تميم البرغوتى .. و قصائد جديدة لم تنشر من قبل (2) .. المفتاح والباب

أَنَاْ مُفتاحْ مَزْنُوقْ فى البابْ
عايز بعدِ كده تْقولْ إيه
عايز اْقول أنا لسَّه شبابْ
وِدَه مَالُه بِاللى قَبْلِيه
عايِزَ اْقولِ اْنَّ اْنَاْ مَزْنُوقْ
مِنْ قَبْلِ مَاْشِبِّ عَنِ الطُّوقْ
أَوْ طُوقِى بِيشِبّ مْعَايا
وِكَإِنُّه فى سَبَقْ وَيَّايا
بَاْجْرِىْ وَرَاه وِبْيِجْرِىْ وَرَايا
بَاجْرِىْ كَإِنِّى بَاْجْرِى فْ حِلْمْ
أَوْ عَلَىْ آَلِة جَرْىِ فْ «جِمْ»
بِاْجْرِى فِىْ مَكَانِىْ مَاْ بَكْبَرْشْ
زَمَنِى مِتْمَسْمَرْ جَنْبى
وَكَإِنُّه زَمَنى ذَنْبى
وِسَلاحْفُه رَاكْبَة أَرَانْبى
مَاسْتَعْجِلْشِ وَلا اْتْأَخَّرْشْ
رَغْم الرَّهْبَة وْرَغْمِ الشُّوق
أَنَاْ مُفْتاح فِى البَابْ مَزْنُوق
أَنْا مُفْتَاح مَزْنُوقْ فى البَابْ
طَيِّب طَيِّبْ
عَايِزْ بَعْدِ كِدَه تْقُول إِيه
عَايِزْ أَلْفِتْ نَظَرِ النَّاسْ
عَنْ مَعْنَى المفْتَاح فِى البَابْ
وِعَنِ الزَّنْقَة والتِّربَاسْ
لَوْ قُلنا البَابْ يَعْنِى تَاْرِيخْ
تِبْقَى الزَّنْقَة دِى مُظَاهْرَاتْ
والمفَاتِيح تِلْبِسْ طُلابْ
وِإذَا غَيَّرْنَا مَعْنَى البَابْ
وِعَمْلْنَاه مَعْرِفَة إِلَهِيَّة
يِبْقَىْ المفتاح صَفْوِ النِّيَّة
وْيِمْكِنْ يَاخُدْ صِفَةْ نَبَوِيَّة
وِالشَّكِّ الزَّنْقَةْ المَصِيْرِيَّة
والحِيرَة فْ معنىْ الأَبَدِيَّة
نِكْتِبْ عَنْها أَلْفِ كْتَابْ
كُلَّهَا مِتْقَسِّمَة أَبْوَابْ
مَفَاتِيحها لأُولِى الأَلْبَابْ
وِنْهَاتى فْ خِلافَاتْ فِكْرِيَّة
طَايْفَة رَضِيَّة وْطَايْفَة شَقِيَّة
تِرْبَاسِيَّة وْمُفْتَاحِيَّة
بِينِ المؤْمِنْ وِالنَّصَّابْ
وِانْ غَيَّرْنَا الصُّورَة تَمَامَاً
وِجَعَلْنَا للبَابْ قُضْبَانْ
تِبْقَى الزَّنْقَة بَنى الإِنْسَانْ
والمفتاح شِعْرِ وأُغْنِيَّة
بِيمَنُّونَا بِالحُرِّيَّة
كِذْبَة لَكِنْ مِشْ مُؤْذِيَّة
وِاْيشْ دَرَّاكْ يِمْكِنْ مِشْ كِذْبَة
وْتِطْلَع صِدْقِ المرَّةْ الجَاْيَّة
وِاذَا قُلْنَا القُضْبَانْ رَمْزِيَّة
وْحَطِّينَاْ وَرَاها البَشَرِيَّة
وْعَوِّمْنَا السِّجْنِ عَلَى المَيَّة
تِبْقَى الحِسْبَة غِيرِ الحِسْبَة
القُضْبَانْ قُضْبَانْ فِ سَفِينَة
بِتْنَجِّى الكُونْ مِ الفَيَضَانْ
مَوْزُونَة يَاْ سَفِينِةْ نُوح
مَوْزُونَة بِينْ ضِحْكِ وْنُوح
