللحمة من البرازيل فيها مش عارف ايه
د/ على مصيلحي: بامانة وانا بقول من هذا البرنامج هناك نوع من الرقابة الجامدة جدا سواء في اثناء الدبح في المنشا او الكشف البيطري والصحي والامور دي لا يوجد أي خلل في هذا الموضوع ولكن نفسي ان احنا من الثقافة بتاعتنا ان برة مفيش الا كله مجمد بره مفيش تاخدها تشتغل بيها احنا بنتكلم على لحمة معروضة من بين 15 جنيه و18 جنيه ولحوم بقى بنجيبها حية ثم تندبح وتعرض ما بين 28 جنيه و30 جنيه لو مفيش المنافذ دي هتتسرب هذه الامور للقطاع الخاص وبالتالي مش هيفرق معاه انها جايبها بلدي ولا جايبها مستوردة وهتتباع بالاسعار العادية فتعتبر من احد الاليات لضبط السوق وخاصة في الساع الاساسية والمناطق الشعبية مفيش داعي ان احنا نعمل مجمع استهلاكي في الزمالك مفيش داعي نعمل مجمع استهلاكي في منطقة قادرة انما النهاردة لما نتكلم في شبرا النهاردة لسه ناس اعضاء مجلس شعب كانوا معايا النهاردة عايزين نبيع الاسماك واللحوم المجمدة في القرى بقت تمثل منفذ جيد لتوفير مثل هذه السلع باسعار مقبولة ولكن في الاخر لو المجمعات مقدرتش تحافظ بس على عدم خسارة طب ما فيه تهديد للامان اللي موجود فيها وتهديد لاستمرار العمل النهاردة نهدف لهامش ربح مقبول وبالتالي نستطيع ان نعطي سعر للبيع بس برضه اللي حضرتك قلته في البيع في الشوادر ومجمعات الجملة اثناء المواسم مهمة جدا اللي هي معارض المستلزمات بتؤثر تاثير جامد جدا ليس فقط على المستهلك ولكن لما التاجر وبالذات تاجر التجزئة يشعر ان المواطن والمستهلك هيستطيع انه يحصل على السلعة بتاعته بسعر مقبول هو نفسه لا يبالغ في السعر
محمد صلاح: وبالتالي تجمع اكثر من تاجر في نفس المكان هتبقى الاسعار اقل ؟
د/ على مصيلحي: بالظبط.. في المناسبات دخول المدارس او دخول رمضان او العيد الكبير او المناسبات اللي بتحصل في بعض المحافظات مولد معين او مناسبة معينة فيها تجمع وفيها كذا اثبتت التجربة انها احد الاليات الجيدة للحد من المبالغة وعدم ترك السوق بطريقة غير منضبطة
محمد صلاح: نتكلم عن انبوبة البوتاجاز اللي عنده غاز ريح دماغه لكن تظل الانبوبة اكتر من سعر على حسب المنطقة اللي بتتباع فيها مسالة الامان ومش الامان يعني يمكن وزارة البترول ترجع فيها لكن المفروض فيه اجهزة قياس صناعي ورقابة طمنا عل الانبوبة يا سيادة الوزير
د/ على مصيلحي: من سنتين تقريبا كان حصل نوع من عدم الانضباط في استيراد المكونات وخاصة الصمامات بتاعة الانابيب
محمد صلاح: اه كانت بتفرقع .
د/ على مصيلحي: وتم اخذ القرار على مستوى مجلس الوزراء وزارة الانتاج الحربي و الهيئة العربية للتصنيع هما الجهتين المسئولتين فقط مصرح لهم بالتعامل في هذا الموضوع او أي مستورد بيستورد الصمام والامان كامل وبالتالي يكونو مؤمن من الشركة اللي صدرته كان الاول كان بيقولوا متعود يجيبوا شوية حاجات من هنا ومن هنا ويجمع فانا باؤمن ذلك وتم قرار ان عمر الانبوبة لا يزيد عن 25 سنة وتم تدمير النهاردة مليون انبوبة في دورة مع وزارة البترول
محمد صلاح: دا بالنسبة للامان بس لسه استخدام الانبوبة من غير القائمين عليها سئ جدا لسه بنشوف الانبوبة اللي بتتحدف من العربية .
