كفاية نورك على َّ

على أحد المقاهى جلس صديقنا المواطن واحد وهو شارد الذهن فسأله صديقنا المواطن اتنين: مالك؟ متنح ليه؟
- المواطن واحد: أبدا.. أصلى مهموم شوية.
- خير؟
- أول رمضان يا سيدى واحنا قاعدين ع الفطار، المدفع ضرب من هنا وبصيت لقيت حماتى بدأت ترقع بالصوت من هنا وتصرخ من المغص.. قمنا ناقلينها ع المستشفى.
- يا ساتر يا رب.. وبعدين..
- وصلنا المستشفى ودخلنا الطوارئ والدكتور المناوب قال لازم تدخل العمليات فورا.. عنها ودخلت أوضة العمليات.. وفى عز ما الدكتور شغال، الكهربا قطعت.. وقالك المولدات مش شغالة.. قعدت أزعق فالدكتور هدّانى بذوق وأدب وقال لى يا أخ يا مواطن كفاية نورك علينا..
- أكيد.
- قعدنا يا محترم ساعة وأنا كفاية نورى عليهم وحماتى بطنها مفتوحة فى العمليات، والدكتور سابها وطلع أوضته ياخد تعسيلة ووصاهم يصحوه لما النور ييجى أو ع السحور.
- طب وحماتك؟
- أنا قلت فى عقل بالى كويس إن النور غاب خلى عزرائيل يشوف شغله والست تريح وتستريح.. قعدنا ساعة كمان إن حد يخرج من العمليات ويقول لى البقية فى حياتك، أبدا.. ساعة يا محترم وأنا سامعها بتنازع جوه، وعزرائيل بيشد فى روحها من هنا وهى تقاوحه وتشد من هنا.. إن السر الإلهى يطلع، أبدا..
- طول عمرها ست جبارة!.. وبعدين؟
- شوية والنور رجع وبعتوا واد تمرجى يصحى الدكتور.. بعد ساعتين خرجت حماتى من العمليات وهى قاطعة النفس وبيجروها على السرير على العناية المركزة.. وفجأة النور قطع تانى قام التمرجى والحكيمة اللى بيجروا السرير اتكعبلوا فى الزرع اللى فى الطرقة، السرير فلت منهم وجرى لوحده ع السلم.
- يا نهار إسود! وحماتك عليه؟
- قصدك كانت عليه! أصلها اتدلقت من على السرير واتكعورت ع السلم، قمت أنا فى سرى قلت يا فرج الله، أكيد المرة دى بقى هتفطس.
- أكيد
- فجأة النور رجع تانى، شافها تمرجى ع السلم قام للأسف لحقها تحتنا بدورين ورجعها ع السرير تانى وطلعها لنا.. بينى وبينك أنا حاولت أعمل نفسى ما عرفهاش بس التمرجى والحكيمة الله يسامحهم أخدوها منه وراحوا بيها على غرفة العناية علشان يحطوها على جهاز التنفس الصناعى.. همّا حطوها على الجهاز من هنا والنور قطع تانى من هنا.. وبدأت الولية تغرغر.
- يا فرج الله! وبعدين؟
- أبدا.. فضلت الست تغرغر، وعزرائيل يشد من هنا وهى تشد من هنا ساعتين يا محترم إنها تسلم الأمانة، أبدا!
- ست مفترية صحيح! وبعدين؟
- رجعت الكهربا تانى واشتغل الجهاز وخرجت من العناية زى القرد!
- يا ساتر! ده عمر الشقى بقى.. بس عموما حكاية قطع الكهربا مش هتطول.. إنت مش وسط كل الأزمات سمعت إن الحكومة هتحضر اللهم احفظنا الطاقة النووية؟ أهى دى بقى اللى هتحل كل مشاكلنا، النور والمية والعيش والسكر، دى كمان هتجوز البنات.
- يا سلام.. والنبى إحنا بقالنا سنين بنسمع عن الموضوع ده ولا شفناش حاجة.
- اسمع بس، خد منى الكلام ثقة، أنا سمعت إن اليورانيوم خلاص جابوه وكل شىء جاهز عشان يخصبوه.. هو بس اللى معطل الموضوع إنهم لسه بيدوروا على يورانيوم ذكر!