وَانَاْ شِيخْ طَائِفَةِ المجَانِينْ
مِشْ لادَّةْ عَلِينَا المَوَازِينْ
هَرْبَانِينْ مِ المَيَّة لَكِينْ
للمَيَّةْ اْحْنَا مُشْتَاقِينْ
بِنْحَاوِلْ نِفْتَحْ فِى البَابْ
وِاْنْ غِرْقِتْ مِشْ فَارْقَةْ مْعَانَا
دُنْيَاْ نَجَاتْهَاْ فْ طُوفْ أَخْشَابْ
تِبْقَى دُنْيَا مِشْ نَاْفْعَانَا
يَا مَولانا يَاْ مْنَجِّينَا
وِمْعَبِّينَاْ فْ قَلْبِ سَفِينَة
مَاْ تْعَلِّمْنَاْ نْعُومْ يَا أَخِينَا
كُلُّه يْعُومْ مَطْرَح مَاْ هُوْ عَايِزْ
نِهْرَبْ مِ الوَاقِعْ للجَايِزْ
كُلَّ زُوجِينْ مُفْتَاح للدُّنْيَا
إمِكَانِيَّة لْدُنْيَا تَانْيَة
فِيها الخَاسِرْ فِيهَا الفَايِزْ
مَفَاتِيح فَكِّتْ مِنْ سَلاْسِلْها
وِبْتَخْلَقْ أَبْوَابْ مَنَازِلْهَا
عَوِّمْهَا يَاْ سِيدْنَا وِادْعِى لْهَا
يِفْتَحْهَاْ عَلِينَاْ الفَتَّاحْ
وَانَاْ فى البَابْ مَزْنُوقْ مُفْتَاحْ
وَاْنَاْ مُفْتَاحْ مَزْنُوقْ فِى البَابْ
طَيِّبْ مَا تْنَوَّرْنَاْ كَمَانْ
عَنْ زَنْقَةْ ومَفَاتِيحْ وِبِيْبَانْ
خَلِّينَا أَكْثَرْ وَاْقِعِيَّةْ
خَلِّيْ قَصِيدْتَكْ قُمْع عَظِيمْ
تِنْزِلْ مِ الوَاسِعْ لِلضَّيَّقْ
بَدَلِ البَشَرِيَّة اْبْقَىْ تَمِيمْ
قَاعِدْ عَ القَهْوَة بْيِتَّرْيَقْ
قُولْ للقَارِئْ إِنَّكْ بَاْعْتُه
عَامِلْ فِيه مَقْلَبْ يَاْ لَئِيمْ
بِتْعَلِّمُه فَنِّ التَنْجِيمْ
وِالمَحْرُوسْ لَوْ مِشِى يِتْزَحْلَقْ
إِنْزِلْ مِنْ سَقْفِ التَّعْمِيمْ
لِسَاعَاتِى بِيْبُصّ فْ سَاعْتُه
غَالْيَه عَلِيهِ السَّاعَةْ بْتَاعْتُه
فِىْ مَعَزِّة وَلَدُهْ وِجَمَاْعْتُه
سَاْعْةِ الحَشْرِ لاْبِسْهَاْ فْ إِيدُه
سَاعْةِ الحَشْرِ لَكِنْ بِتْزَيَّقْ
عَاْيْزَةْ لْها شْوَيِّة تَشْحِيمْ
بَرْضَكْ مَاْ نْتَاشْ عَارِفْ تِثْبَتْ
فِ مَكَانَكْ مِنْ غِيرْ مَجَاْزَاتْ
إدِّى مَجَازَاتَكْ أَجَازَاتْ
خَلِّى سَاْعَاتَكْ بَسِّ سَاعَاتْ
وِاْبْوَابَكْ أَبْوَابْ عِمَارَاتْ
والنِّسْوَانْ مِشْ رَمْزِ لْحَاجَة
مَخْلُوقَاتْ مِنْ جِلِىْ رَجْرَاجَة
الأفرنجى اْظْرَفْ مِ المَصْرِى
أَصْلُه بْيِمْشِى صَرِيحْ مِتْعَرِّى
زَيُّه زَىِّ المعْنَىْ الشِّعْرِى
مِشْ كَاسْيَاهِ الإِسْتِعَاْرَاتْ
إنْزِل للجُزْئِىْ مْنِ الكُلِّى
بَدَلِ الدُّنْيَاْ اْوْصِفْ فِى الجِيزَة