د/ على مصيلحي: دا جزء من الثقافة وهنا بقى النقطة الخطيرة وحضرتك قلتها ان السعر موجود في كل منطقة تبع المنطقة ودا يجب الا يكون لان دي سلع مسعرة سلع مدعمة ويجب ان تصل للمواطن في حدود ال5 جنيه في بيته بمعنى اصح لو خدها من مستودع بنتكلم في 3.75 جنيه او 4 جنيه لو استلمها في بيته 5 جنيه انا عارف انا بتسلم في بعض المناطق ب7 و8 وفي بعض الاوقات 10 جنيه ودا تم دراسته لسبب ان اخر حلقة في التامين وزارة البترول مامنة احتياطيات كويسة جدا من البوتاجاز مع ان جزء كبير جدا حوالي 50% منه بنستورده و50% بيبقى محلي ثم عندنا محطات التجميع وبطاقة كافية جدا ثم المستودعات الكبيرة والتخزين موجود والاحتياطي على مستوى كل محافظة بنيجي في اخر حلقة وهي حلقة التوزيع للمستهلك النهاردة بيجري دراسة للجنة العليا المشتركة ما بين وزارة التضامن ووزارة البترول بنعيد تنظيم عملية التوزيع سواء بدعم التوزيع الشركات اللي قايمة سواء بوتاجاز او كايرو جاز او شركات دي او تقنين اوضاع الموزعين يعني النهاردة بنيجي نصطدم بثقافة معينة راجل بياكل عيش وراجل انا معنديش مانع ياكل عيش بس عندي مانع انه ما يكونش معتمد ويكون عارف انه متاخد من انه مستودع فالحلقة الاخيرة دي اكبر واحدة تم الانتهاء منها بحيث النهاردة هيبقى فيه قواعد لعمل في التوزيع لسبب لما حضرتك تكون معرف ولك تصريح حتى لو حصل خطأ المستهلك يستطيع انه يتداركه فيه جزء كبير منه مش عايز نصدم المواطنين بنيجي مع الراجل الضعيف بيبقى عندنا نوع من ودا احنا كشعور مصري متميز جدا بس مش عايزين يصعب علينا لما الراجل يكون استلم الانابيب وراح خزنها زي ما حصل في الشتا اللي فات وابتدا يحصل ازمة مع ان الانتاج كان زايد 7% وبنيجي نلاقي انه مجموعة من المنتفعين وليس لهم حق في ذلك يعملوا لنا ازمة في منطقة في الجيزة
محمد صلاح: ما هم عملوا ازمة الي عانى منها المواطنين مين يحاسبهم ؟
د/ على مصيلحي: عايزين المواطنين لما نيجي نعمل بقى سجل ونسجل المواطنين مع الموزعين وكذا ويبقى فيه نوع من التواصل ما بينا وبين المواطن يبقى عنده رغبة في انه لو حصل خطأ يبلغنا نقدر نحاسب الموزع نقدر وان شاء الله قريب يمكن بعد رمضان والعيد هنكون جاهزين بحيث نبتدي في مناطق معينة نبتدي تنظيم ولاول مرة الحلقة الاخيرة من انبوبة البوتاجاز يحيث تبقى عارف مين اللي هيجيب لك الانبوبة او اذا كنت انت هتشتريها تبقى هتشتريها من أي مستودع
محمد صلاح: يافندم مش عارف اقولك ايه ..احنا بنعمل كيميا يعني فيه انبوبة بوتاجاز بس هي مدعومة
د/ على مصيلحي: شبكة توزيع البوتاجاز احنا بنتكلم في مليون اسطوانة في اليوم فاحنا مش بنتكلم في سلعة بسيطة ومدعمة جامد جدا وارجو ان الناس تسمعني اذا كان بيتباع ب4 جنيه ولا ب5 جنيه هي تكلفتها 45 جنيه على الدولة
محمد صلاح: بعد رمضان هنشوف موضوع الانبوبة ..سيادة الوزير خليك معانا لسه الكلام مخلصش
فاصل
