ثورتنا صامدة

استأنف مجلس برلمان المصطبة جلساته التاريخية لمواصلة مناقشة الأحداث المصيرية اللي بيمر بيها القطر المصري.
شيخ المجلس: حضرات الأعضاء في كافة أنحاء الجمهورية نعقد جلستنا اليوم لاستئناف الأحداث المصيرية وأهمها ما نتابعه من تطورات وانقسامات علي الساحة السياسية.
العضو زعيط: حضرات الاخوة أنا عاوز واحد يشرح لي إيه الي بيحصل ده في البلد كل شوية أنفار يطلعوا ويقولوا ده مش عاجبنا وده وحش كخة وبالشكل ده شوية شوية بقينا شلل وإيه العبارة بالضبط.
العضو الفلفوس: أولا لازم نقر ونعترف ونبصم أن ثورتنا نجحت والحمد لله وكل اللي بيحصل علامة صحية زي ما بيقولوا علشان الثورة تفضل مشتعلة فلا داعي للخوف من ضياعها.
العضو معيط: إيه حكاية ميدان التحرير كل أسبوع احتنا دلوقتي حققنا الهدف الرئيسي وهو ان النظام كله انهار من الأساس وشوية اللعبكة دي من ناس بتطالع في الروح ومش لازم نخاف منهم لأننا الأغلبية الساحة الكاسحة الماحقة لكل مخرب.
العضو النمرود: يا جماعة احنا لازم عيوننا تبقي صاحية ليل ونهار علشان نمنع الفلول المستخبية انها تطلع من جديد وده بيحصل في كل الثورات وبما أن ثورتنا سلمية فلازم تكون عيوننا مفنجلة ومتابعة الجماعة المرتبطين بلصوص البلد.
العضو نطاط الحيط: طبعا لازم نكون واخدين بالنا تماما بس يكون بهدوء وبعقل وكل اللي بيحصل ده علامة صحية لكن بشرط أن احنا نرجع للهدوء علشان نعرف نتصرف ونعرف ازاي نوقفهم عند حدهم.
العضو بهلول: يا عالم يا هوه انتم ناسيين ان الجيش المصري العظيم ابن الشعب واقف بالمرصاد لكل من يحاول يهدم ثورتنا والتاريخ حايشهد له بكده وكمان الدول اللي قامت فيها ثورات بيهتفوا ويقولوا للجيش بتاعهم يعمل زي ماعمل جيش مصر العظيم وقياداته الله يحفظهم ويحميهم من كل حاقد وحاسد وعزول.
العضو الفلحوص: أناعاوز أقول فيه حاجة مهمة خالص وهي حكاية الاضرابات والاعتصامات وهي حكاية مش وقتها أبدا لأن مصر اليومين دول بيحطوا الأساس اللي حاتمشي عليه البلد ومش فاضيين للعلاوات والشغل واللي خلانا نصبر علي الحكاية دي سنين فلازم نصبر شويتين لأن الحكم دلوقتي مؤقت لغاية ما يبقي فيه حكم دايم من مجلس شعب ورئيس وقانون تمشي عليه البلد ساعتها نطالب بكل حاجتنا.
العضو الغلبان: والله كلامك عين العقل فلازم الأحوال تكون هادية علشان الناس اللي فوق تعرف تفكر وتشتغل وبعدين يبقي فيه كلام عن مشاكلنا وده من حقنا لكن لازم يكون فيه براح للمسئولين علشان يدبروا أمور البلد.
شيخ المجلس: والله يا جماعة كلامكم في السليم ولازم نعمل بيه لكن بشرط واحد إن احنا نفضل في حالة استنفار علي طول لحماية الثورة من أي خلل والله المستعان.
الفلاح الفصيح