بَدَلِ العَجْزِ اْوْصِفْ فِىْ عَجِيزَة
إفْتَح عِينَكْ بَسِّ وْقُول لى
شَايِفْ إِيه فْ بَلَدْكْ يَا خَوَاجَة
وِاللىْ هَاْيِتْفَذْلِكْ كَدَّابْ
أَنَاْ مُفْتَاح مَزْنُوقْ فِى البَابْ
مِشْ عَارِفْ أَخْرُجْ وَلا اْخُشّ
قَاعِدَ اْبُصّ عَلَى الأَحْبَابْ
والصُّبْحِ بْيِطْلَعْ فِى البِيتْ
اللّى بْيَاكُلْ فُولْ بِالزِّيتْ
واللّى لِسَّه هَتَاخُدْ دُشّ
وِاللّى بْيِقْرَا فِى الفِنْجَانْ
واللّى بْيِشْرَبْ فِى الجُرْنَانْ
واللّى بْيُنْفُخْ نَفْخِ بْذِمَّة
قَارِىْ كُتُبْ تَبْدُو لُهْ مُهِمَّة
مَضْمُونْهَاْ اْنُّه عَنْدُه مُهِمَّة
يِفْضَل يُنْفُخْ حَتَّى القِمَّة
لاجْلِ يْوَسَّع أُفُقِ الأُمَّة
زَى البَلالِينْ الأَلْوَانْ
يِمْكِنْ أُفُقِ الأُمَّةْ يْفَرْقَعْ
وِيْدُوبْ جُوَّهْ الأُفُقِ الأَوْسَعْ
والدَّهْرِ الماشِى عَلَىْ أَرْبَعْ
يِتْكَلِّم عَرَبى بْإِتْقَانْ
واللّى بْيِتْوَضَّا وِيصَلِّى
بِيْدَوَّرْ فِى الأَصْلِ الأَصْلِى
عَلَىْ عِرْقِ الدَّهَبِ المتَجَلِّى
فى الأَرَابِيسْكُ وْفِى القُرْآنْ
فَيْلاقِى سِيرَامِيكْ كِيلُوبَاتْرا
يَزْعُمْ إِنُّه هِنَا مِنْ فَتْرَة
وِيْقُول لُه اْتْكَلِّمْ فَرْعُونِى
بَسِّ لاتِينى أَوْ سَكْسُونى
فَيْنَادِيه الشِّيخْ بَسْيُونى
والشِّيخْ فَتْحِ البَابْ التُّونى
وَطَنَكْ دَه فَشْر نَاْبِلْيُونى
فَرْعُونَكْ مَاْ نْتَاشْ مِحْتَاجُه
فِ فَرَنْسَا مِتْعَادْ إِنْتَاجُه
بِالبَشْكِيرْ عَلَىْ وِسْطُهْ وْتَاجُه
شَاحْنِينُهْ بْكَتَاْلُوجْ وِضَمَانْ
وِإدِيه خِلْفِ خْلافْ عَلَىْ صِدْرُه
بِعَلامْةِ اْسْتِفْهَامْ وِمْنَشَّة
كُل عَوَاطِفْ أُمُّه وْفِكْرُه
يِبْنِى عَرْشِ دَهَبْ عَلَىْ عِشَّة
وِالعِشَّةْ حِيْطَانْهَا خَرَزَانْ
فِيه فَرْعُونْ جَنْبُه كَرْكُوبْ
إِسْمُه السَّيِّدْ رِفْعَتْ بِيه
طَالْعَةْ مْرَاتُه بِالمَرْكُوبْ
تِجْرِىْ وَرَاه مِشْ عَارِفْ لِيه
دَهْ بَقَىْ يَاْ سِيدِى فَرْعُونْ بَلَدِى
مِشْ وَاخِدْ كَارْتِ نَابِلْيُونْ
دَه فَرْعُونْ مِتْبَهْدِلْ أَبَدِى
مَاْ لْهُوْشْ غِيرْ إِسْمِ الفَرْعُونْ
عَرْشُه عَلَى القَهْوَة مْكَفِّيه
أَعْدَلْ بَنِى آَدْمْ فِى الكُونْ
لَوْ كَنْتِ إِله لاتبناه
وِمَاْ كُنْتِشْ أَتْبَنَّىْ سِوَاه
لا هَاْيِدِّينى مَالْ وَلا جَاه
بَسِّ كْفَايَة النُّكْتَة عَلِيه