محمد صلاح: كل الموضوعات اللي بنتكلم عليها من بين الموضوعات اللي بتهم ملايين المواطنين بطاقة التموين سيادة الوزيرانت عملت فكرة البطاقة الذكية تختلف ايه عن البطاقة اللي فاتت هي مكانتش ذكية.. غبية يعني ؟
د/ على مصيلحي: البطاقة الورقية اوالقديمة لها قصور في متابعة ما يتم صرفه من البقال التمويني نفترض المتوسط عنده 800 بطاقة الف بطاقة فبناء على عدد البطاقات اللي هو بيصرفها شهريا بيتم توريد ، في الوضع الورقي حضرتك رحت صرفت مارحتش صرفت هو خدهم ولذلك نسمع الحق دا سوق الاربع ولا سوق التلات زيت التموين بيتباع سكر ايام ما كان السكر التمويني اسمر شويتين مقدرش اصرف بقيمة 900 بطاقة وهوعنده 100 بطاقة ..عنده 1000 اصرف له كل شهر 1000 ، ميزة البطاقة الذكية انها زي كارت الائتمان اللي عند حضرتك بس موجود فيها ذاكرة ومعالج لهذه زي اللي فيها pin code دلوقت ابتدت برضه فيها نوع من ال intelligenceاو الذكاء فيها عشان يتاكد ان هو انت فالنقطة النهاردة ان وجود مثل هذه التقنيات بتسمح لنا بايه ان الكميات اللي بتخص حضرتك زي موجودة في البطاقة عند الافراد يبقى كام كيلو سكر يبقى موجودة في الذاكرة بتاعة البطاقة كل اللي عملناه ان البطاقة اتحولت لهذه الصورة الالكترونية بقى عند البقال جهاز سلبي مش موصل بشبكة ولا غيره جهاز صغير له فتحتين بقى فيه كارت للبقال وبقى فيه كارت للمواطن ..المواطن بيحط الكارت بتاعه من ناحية النهاردة 11 محافظة بقت مميكنة وداخلين على الانتهاء من الباقي والبقال بيحط من الناحية التانية والمواطن له كود هو يعرفه من 3 ارقام بيروح مدخله بيروح منقول الكمية اللي تخص المواطن الى كارت البقال ويروح طالع كده ورقة زي الفاتورة الصغيرة كذا كيلو كذا كيلو قدام المواطن بيروح البقال مديهمله ويروح طالع ويقولوا تدفع مبلغ كذا ..في برضه بعض البقالين التموينيين في البطاقة الورقية ولغاية النهاردة فيه شكاوى في هذا الموضوع بدل ما يدفع الراجل يقوله ادفع 40 جنيه يقوله 50 جنيه والراجل مواطن بسيط فالنهاردة بتطلع له كمية كذا فالمفروض يدفع كذا الاهم من دا بالاضافة الى ضبط حق المواطن انا النهاردة اخرالشهر باجي اشوف كارت البقال دا بديله الكمية اللي هو صرفها كاني باعمل اعادة ملء للمخزون بتاع البقال بناء على ما تم صرفه وعلى هذا الاساس البقال التمويني اللي كان بيجري وراه بيبقى بقال تمويني من غير ما ياخد أي اتعاب وهو كان بيتبقى عنده كميات النهاردة بنديله جنيه على كل صرفية كل بطاقة في الشهر حتى انه يستطيع انه يخلي فيه الاعباء اللوجستية اللي هو هذا الموضوع ادى الى ايه ادى لما جربنا في اول محافظة السويس وفرنا ما بين 15 و20% من الكمية التوفير دا هناخد 10% النهاردة البطاقات بتتكلف 7.8 مليار في السنة يعني بنتكلم في 700 او 800 مليون جنيه يعني بنتكلم في مليار اذا هذا التوفير وفر للدولة اللي هي بتصرف على كل مصادر الامور التانية النظام نفسه نظام بسيط انما طبع النقطة الخطيرة ان احنا ان الناس ابتدت تقول ياعم ايه دخل البطاقة الذكية في الزيت ايه دخل دا في السكر ..