علي المصطبة

يا نغرق سوا يا ننجو سوا

عقد مجلس برلمان المصطبة جلسته الطائرة لمناقشة الأحداث الطارئة علي الساحة السياسية المصرية.
شيخ المجلس: الأخوة الأعضاء من كافة أنحاء الجمهورية ان اجتماعنا اليوم تاريخي لمتابعة الأحداث الجارية علي الأرض المصرية ومن غير مقدمات افتح باب المناقشة.
العضو الفلفوس: أنا عاوز أقول ان معظم الثورات التاريخية لازم يكون فيها أحداث مصيرية وعلشان كده اسمها ثورة وإياك يكون جماعتنا بتوع السياسة عاوزين الأرض تكون مفروشة بالسجاد علشانهم فلازم ولابد ان يكون فيه تيارات عاصفة يدخل فيها كل التيارات الهادئة والهادرة والمشاغبة والناعمة لغاية ما تهدأ الأمور وتستقر الأحوال علي وضع معين يرتضيه الجميع.
العضو النمرود: والله أنا شايف ان فيه عواصف بدل عاصفة واحدة فكل يوم لأ كل ساعة تظهر حاجة جديدة خالص تقلب الترابيزة فمرة يقولوا خلاص احنا اكتفينا بكذا وكذا وبعدين يقولوا لأ احنا قصدنا كذا وكذا وبعد يومين يطلع واحد ثالث يقول أصل احنا كنا عاوزين نعرف الشعب عاوز ايه وعملنا اللي عاوزه الشارع المصري وعلي رأي مثل زعيط دوخيني يا لمونة.
العضو نطاط الحيط: والله احترنا وعلي رأي الست أم كلثوم حيرت قلبي معاك ومعرفش أداري وأخبي وانكشف المستور فلازم الرد عليه يكون بالحجة وكفاية مظاهرات وتعطيل مصالح الناس.
العضو زعيط: يا عم انتم مش واخدين بالكم من حاجة مهمة وهي ان جماعة المعارضة بتفرح للحجات دي لانها تقوم تجري علي قنوات التليفزيون وهات يا خطب وهات يا تصاريح والجماعة التانيين نازلين للمدن والقري ويقنعوا الناس لكن جماعتنا المعارضين شاطرين بس علي الظهور في التليفزيونات وطبعا أصحاب القنوات كسبانين.
العضو معيط: خدوا الحكمة من أفواه الغلابة فبدل ما ينزلوا للقري والمحافظات ويعملوا ندوات ومؤتمرات ويقولوا حجتهم قصاد حجة الطرف الثاني يقعدوا قدام الشاشة وهات يا كلام جعاليص مفيش حد يفهمه مننا وعلشان كده الطرف الثاني كسبان علي طول لأنه بينزل الشارع ويكلم الناس وجها لوجه وحجة بحجة.
العضو بهلول: يا جماعة لا ده ولا ده ينفع فلازم نعمل زي ما قال الصحفي بتاع الوفد اللي قال إن البلد بتمر بفترة عصيبة ولازم ولابد اننا نتحد ونبقي يد واحدة علشان المركب تعوم وتمشي بدل ما نبقي فرق ونتخانق وسايبين المركب تغرق باللي فيها وساعتها ماينفعش الندم ولا كلمة يا ريت لانها لا تعمر بيت فلازم نقعد مع بعض ونتفاهم لغاية الأزمة ما تنتهي وتستقر البلد وبعدين كل واحد يمشي في طريقه.
شيخ المجلس: والله كلام العضو بهلول هو عين الصواب لأن البلد بلدنا كلنا المسلم والنصراني والجاهل والمتعلم والفني والفقير يعني كده كلنا في مركب واحد يا نغرق سوا أو نرسي علي بر الأمان سوا وترفع الجلسة.
الفلاح الفصيح
عثمان أبوزيد