ع المصطبة

زيارات المسئولين للمحافظات

عقد مجلس برلمان المصطبة جلسته الأسبوعية بقرية روينة بمحافظة كفر الشيخ وهى مسقط رأس الفلاح الفصيح وذلك لحضور زواج بنات ابن أخيه الحاج عرفة أبوزيد ودارت الجلسة حول زيارات رئيس الوزراء محلب المفاجئة لشتى أماكن الجمهورية بناء على اقتراح عبدالله إدريس عضو نقابة الفلاحين.
العضو الفلفوس: زيارات رئيس الوزراء عملت جو طيب وبدأ المسئولين الكبار ينزلون من مكاتبهم وآخر حاجة ان محافظ كفر الشيخ زار قرية روينة بلد الفلاح الفصيح واطلع على سير العمل بالوحدات المحلية وأصدر قراراً بوقف المسئول عن الوحدة المحلية لسوء الإدارة.
العضو زعيط: طبعاً دى حاجة كويسة لكن احنا عاوزين المسئولين الكبار يقعدوا معانا ويشوفوا طلباتنا ومشاكلنا لكن زيارات على الطاير كده مش كفاية.
العضو النمرود: أنا عندى اقتراح وهو نرجع أيام الاتحاد القومى يعنى المسئولين الكبار فى الدولة مع المحافظ يعملوا مؤتمر كل شهر يضم مثلاً ممثلين عن أربع قرى ويحضره المسئولون فى المحافظة زى الزراعة والصحة والبلدية والتعليم وتعرض عليهم القضايا وياخدوا قرار بحلها ودراستها وبالشكل ده تتحل المشاكل أما الزيارات التليفزيونية ملهاش لازمة.
العضو معيط: يا جماعة كلام النمرود صح لأنى فاكر أيام عبدالناصر كان كمال الدين حسين يعمل مؤتمرات فى كل محافظة ومعاه كل الوزارة ويناقشوا مطالب الناس.
العضو النمرود: معيط يقصد أيام الاتحاد الاشتراكى والاتحاد القومى ودى كانت جولات سياسية لكن على كل حال الدنيا اتغيرت ولازم ولابد من وضع خطة محكمة لنزول كبار المسئولين للشارع والقرى وعمل مؤتمرات تطرح فيها المشاكل واحدة واحدة ويعملوا حل لكل مشكلة على أن يتم التنفيذ الفورى لكن كلام على الهوا يبقى فض مجالس.
نطاط الحيط: أنا شايف البداية طيبة كون إن رئيس الوزراء بنفسه ينزل الشارع ويمشى وسط الناس فده معناته ان فيه عصر جديد وياريت يستمر.
الرئيس: كفاية كده وقوموا ناكل الكوارع والفتة فى مضيفة الحاج عرفة وكل عام ومصر بخير.
الفلاح الفصيح