السخرية في الصحافة بامانة بالنسبة لي كان مؤلم ولكن كنت اتوقع انه بعد شوية هنجد انه كتير من الناس هتشجع هذا الموضوع المحافظة اللي متاخرة شوية وكنا حاطين اولويات السكر في المتوسط ففي كذا عشان بس طريقة الادارة استعجلنا في هذا الموضوع
محمد صلاح: والست الغلبانة ام طرحة سودة والراجل ابو جلابية وطاقية عادي بيقدر يروح ويحط ؟
د/ على مصيلحي: كنا بندي المثال دا للناس اللي معاها التليفون المحمول وعارفة يعني ايه 1 2 3 وعارفة النهاردة بقى التليفون المحمول زي ما قلنا في اول برنامج 45 مليون مشترك اذن موضوع التغيير الثقافي للمواطن طالما فيها فايدته هو النهاردة بقى معاه ورقة بيقوله تدفع كذا وخلي كذا فحتى لوكان مش عايزالكمية دي هو بمحض ارادته وليس باجبار ان هو بيديها للبقال اذن هى حرية للمواطن واحقاق لحقه وقدرة على تنفيذ هذا الحق بطاقة التموين وتشجيعنا والتحرك الكارت او البطاقة الذكية فدا اتاح لنا مجال اجمل بكتير نتيجة ان قلنا البطاقة دي ممكن يتعمل عليها برمجة او يتحط عليها اكتر من خدمة ابتدينا نحط عليها معاش الضمان نفس بنتكلم مع وزارة الصحة بحيث يتحط عليها كذلك التامين الصحي
محمد صلاح: يعني هنبقى زي اوروبا والدول المتقدمة معاك بطاقة بتصرف بيها لو لك مستلزمات ؟
د/ على مصيلحي: عارف حضرتك اللي قلته دا تحول موضوعي جدا في ان المواطن يكون معاه حقه المشكلة في البوتاجاز ايه..؟ ان معظمنا مامعوش حقه ..المشكلة في العيش ايه ان المواطن ما يعرفش حقه فمتاح قدرت احصل عليه انما هنا المواطن معاه بطاقته يقدر يعرف هيصرف ايه وهياخد ايه وله فلوس قد ايه في الضمان ليه حق كمان اذا كان ممكن يتحط عليه تطبيقات مختلفة على نفس الكارت وبالتالي لما هنستخدمها في ترتيبات اخرى هنسميها كارت الاسرة وكارت الاسرة دا هيمثل نقلة موضوعية في احقاق الحق للمواطن بحيث المواطن يبقى معاه حق مش عيب عايز ياخد الشهر اللي بعديه هو حر بقى يقدر ياخد الشهر اللي بعديه والناس متميزة جدا وبتمشي مع كل ما هو مفيد لمصلحتها ولكن هناك مجموعات ما نسميها اصحاب مصالح في عدم التوجه لمثل هذه التغييرات
محمد صلاح: نشوف كلام الناس ؟
د/ على مصيلحي: ياريت
محمد صلاح: نشوف الناس بتقول ايه ؟
فاصل
مواطن1: بطاقتي ملغية سافرت ورجعت واتلغت وبناء عليه مخدتش تموين لغاية دلوقت بقالي 18 سنة ما بخدش تموين واتلغت البطاقة على كده وبعدين نزلوا قرار بان المعاش 140 يقدم ، قدمت ولغاية دلوقت مردوش علي
مواطن2: المجمعات التعبئة بتاعتها مش مظبوطة
مواطن3: عندنا بطاقة تموين بتاعة والدي هي البطاقة نسيناها عند مكتب التموين ولا ابويا ضاعت منه البطاقة دي قعدت 5 سنين مش عارفين عنها حاجة فلما جينا في المكتب بتاع التموين قال لنا البطاقة بتاعتكم سقطت واحنا لحد دلوقت مش عارفين نعثرعلى البطاقة نجيبها ازاي او ايه الخطوات اللي ممكن نقدر نعملها
