يوسف بك 2

رن جرس منبه تليفوني جنبي فزعني بصيت عالشاشة اشوف ايه المطلوب لقيته بيطفي وينور وناقص يزغدني (مقالة روزاليوسف) وطبعا حكاية منبه التليفون دي اخترعها واحد خبيث لأن المنبه العادي لما يرن يفزعك بتتصرف كشخص متحضر وتدشدشه مليون حتة..
وأهو مابقاش فيه ارخص من المنبهات خصوصا الصيني.. قوم عملوا المنبه ف الموبايل علشان قبل ما تفكر تدشه تفكر مليون مرة ف تمن الموبايل الجديد.. المهم اتوكلت علي الله وقلت اكتب وقعدت اعصر دماغي انا كتبت ايه المرة اللي فاتت وافتكرت اني اغمي عليا.. فقمت.. لقيتني قدام يوسف بك وهبي وقدامنا حتة ارض زي اللي بيلعبوا فيها الكورة الشراب مليانة ناس.. قربنا منهم لقيناهم اصحابنا المسرحيين..
عرفت يوسف بك علي بعضهم.. زي المخرج اللي يا ولداه مش لاقي كاست.. وزي الاخوة اللي قدموله عطيل فانبسط ومن حلاوة نطقهم للغة العربية افتكرهم بيتكلموا ياباني وساعتها كان الوقت اتأخر وماكتبتش المقالة المطلوبة فاستأذنته افوق اكتبها وارجعله تاني.. وطبعا كالعادة نسيت.. لحد ماجه موعد المقالة و كالعادة برضه ماعرفتش هاكتب ايه قوم قررت ارجع ليوسف بك.. طب ازاي؟
جربت كل الطرق للإغماء مانفعتش.. قوم نزلت الشارع نقيت اصيع واحد في المنطقة ووقفت قدامه وقررت استفزه.. وماغلبتش.. اول ما بصللي قولتله.. كابتن .. علي فكرة انت ابوخ من كل السات كوم اللي ف رمضان..
اعتبرها الصايع اهانة لا تغتفر وعينكوا ما تشوف الا النور.. المهم بعد ماحاشوه ولاد الحلال باعتبارنا في رمضان.. وصلت للغيبوبة المطلوبة.. بس ربنا يستر واعرف ارجع تاني وما يبعتونيش اتعالج من ارتجاج ف المخ والا حاجة.. مش مهم المهم اشوف يوسف بك.. فقمت.. بصيت حواليا ملاقيتش يوسف بك.. ده اسمه كلام .. يعني العلقة جت علي فاشوش.. دورت كويس سمعت ضحكات صادرة من علي مقهي ولقيت يوسف بك قاعد مع كل اخوانا المسرحيين بيتفرجوا علي مسلسل ف التليفزيون.. لفلي يوسف بك وقال.. انت رجعت؟ اتأخرت ليه؟
.. حلوة قوي الاعلانات اللي ف وسطها مسلسلات دي.. قلتله تليفزيون ايه بس يا يوسف بيه طب والمسرح؟.. شاور علي الزملا وقاللي.. ماهما اللي بيقولوا ان مافيش مسرح ف رمضان.. قلتله ليه انا اعرف ان الشياطين بس هي اللي بتتربط ف رمضان.. قوم يا جدع انت وهو ورونا بتعملوا ايه خلوا يوسف بك يطلع علي الاحوال.. قام الزملا متأففين.. كان نفسهم يا عيني يكملوا الاعلانات.. وراحوا كل واحد علي مسرحه.. قام يوسف بك وتجولنا بين الزملا.
يلا يا جماعة كله يبتدي.. واحد اتنين تلاتة.. هوب لقينا كل واحد من الزملا قام ضاربله دف وهات يا تطبيل.. اندهش يوسف بيه وقال هما بيعملوا ايه؟
.. قلتله امسيات بقي يا يوسف بيه.. رد يوسف بيه طب و المسرحيات.. فقلت بعد رمضان بقي يا يوسف بك رمضان كريم.. انبهر يوسف بك وقال عفارم عفارم ونعم الايمان يعني علي كده بقي المسلسلات اللي انا شفت اعلاناتها ف التلفزيون من شوية دي بتتذاع برضه بعد رمضان.. قلتله ليه يا فندم ؟ قاللي اصلي خدت بالي ان موضوعاتها عن المخدرات والجاسوسية.. ضحكت وقلتله لا والله يا يوسف بك دي بتتعرض ف رمضان.. طيب ما والله فكرة ما طالما التلفزيون هو بطل رمضان ما تيجي حضرتك نشوف المسرح ف التلفزيون.. قاللي برافو عليكم يا ولد انتوا كمان بتعرضوا المسرح ف التلفزيون.. قلتله امال يلا بينا عالقهوة نتفرج..
قعدنا عالقهوة قدام التلفزيون وصاح يوسف بك.. واحد راسبوتين من فضلك.. زمجر القهوجي.. هو سعادتك فاطر والا ايه؟ شرحت للقهوجي الموضوع فصاح.. طبعا في مسرحيات ف التلفزيون.. ده فيه بتاع عشرة بيتذاعوا دلوقتي اهو.. وقام ماسك الريموت وشاور عالتلفزيون.. ادي اول واحدة.. هوب لقينا رقاصة وملابس غريبة وكوميديان دمه يلطش.. انفجر يوسف بك.. ايه الكلام ده اقلب اقلب.. ما تزعلش يا كبير.. صاح القهوجي.. ادي واحدة تانية..
هوب لقينا نفسنا قدام مسرحية قطاع خاص درجة تاسعة.. اصاب يوسف بك دوار زي دوار البحر بالظبط وصرخ.. اطفي يا بني مش قادر اخد نفسي.. الله امال المسرحيات الجامدة بتاعتكوا يا ولد بتعرضوها فين؟ .. ف التلفزيون برضه يا باشا.. طب افتح لنا التلفزيون تاني يابني.. لا يا يوسف بك دلوقتي ايه؟
دي عقبال عند حضرتك هتتذاع بعد السحور ف وقت الذروة.. ذروة؟ ذروة ايه ؟ قلت له ذروة النوم سعادتك.. صرخ يوسف بك في وجهي لا ده انتوا كده هتخلوني افطر عليكم.. جايبني توروني المسرح ليه في رمضان طالما مافيش مسرح في رمضان .. قلتله حكم القوي يا يوسف بك انا تبع ميعاد المقالة.. والله جت في موسم.. خير وبركة.. جت في رمضان.. لا صوت يعلوا فوق صوت التلفزيون..
إنما اوعد سيادتك المقالة الجاية يكون رمضان خلص ورجعت العروض لمجاريها قصدي لمسارحها و اوريك بقي يا يوسف بيه.. قاللي توروني.. ما لجواب باين من عنوانه اهه جاتكوا.. اللهم اني صايم اشوفك بعد رمضان.. قلتله كده تمام ممكن بقي حضرتك تدلق عليا كوباية الميه دي علشان افوق واكتب مقالة روزاليوسف قبل الفطار قال لي قوي يسعدني وبنظرة انتقام مسك كوباية الميه ودلقها كلها فوق دماغي.. فقت.. كويس..
أما اكتب المقالة بقي.. والا اكتب ايه ده احنا ف رمضان يعني مافيش مسرح.. اشوفكم بعد رمضان بقي.. كل سنة وحضراتكم بالف الف خير.