ع المصطبة

منع استيراد فوانيس رمضان

عقد مجلس برلمان المصطبة جلسته الأسبوعية أثناء زيارة الفلاح الفصيح وهو ممنوع من الحركة بسبب آلام فقرات الظهر، وقد اقترح العضو الفلفوس مناقشة موضوع منع استيراد فوانيس رمضان.
العضو الفلفوس: أنا من رأيي إن القرار متأخر واحنا طالبنا قبل كده بقفل باب استيراد الحاجات غير الهامة.
العضو النمرود: أنا فاكر إحنا استعجبنا من استمرار الحاجات اللي ملهاش لازمة زي حاجات الزينة والوجاهة وفيه ناس مش لاقية لقمة عيش طيبة ولا حتى جلابية نضيفة فلازم ولابد من قفل باب الاستيراد للحاجات غير الضرورية.
العضو زعيط: لغاية دلوقتي أنا مش مصدق إن احنا بنستورد حاجات بالمليارات ولو استغنينا عنها مش حانموت فلازم ولابد من قفل الاستيراد نهائياً لكل ما لا ينفع البلد ونتوجه لإنشاء المصانع لانتاج ما نستورده.
العضو معيط: الفلافيس بتوع مصر مش بيقولوا الحاجة أم الاختراع طيب ليه إحنا ما نعملش مصانع تنتج كل ما نحتاجه بدل استيرادها ونعمل زي الدول اللي سبقتنا وكفاية كده البلد محتاجة لكل قرش.
العضو بهلول: كفاية كلام وكفاية شعارات ونبدأ في بناء البلد من جديد على أساس سليم وننسى الميت سنة اللي فاتت بما فيها من خير وفساد وكسل.
العضو نطاط الحيط: فاكرين يا جماعة الجلسة اللي ناقشنا فيها عملية الاستيراد اللي قلنا فيها عار علينا نستورد جبنة ومية معدنية ولعب وهدوم للبهوات وطالبنا وقتها بوقف المهزلة دي وأطالب الوزير الشجاع أن يستمر في وقف استيراد هذه الحاجات حتى نجبر أصحاب الأموال على تصنيعها داخل البلد ويكمل الحلقة حتى يدخل التاريخ ونصبح مصدرين لها بدلاً من استيرادها.
الفلاح الفصيح: يا جماعة كفاية كده وانتم حاضرين لزيارتي في مرضي ويحفظ الله مصر وأهلها.
الفلاح الفصيح