مواطن4: الجمعية التعاونية الاستهلاكية بتبقى مخازنها وحشة الواحد بيجيب من السوبر ماركت
فاصل
محمد صلاح: الجمعية الاستهلاكية حاجة وحشة والراجل اللي طلع البطاقة مش عارف يطلعها رايك ايه يا سيادة الوزر في الكلام دا ؟
د/ على مصيلحي: رايي ان المجموعة كلها عندها حق بسبب ان لما ابتدينا في الموضوع دا من سنة 1988 يعني من 21 سنة اوقف ادخال أي بطاقات جديدة او أي اضافة جديدة لسبب انه في لحظة من اللحظات كان النظر لموضوع البطاقة التموينية موضوع يجب ان يندثر دا كان سياسة عامة لما حصلت ازمة الغذاء من سنة ونص كان هناك ارتفاع في اسعار غير مسبوق في كل السلع الاساسية وبالذات الزيت والسكر الزيت وصل 12 جنيه و11 جنيه اللتر فكان هناك التوجه كيفية رفع المعاناة وامتصاص ازمة ارتفاع الاسعار دي ازاي ان احنا لابد ان نرجع للبطاقة فاتاخد قرار من مجلس الوزرا فتح اضافة المواليد على البطاقات السارية بس عشان اقول للاخوة اللي قالوا فاللي كان عنده بطاقة هو اللي ضفنا عليه المواليد فتم اضافة المواليد على الناس اللي بطاقاتها سارية وخدنا قرار تاني من 1/7 السنادي ان احنا قلنا الناس المحتاجة اللي هي نعمل بحث اجتماعي ويكون الدخل لا يزيد عن 500 جنيه في الشهر واخدين احنا شرايح من دلوقت ومعندوش عمل دائم يعني احنا واخدين المجموعة الاولانية يكون عامل دي قواعد البطاقة اذا امتنعت عن صرف 3 شهور فبتسقط عنك تقدر ترجعها تاني لو امتنعت لسنة بتسقط خالص ولو تلاحظ كان الاول ورقي فما ينفعش اقعد اصرف للبقال كده عمال على بطال
محمد صلاح: هى المسالة مسالة الايقاف عشان البقال ما ياخدش اسعار مدعمة ؟
د/ على مصيلحي: بالظبط .. ولذلك المحافظات اللي كانت يمكن دلوقت انا لسه مغير القرار امبارح في المحافظات المميكنة انه هو لو توقف 6 اشهر يبقى هو مش محتاج انما هنا مفيهاش ضرر ان انا جيت احاسب البقال على اللي هو صرفه والاخ اللي قال المجمعات والسوبر ماركت احنا ما بنقارنش......
محمد صلاح: وليه مانقارنش يعني ليه محطش هنا سلع نضيفة ومحترمة ؟
د/ على مصيلحي: مستوى التعبئة النهادرة وارجو احنا كلنا مكنا لسه عايشين في البطاقات وموجودين فيها كان السكر سايب كان الشاي سايب كان الزيت سايب فاكر براميل الزيت ويعبي ..النهاردة كلها في قزايز النهاردة الرز نسبة الكسر لاتتعدى 12.5 % في بعض اوقات ان فيه بعض الشحنات فيها نسبة الكسر رفضناها وحصلت في الفيوم وحصلت في بني سويف وارجوا من المواطنين وهاقول الرقم "19864" اذا وجد أي ملحوظة يتكلم ودا رقم
محمد صلاح: أي حد عنده مشكلة في السلع التموينية ؟
