ع المصطبة

العزل السياسى

العزل السياسى
بقلم: عثمان أبوزيد
منذ 1 ساعة 40 دقيقة
عقد مجلس برلمان المصطبة جلسته العادية لمتابعة أحداث الساعة وكان على رأس جدول الأعمال قضية العزل السياسى.
شيخ المجلس: حضرات الإخوة الأعضاء تعلمون جميعاً أن موضوع العزل السياسى ناقشناه أكثر من مرة فى مجلسنا هذا وأكاد أقول إننا كنا أول من طرح الموضوع للمناقشة وقلنا وقتها إن أفضل طريقة أن يتولى أبناء الدايرة العملية وليتفضل العضو الفلفوس التعليق.
العضو الفلفوس: حضرات الإخوة الأعضاء فى كل مكان بالجمهورية زى ما قال شيخ المجلس إننا قتلنا موضوع العزل السياسى بحثاً وأن رأينا وقتها استقر على أن يتولى أبناء الدايرة العملية حتى لو الحكومة ما عملتش حاجة واقترحنا وقتها هو أن يقوم الثوار فى كل بلد وقرية بعمل كشف بجميع أسماء الحزب المطلوب عزلهم وتعليقه على أبواب الجوامع والكنايس ودور الشباب والنوادى الرياضية وبالشكل ده يبقى عزل سياسى شعبى.
العضو النمرود: كلامك سليم مية فى المية ولو إحنا فعلاً ما عملناش كدة يبقى نستاهل كل اللى يجرى علينا ولازم ولابد أن كل المواطنين ياخدو الموضوع جد فى جد ولا ينتظروا قرارات حكومية لإن إحنا أصحاب المصلحة وإذا قعدنا ساكتين يبقى ثورتنا ضاعت.
العضو زعيط: والله ياجماعة أنا شايف إن كلام النمرود سليم والقرار فى إيدنا ومفيش أهمية لقرار من فوق لإن إحنا اللى بننتخب وذنبنا على جنبنا لو انتخبنا الجماعة إياهم اللى كانوا بيهبروا على حسنا وباسمنا وكفاية عليهم كدة.
العضو معيط: أنا عاوز كلمتين لله بعيد عن حكاية الانتخابات وكلامى عن الفوضى اللى بتحصل فى البلد وأقول حرام عليكم انتظروا وراقبوا الحكومة لأنها مؤقتة ولما يكون فيه استقرار يبقى من حقنا نطالب ونحتج ونتظاهر ونعتصم لأن فيه نظام مستقر لكن اللى بيحصل دلوقتى ملوش لازمة أبداً وخطر على البلد الله يهديكم.
شيخ المجلس: وختامه مسك كلام العضو معيط.
--------------
الفلاح الفصيح
عثمان أبوزيد