و الله ماحنا سايبينك.... و اسأل مجرب من رمضان اللى فات

بداية الحكاية كل سنة و أنتم طيبين على طول يا رب.... رمضان ع الباب قوم إفتح ... بس خد بالك رمضان المرة دى مش زى كل مرة ... رمضان جايب معاه خير أكتر من كل سنة ... الخير ده يكمن فى أحدث العروض حصريا رمضان 2010 :
(حر جامد موت ..... مصيف إنحسر في شهر واحد بس ده للى لحق يصيف ..... الأسعار هتغلى و لو الحكومة وعدتك بإنها هترخص صدقها عشان هى هتغليها ع العيد إن شاء الله ..... ياعينى هتتحرم من الخروج لغاية المغرب و ده غصب عنك إن ماكانش بسب الحر فهيبقى بسبب العطش، بس متقلقش الدنيا بالليل أحلى تقدر تتأخر برة البيت براحتك مصر فيها كل حاجة ممكن تفرفشك، أصل متنساش هى بداية الحكاية و واضح طبعا من إعلان وزارة السياحة).
(فرفش و نعنش)
 الخيمة الرمضانية (شيشة..... مشروبات ست روحية ..... مطرش شعبى ..... عروض فنية بهلاونية).
 الناصية الرمضانية ( دى عشان اللى ظروفة مش سامحة يروح الخيمة ميقلقش خالص ممكن على أى ناصية يقف هو و أصحابة و معاهم حاجتهم و ميقلقش البوليس مش هيضايقه عشان دى حرية شخصية).
 الوسائل الترفيهية (الكافيهات و القهاوى و الموتيسكلات و الصواريخ متوفرة لجميع الأعمار و فى أى ساعة متأخرة من الليل).
 التليفزيون (مسلسلات كتيير أوى يعنى العدد فى اللمون و خد بالك لسه الرقابة ماشفتش ولا مشهد يعنى من المونتاج لسيادتك عدل ..... فوازير رمضان و مش أى حد هيعملها السنة دى ..... السينمات كلها هتقفل طول شهر رمضان عشان تتفرج ع التليفزبون براحتك و ضميرك مينئحش عليك).
 السلع الغذائية (بما إن مؤشرات البورصة المصرية بتشهد تزايد مستمر فى أسعار اللحوم ، خلاص مبقتش اللحمة أحد وسائل الإستثمار اللى بيستخدمها المواطن المصرى، و تحولت الى شاهد على العصر لن يمحى من ذاكرة السينما المصرية ..... و بالنسبة للياميش متفكرش فيه عشان ده إهدار للمال العام ..... السكر و الأرز موجودين بس يمكن نغللى حبتين و ده موسم أكل عيش كل سنة و أنت طيب).
 الشوارع (إياك تعلق زينة بتنور عشان الوزارة مش ناقصة مصاريف و لو مصمم إتصرف و هاتلك سلكة بعيد عن حاجة الدولة اللى سهرانة على راحتك و ماهانش عليها تطفى نور الشوارع و قالت حرام إحنا هنشغل عمود أه و عمود لا ..... و ف الجيزة ممنوع تعمل مائدة رحمن و احمد ربنا انها جت ع الجيزة و بس ..... و كمان عملوا معانا واجب مفيش بعد كده و سمحوا لأصحاب المحلات إنهم يفرشوا (السماح للمحلات التجارية بالإشغال أمام واجهات المحلات بطول واجهة المحل، بما لا يتجاوز عرض الرصيف، وبما يسمح بتحرك المارة علي الرصيف) قايلنها كده بالنص عشان مبقاش بفترى عليهم).
كل اللى فات ده بقى كتيير منه بيحصل طووول السنة .... و منه برضه اللى بيتحضر لرمضان مخصوص إلى جانب أن رمضان هيصيف معانا السنة دى ..... ..... طول السنة الحكومة بتحب فينا و الأسعار بتغلى بس الجديد هو إن الصيف خس شوية ..... ..... ..... ..... .....
عشان كده الخير أكتر ، لأن الثواب على قدر المشقة مش بس جسديا و لكن مجاهدة النفس كمان حاجة صعبة جداااا .... رمضان فرصة مش بتتعوض طول السنة و أنت عارف ليه ..... عشان فيه مغفرة و رحمة و عتق من النار و ليلة قدر..... هما من زمان بيحضروا لنا اللى يسلينا بس إحنا لازم ننتبه للى ينجينا ..... مش هنقفل التليفزيون و مش هنتحبس ف البيت ولا ف الجامع..... بس نحاول ننتهز الفرصة إشمعنا هما بيستغلوها صح لصالحهم..... لو إنتهزنا الفرصة و خرجنا من الأيام القليلة دى و إحنا سايبين معصية إتعودنا عليها و متعودين على طاعة جديدة و لو إننا نشكر ربنا 10 دقايق زيادة كل يوم هتبقى أعظم صفقة عملناها ف حياتنا ..... ..... ..... جرب عشان لو مجربتش شووووور هتخصر
رمضان يقربنا كلنا كل سنة و أنتم طيبين