د/ على مصيلحي: وفي العيش ودا موجود مع وزارة الدولة للتنمية الادارية وموجود في ال core centerاو مركز الاتصالات القرية الذكية مش احنا اللي بنرد عشان نقول هنفلتر شكاوى بتتسجل وبتجيلنا يوميات وبنتدخل فيها انا التدخلات اللي احنا عملناها في الفترتين اللي فاتوا ادوا الى نوع من الامن الغذائي والى وكذلك التوازن في الاسعار دون استغلال احتياجات المواطنين انا اعتقد ذلك هناك قد يكون بعض ملاحظات على الجودة اتمنى ان احنا نشترك ورفضك السلع الغير جيدة جزء اساسي لدعم الجودة بص حضرتك لو رفض المواطن الاستلام هتفضل عند البقال فلما تفضل عند البقال انا مش هحاسبه عليها هو نفسه هيرجعها لشركة الجملة شركة الجملة مش هتحاسب عليها لو اشتغلنا كده شهرين تلاتة محدش هينزل باي سلعة الا بجودة مقبولة
محمد صلاح: طيب سيادة الوزير هندخل على موضوع العيش والطوابير ورمضان والسحور خليك معانا لسه الكلام مخلصش
فاصل
محمد صلاح: موضوع العيش من الموضوعات المهمة جدا لكن في رمضان الطوابير بتزيد يعني سيادة الوزير قبل ما نتكلم عن العيش نشوف الناس بتقول ايه عن العيش
فاصل
مواطنة1: استحالة ماخدش غير بجنيه ولو عايز بجنيه ونص هتضطر ترجع تاني تقف في الطابور من جديد يعني نص اليوم بيضيع في الفرن
مواطن2: العيش بس عشان الطابور الواحد مسن ولبيقف بتاع ربع ساعة تلت ساعة ومش قادر الواحد يقف احيانا تيجي عيال تاخد من البقال ويسيبونا واقفين
مواطن3/ بالنسبة لمشكلة العيش هي مشكلة كبيرة بس نفسنا تتحل
مواطن4: عيش الجيش جايبينه يعني عشان يكفي الناس وكده وهما مش نفس العيش بتاع الفرن يعني بص حضرتك وبص عيش الفرن عامل ازاي عايزين العيش يبقى احلى من كده فين الفرن ببريزة ولا ب15 قرش دا فيه افران كويسة هنا ليه مش كويسة
مواطن5: الناس غلابة الناس هتعمل ايه دول بتحصل 30 الف خناقة قصاد الفرن عشان العيش فالناس هتعمل ايه ياريت سيادة الوزير يشوف لنا حل للمشكلة دي الناس تعبانة
فاصل
محمد صلاح: هوالجيش لما عمل عيش عمله حلو وبشلن وليه الافران اللي متعاقدة مع الوزارة بتقدم العيش المدعم بتعمله بشلن وحش
د/ على مصيلحي: احنا نتفق اساسا وبالذات مع اخر مواطن وارجو انكم تدوني هو كان بيتكلم منين انه اثار نقطة معينة تسريب الدقيق او قال الدقيق بيتباع المشكلة في الدعم انه عندما يكون هناك سلعة بسعر معين وتعطى بسعر اقل فهنا ندخل بقى في الضمير وندخل في الاشراف وندخل في التفتيش
محمد صلاح: اكيد الناس فاهمة انه لو العيش بيتباع بتمنه بربع جنيه ولا ب50 قرش مفيش مشكلة بقى بس اشتروا .
د/ على مصيلحي: تمام فالنقطة كلها احنا مستمرين في عدم المساس بالرغيف ب5 قروش ولكن هناك اليات لعدم المساس بيه ولكن لضبطه نتكلم فيها يمكن في موضوع تاني انما اللي انا بقوله النهاردة هناك انضباط اكثر بكثير جدا مما قبل هناك زيادة في الكمية اللي تم اعتمادها في الدعم وبالتالي في كمية القمح وكمية الدقيق هناك عدالة في التوزيع بمعنى كان هناك قرى كثيرة لا يوجد فيها مخبز ولا اتاحة لرغيف الخبز وكانوا ينتقلوا
محمد صلاح: بس فيه الست بتقولك تاخد بجنيه لو عايز بجنيه ونص .
