ع المصطبة

كفاية فذلكة

استأنف مجلس برلمان المصطبة جلساته الاسبوعية لمتابعة الاحداث الجارية في البلد:
شيخ المجلس: تعلمون جميعاً أن الساحة المصرية تموج بالاحداث والعنتريات والتشدق بالمواقف السخنة وكل ده يصب في إشعال حريق في البلد لصالح مين.
العضو زعيط: انتم مش واخدين بالكم من حاجة مهمة وهي إن الناس اللي بتتكلموا عنهم دول كانوا بالعين زلط ومايقدروش يفتحوا حنكهم بكلمة وإلا يروحوا ورا الشمس لكن لما ربنا فتحها علي البلد وشعروا بالامان وشافوا القطر بيجروا لقدام وسابهم وراه فقاموا يشتموا وينتقدوا ويفضفضوا والقنوات فتحت شاشتها لهم وعاوزين جنازة يشبعوا فيها لطم علي الخدود ومش مهم البلد تولع أو تندعق.
العضو الفلفوس: والله يا جماعة احنا احتارنا ومش عارفين البلد عاوزينها تروح علي فين وكل شوية يطلع لنا واحد يقول ده عاجبني وده مش عاجبني وده وده وطني وده عميل ودول كلهم مش عارفين ليه بيقولوا كدة أو عاوزين البلد تمشي علي هواهم وكفاية فذلكة.
العضو النمرود: يا عم انت وهوه مش واخدين بالكم سبوبة الدولارات خلاص بح والفولة انكشفت.
العضو نطاط الحيط لا أنتم برضه ناسيين حاجة مهمة خالص ان فيه شخصيات كبيرة فاتها القطار وعاوزة تلحقه فلازم تزعق بصوت عالي وتقول أنا هنا يابن الحلال أو تقول اللي موجودين في السلطة بيلعبوا غلط ولحسابهم يعني كل واحد منهم علي رأي المثل بيغني علي ليلاه والخوف كل الخوف إنهم يكونوا السبب في تدهور البلد.
العضو معيط: والله لا أنا إخواني ولا سلفي ومع كدة استعجب من اللي بيقولوا الاخوان خلاص بقوا حزب وطني جديد ومش مكسوفين من نفسهم اللي بيقولوا كلام زي ده مع انهم ناس متعلمة وكل يوم كانوا بيسبحوا بنزاهة الانتخابات ولما وقعوا وفشلوا علقوا فشلهم علي كلام أهبل وده معناته إفلاس والشعب مش عاوزهم.
العضو نطاط الحيط: إنتم ناسيين حاجة مهمة وهي إن حزب الوفد له وضعه في المجلس الحالي ولو كان شايف ان اغلبية الاخوان غلط كان أعلن بكل صراحة رفضه لكن دول ناس عاوزة شوشرة.
العضو الغلبان: ياعيني عليكي يا بلدي خلاص العيب أصبح مش عيب لإن الصغير بيشتم الكبير علني ومش لاقي حد يصده ومفيش ابننا وجدي بتاع الوفد اللي وقف وقال كلمة حق وأيد اللي كان أعضاء المصطبة متمسكين بيه وهو إن الجيش المصري خط أحمر لا يمكن ولا يجوز تخطيه.
------
عثمان أبو زيد
الفلاح الفصيح