طَيِّبْ غِيرْهُم شَايِفْ إيه
شَايِفْ شُرْطِى قَبَضْ عَلَىْ رُوحُه
وِحَرَامِى بْيِسْرَقْ مِنْ نَفْسُه
دَوْلَة رَافْعَة عَلَمْ عَلَى مِيضَا
بِتَلاتِّ الْوَانْ كُلَّهاْ بِيضَا
ثُمَّ الميضَا مَالْهَاشْ جَامِعْ
واللّى بْيِتْكَلِّمْ بِيتَهْتِه
واللّى بْيِسْمَعْ لُه مِشْ سَامِعْ
وِمَا فِيشْ وَاحِدْ جَاىْ يِتْوَضَّا
كُلُّه جَاىْ يْبِلّ شَرَابْ
يِمْسَح بِالمَيَّة اللِّكْعَابْ
كُلُّه عَايِزْ يِبْقَى خَرَابْ
واللّى مِشْ عَايِزْ، بِالعَافْيَة
كَلْبِ تَارِيخْ عَضّ الجُغْرَافْيَا
عَمَلُوا بَلَدْ فِى حْدُودْ العَضَّة
وَبَقَىْ لْها حْكُومَة وِمُعَارْضَة
وْعُمْلاتْ وَرَقِيَّةْ وْمِنْ فَضَّة
وِبَلَدْنَا مُظَاهْرَةْ مِنْفَضَّة
وِصَلاةْ جُمْعَةْ مَاْ هِيَّاشْ جَاْمْعَة
وِإِمَامْنَا مِشْ حَسَنِ السُّمْعَة
أَهِى جُمْعَة يَاْ عَمّ وْتِتْقَضَّى
وِنْصَلِّى وِنْقِيدْ الشَّمْعَة
مِشْ أَمَلاً وَالاَّ رُوْمَانْسِيَّة
لَكِنْ عَادَةْ وْمِشْ هَا تْضُرّ
مِسْتَحْلِينَاْ الزَّمَنِ المُرّ
وِيْعَدِّىْ أَدَانْ بَعْدِ أَدَانْ
ثُمّ يْمُرِّ شْرِيطْ مُتَسَارِعْ
تِتْسَابِقْ فِيهِ الأَزْمَانْ
تِدْبَلْ فِيهِ الشَّقَّةْ تَمَامَاً
والنَّاسْ تِتْحَوِّلْ أَشْبَاحْ
وِتْغَطِّى العَفْشِ البَيَاضَاتْ
وِيْغَطِّى بَيَاضَاتْها تْرَابْ
وَانَا مُفْتَاح مَزْنُوقْ فى البَابْ
نَكَدِ البَشَرِيَّةْ وْأَزْمِتْها
مَطَرَةْ نَاْزْلَةْ بْعَزْمِ مَا فِيهَا
وَاْنَاْ وَحْدِى وَاقِفْ تَحْتِيها
عاملْ شِعرى قُمْعِ عَظِيمْ
رَاْفْعُه فُوقىْ كَمَاْ الشَّمْسِيَّة
طبعاً مش بِيحُوشِ الميَّة
بِيرَكِّزْهَا بَسِّ عَلَيَّا
فَأَشِيلَ اْنَا هَمِّ البَشَرِيَّة
وِأَتَرْجِمُه فِىْ هُمُومْ تَفَاصِيلى
فى زَعَلِ البِنْتِ وضِحْكِتْها
فى حَرِّ الدَّولَة وزَحْمِتْها
مَصْرِ مَجَازْ عَنْ كَرْشِة نَفَسى
وْعَنْ كَرْشِة نَفَسِ الإنْسَانْ
تِلاوِتْهَا وْتَرْتِيلْهَا الكَنَسِى
وِزَوَارِيْبْهَا والدِّبَّانْ
لازم أَسِيبْهَا عَشَانْ أَغْلِبْها
وَاكَتِبْ شِعْرِيْ بِدُونْ مَاْ اْكْتِبْها
أَهْرَبْ مِنْها وِأَهَرَّبْها
مَصْرِ مَجَازْ عَنْ كَرْشِة نَفَسِى
لما أَوْصِفْ حال الدنيا
تَشْبِيهَاتى بْتِبْقَى طَابُورْ
تِيجِى مَصْرِ بْكِتْفِ جَلَنْفْ
تِرْمِىْ كَلامِى هِنَا وِهْنَاكْ