د/ على مصيلحي: اقول لحضرتك حاجة جنيه دا 20 رغيف لما واحد يجيب ب5 جنيه طب ما اللي بعديه مش هياخد لسبب انه ينتج باستمرار والراجل دا عنده حصة معينة فاحنا قلنا حكاية انه يشتري بجنيه يعني لو افترضنا اسرة في المتوسط العام للاسر المصرية 5 افراد المتوسط العام فيه طبعا 20 فرد وفيه فرد وفيه اتنين انما لما تنقسم كده عدد المواطنين مع عدد الاسر ال17 مليون وال80 مليون هتجد المتوسط العام 5 افراد..5 افراد يعني 4 موجود معاه في اليوم دا السبب ان احنا قلنا بجنيه وعدم تسرب العيش للبيع يعني حتى المواطن الاخير بيقولك ادي العيش وبيبيعوه ب10 او ب15 قرش هو دا العيش ابو 5 صاغ بس الدلالات بتشتريه من الافران وبتاخده وبعدين بتقعد على الناصية تبيعه
محمد صلاح: ابو شلن دا بيوديه مزارع الفراخ ؟
د/ على مصيلحي: ليه الجيش بيطلع عيش كويس وب5 صاغ والتاني بيطلعه مش كويس لما ما يطلعوش مش كويس المواطن ما بياخدوش ولما ما بياخدوش بيفضل عنده رجوع العيش الرجوع والسحلة النهاردة بيتباع الطن ب750 جنيه يعني ايه الطن ب750 جنيه يعني الرغيف ب7.5 صاغ
محمد صلاح: ليه العيش لو ما اتباعش يتباع اغلى ؟
د/ على مصيلحي: اه والاسكندرانية سامعني فيه ناس بتعدي على البيوت بالليل ابتدت تبقى ظاهرة ياخد العيش البايت فيشتريه من المواطنين ياخد العيش البايت يبيعه
محمد صلاح: الله طب ما انا اروح اجيب عيش بشلن وابيته عندي في البيت ابيعه ب7 صاغ .
د/ على مصيلحي: طب ما فيه ناس بتعمل كده وفيه ناس في الارياف جزء كبير جدا لا يقل عن 15 ل20% بيستخدم في غير الاستهلاك الادمي
محمد صلاح: هو ليه الرغيف ما يبقاش ب10 صاغ ويتاكل ولما يبقى رجوع يبقى ب7 ؟
د/ على مصيلحي: اقترحنا عشان نحاظ ان قيمته 5 صاغ ان نعطي الفرق دا نقدا
محمد صلاح: واللجان بقى تقعد تجتمع
د/ على مصيلحي: يافندم معلش دا عيش خدمة عشان تتاكل عشان ندي الثقة للمواطن احنا ل خليناه ب10 قروش ولكن قبلها المواطن بياخد الفرق 5 قروش هنضبط سعر الدقيق هنضبط انه بقى اغلى من العلف وبالتالي هنمنع استهلاكه وبالتالي حصيلة المتاح قدام المواطن لو خليناهم 15 قرش والمواطن خد ال10 صاغ دا مش بنقول هنعمله بين بكرة وبعده انما بنقول انه سوف يستمر اتاحته ب5 قروش ولن يتم تغير هذا السعر الا برغبة الناس عندنا موظفين عندنا معاشات عندنا اصحاب البطاقات التموينية عندنا سجل لكل الناس الفرق دا ممكن بيبقى نقدا وممكن يبقى مقدما
محمد صلاح: يعني اذا كانت الزيادة 100% الجودة هتتبقى ازاي ما فيه مشكلة تانية القمح والسوس والقمح الروسي ؟
د/ على مصيلحي: عايزين نتفق لا يوجد مشكلة في القمح
محمد صلاح: والقمح الروسي؟
د/ على مصيلحي: كان خطا وتم اتخاذ الإجراءات هل عندنا عجز في احتياطي القمح ..لا.. عندنا 5 شهور ونص وحد الامان بتاعنا 3 او 4 شهور يبقى احنا عندنا شهرين زيادة هل عندنا قدرة اقل من المطلوب ولاّ المطاحن اللي عندنا بتشتغل بقدرة 80% هل عندنا مشاكل في المخابز كقدرة لا متاسف لا دا المخبز بيشتغل وردية واحدة وممكن يشتغل ورديتين انما احنا عندنا مشكلة ايه..؟ مشكلة تسعير
محمد صلاح: ما انت فصلت الانتاج عن التوزيع .
