ع المصطبة

حفظ الله مصر بشعبها وجيشها

حفظ الله مصر بشعبها وجيشها
بقلم - عثمان أبوزيد
منذ 8 ساعة 9 دقيقة
استأنف مجلس برلمان المصطبة جلساته الطارئة لمتابعة الأحداث الجارية. شيخ المجلس: حضرات الإخوة الأعضاء نجتمع بصفة طارئة لمتابعة ما يجري في بلدنا من أحداث خطيرة لانعرف سببها ومين وراها.
العضو الفلفوس: حضرات الإخوة في كافة الأنحاء في الجمهورية انتبهوا جيدا يظهر ان اللي حصل ده مش عاجب الأعداء جوه وبره وعلشان بيحاولوا يشعلوها نار علي الوطن علشان ما تعرفش مصر تقف وتصلب طولها وتفضل كسيحة وأبناؤها ياكلوا في بعض ويخربوا فيها.
العضو زعيط: والله احنا قاعدين نضرب كف بكف ومستغربين ازاي اللي حصل ده مع ان ثورتنا العظيمة بيضربوا بيها المثل في كل الدنيا واقول حرام عليكم لأنها في النهاية بلدكم ومأواكم وحصنكم وكفاية تدمير فيها.
العضو معيط: أنا عاوز واحد يشرح لي ويفسر الي حصل يوم الهجوم علي السفارة ليه راحوا علي الداخلية ومديرية الأمن وده اللي مش عارف له سبب واحد كان الداخلية ومديرية الأمن دول من دولة اسرائيل وعلي كل حال فيه حاجة غريبة بتحصل ومش عارفين لها سبب.
العضو النمرود: عاوز أقول يا أهل المحروسة يا أولاد البلد خذوا حذركم وبلاش تمشوا زي العمي ورا كل واحد رافع راية وبيسحبكم وراه وفكروا ميت مرة قبل ما تسمعوا كلامه فإذا كان خير وفي مصلحة البلد فيا مرحبا وكان فيه سوء نية فلا مرحبا به وبغيره وبلاش تمشوا كده من غير ما تعرفوا رايحين فيه وحاتعملوا إيه.
العضو نطاط الحيط: أنا مستعجب ومستغرب وقاعد أضرب كف بكف وأقول لنفسي ولغيري ازاي ده يحصل بعد الأمور ما أصبحت في طريقها للاستقرار والسؤال هو احنا طالعين في مظاهرة بعد صلاة الجمعة وفجأة ظهرت مظاهرة قدام وزارة الداخلية وبعدها سفارة إسرائيل ومعاها مديرية الأمن بالجيزة ومعاهم بالمرة السفارة السعودية يبقي ده اسمه إيه مصادفة أم ترتيب ومن مين وعلشان إيه ولازمته إيه طالما فيه مليونية في ميدان التحرير.. سؤال غريب فعلا.
العضو الفلحوص: يا جماعة فيه ايد غريبة بتلعب في البلد ومش عاوزة الثورة تنجح والبلد تتغير والكلام ده في تقرير لجنة تقصي الحقايق الأخير إن فيه إيد خفية بتحاول تخريب البلد لكن ربنا كشفهم وربنا معانا.
شيخ المجلس: حفظ الله مصر بشعبها وجيشها وشرطتها.
الفلاح الفصيح
عثمان أبوزيد