وِتُقَفْ فِى الأَوِّلْ بِالعُنْفْ
مِشْ هَتْخَلِّى لى وَلا حَرْفْ
كِدَهْ مَصْرِ بْتِسْتَعْمَرْ لُغَتى
لازم أطردها من الصَّفّ
أَخْرُجْ مِ الجزئى للكُلِّى
مَصْرِ مَجَازْ عَنْ كَرْشِةْ نَفَسِى
هَاخْتِمْ بِيها آخِرْ مَرَّة
عَشَانَ اْخْرُجْ مِ الجَرَّة لْبَرَّه
مِيتْ مَرَّة تِسْلَمِى يَا جَرَّة
وَاْنَا مَا سْلِمْتِشْ مِنَّكْ يُومْ
مَصْرِ يَاْ قُمْعِ يَاْ تَحْتِ المطَرَةْ
إزَّاى تِحْشِىْ القُمْعِ غْيُومْ
أنا مَزْنُوقْ فى البابْ مِنْ فَتْرَة
مِشْ مَسْمُوع تَخْبِيطِى وجَرَسِى
مَزْنُوقْ فى تَشْبِيهى المصرى
مصْرِ مَجَازْ عن أزمة شِعرى
مَصْرِ مجاز عن كَرْشِة نَفَسِى
مصْرِ مجاز عَنْ خَنْقِة جِيلى
مِحْتَلَّة خَيالى وتَحليلى
وداهنة أُفُقِ الأُمَّة هْباب
وانا مفتاح مزنوق فى الباب
يا مَصْرِ المرَّة دى بْجَدّ
وِمَانِيشْ هَاتْرازِلْ عَلَى حَدّ
وَلا اْقُول لما اطلع رَجَّعْنى
أَنَاْ هِنَاْ هُه لازْمِتى إيه يِعْنى
مِشْ عَارِفْ اساعِدْ إِخْواتى
وَلا هُمَّه قِدْروا يْسَاعْدُونى
حَتى شِعرى شِعر ذَوَاتى
أَبْياتُه بِالفُصْحَى يْجُونى
يعنى أنا بَغَيَّر أَبْيَاتى
وِبَاحَضَّر مَنْظَر رِحْلاتى
وِمَكَانْتى فى الزَّمَنِ الآتى
وَضْعِى هِنَا وَضْعِ أَبُوالطَّيِّب
هُوَّ شَتَمْ لَكِنْ أَنَا طَيَّبْ
قاعد وَلا قُوَّة وَلا حَوْلة
وِمحاولة تْوَدِّى لمحاولة
تانى اطرُدْنى يَا خِتْمِ الدَّوْلَة
إنتَ كْسِبْتِ يَاْ عَمّ الجَوْلة
إنتَ القِفْلِ تَمَلِّى مْعَاكْ
خَلِّينا لك مَصْرِ هْدِيَّة
بسّ ابقَى ادْعِى رَبِّى يْعِينَكْ
مَصْرِ يَا بِيه هَا تْطَلَّع عِينَكْ
أما الطَّرْدِ فَهَايْحَرَّرْنا
وِيْريَّح مِنَّكْ أَفْكَارْنَا
وِانْتَ اْنْشَا الله هَاْ تِعْرَفْ بُكْرَة
إنُّه شَرْطِ الفَتْحِ الهِجْرَة
وانُّه مَصْرِ بْرَغْمِ كَالُونَكْ
يا قِفْلِ الدَّولَة وِقَانُونَكْ
مَبْنِيَّة بْمِلْيونْ شبَّاكْ
ياللى سَانِنْ ضُفْرِ وناب
عَرَقَكْ زَىّ الزيتِ المغْلِى
خَافْ لا يْجِيلَك هَاْرْتِ أَتَاكْ
فِى خَياَلِ الشُّعَرَا المتجلِّى
يَا مِتْحَصَّن فى الأَبْوَابْ
إسمع كِلْمَة وفَصْلِ خْطَابْ
من مفتاح مزنوق فى الباب
إنتَ أَقْوَى مِنَّا صَحِيحْ
وِعَمَلْنَا هَايْرُوحْ فى الرِّيحْ
بسِّ الرِّيحْ يَا ابُو مُخّ صَفِيحْ
راح تُدْخُلْ مِنْ غِيرْ مَفَاتِيحْ