د/ على مصيلحي: ماهو دا احد الوسائل اللي ظبطت الموضوع برضه بس واضح ان هم بيشتموا لسه في المخابز فاذا لم يتم الفصل تم الفصل عن التوزيع في كثير من الاحياء انا بتكلم واعلى من 80% وبالذات في المدن ودا ادى لى تقليل بيع السوق السودا في انا بستلم منك الكمية وبحاسبك لو ماعملتش دا السبب لما اتكلمت في صناعة الدقيق وبعض الناس قالوا طريق خلفي لرفع الدعم صناعات الدقيق هي الوسيلة اللي تؤمن مواصفات ما اشتغلش بنظام الحصص يعني ايه بنظام الحصص حضراتك عندك مطحن بتاخد 100 طن قمح في اليوم باستلم منك 80 كيلو دقيق عملت ايه ما عملتش ايه انت بتشتغل بالطريقة دي لو انا عايز 82 طن دقيق طرحت مناقصة وحضرتك دخلت وغيرك دخل انا هاخد الدقيق المظبوط بالذات احنا عندنا قدرات وماشيين فيها ولما نتكلم النهاردة على الزيادات ما بديهاش حصص وبعمل مناقصات بزيادات دلوقتي بمناقصة والدقيق دلوقت متميز جدا المهم ان احنا مانفضلش في تاريخ غير جيد في نظام يجب ان اؤمنه جيد جدا في رغيف العيش يعتبر جزء اساسي في الامن الغذائي في البلد انا من وجهة نظري لابد من فتح هذا الملف انا ضد معالجته معالجة لا فيها دون اضرار الكل الفلوس دي يجب ان تكون مع المواطنين
محمد صلاح: يعني انت بعد رمضان ممكن تطرح نظام جديد لانتاج رغيف العيش ؟
د/ على مصيلحي: اه تسعيره طرحناه وهنبتدي فيه اللي هو موضوع المجمعات الكبيرة في كل محافظة وطرحناه المجمعات دي هتبقى معاملتها معاملة تانية ان فيه مجمع كبير وبيسلمنا العيش والناس منضبطة هيبقى فيه اتفاق وعقد هياخد الدقيق بالسعر الحر هستلم منه العيش بسعر التكلفة زائد انا هاوزعه بال5 صاغ هنبتدي هذه المنظومة بحيث لا يبقى ليه مصلحة ان هو يطلع اجود رغيف وهيبقى ليه مصلحة ان مفيش نقطة دقيق تقع على الارض بسبب ان كلها فلوسه واحنا طرحنا المناقصة كده والحمد لله داخل معانا 5 شركات كبيرة سواء بتشتغل في الطحن او بتشتغل في صناعة الخبز ويجب احترام هذه الصناعة انا بقول من برنامجك لا يوجد منتج في جمهورية مصر العربية ينتج اكبر من رغيف الخبز 52مليون رغيف يوميا بتكلفة اجمالية الدعم في اخر السنة 15.7 مليار جنيه مفيش منتج بيتكلف دا ولا منتج بيتعمل بالكمية دي فمثلا نعطيه حقه صحيا حقه هندسا حقه انشائيا حقه في التوزيع حقه في كل دا وما يحزن ان الدولة معندهاش قصور الفلوس موجودة الدعم بيتصرف المطاحن موجودة انما القصور في النظام نفسه النظام دا كان معتمد ايام ما كانت الدولة بتمتلك كل دا هو كان فيه مخابز الا مخابز قطاع الاعمال المطاحن كلها حكومة القمح كله كان مفيش مخلوق يستورد الا الحكومة فالنظام دا كان موجود وكان يستطيع ان يستقر اذا كان النظام الاقتصادي زي ما هو القمح النهاردة مفتوح من سنة 84 للاستيراد للقطاع الخاص والمطاحن القطاع الخاص النهاردة قاربت ان تكون نفس النسبة مع قطاع الاعمال انتاج الخبز النهاردة 80% من المخابز قطاع خاص فاذا النظام اتغير دون تغيير القواعد بتاعته فان الاوان ان احنا نغير القواعد بتاعته عشان نطلع رغيف جيد ويفضل ب5 صاغ
محمد صلاح: من هنا لحد نهاية شهر رمضان هنستحمل العيش وسيادة الوزير بيقول انه هيبقى كويس فيه تشديد في الرقابة لكن منظومة رغيف الخبز بعد رمضان وفيه دراسات والحكومة هتمشي في هذا الاتجاه ووزير التضامن الاجتماعي د علي مصيلحي قال كلامه النهاردة معانا وكل سنة وانتوا طيبين قال كلام جميل كلام معقول بس اكيد كان كلام ....... مسئول
كل سنة وانتوا طيبين خلص الكلام سلام نلتقي في الحلقة المقبلة