سفير التضامن.. معرض "ديارنا" نقطة تحول في حياة أيمن حمودة صانع الديكوباج الموهوب.. فيديو

الصورة.. ممكن تشيل تاريخ.. وعناوين ووشوش مبتغيبش.. بتتنقل من إيد لإيد وعلى مدار سنين بتفضل شاهدة على كل عصر وتصور لنا زهوته وجماله..
انا أيمن حمودة مصمم لوحات الديكوباج .. وبطل حلقة النهاردة من سفير التضامن.
أنا من السيدة زينب وخلال رحلتي العملية طلعت بدرس مهم، وهو إني مشغلش نفسي ببكرة..
أهم حاجة أشتغل.. أجرب كل يوم حاجة جديدة تفيدني ولما أنجح أحافظ على نجاحي
في أول حياتي اشتغلت في السياحة.. بس مستمريتش كتير بسبب الظروف اللي مرت بيها ..
ساعتها فكرت إني أرجع لجذوري.. شغل والدي..
والدي كان بيشتغل في الديكوباج..
بدأت أشتغل معاه في تسويق لوحاته.. وأول ما بدأت في التسويق الطلب زاد على اللوحات وبقا يشتري منتجاتنا أكتر من جاليري..
دي كانت بالنسبالي البداية والدافع ليا إني أستمر وأنجح ..
من هنا بدأت أصمم لوحات الديكوباج..
لأني من زمان وأنا بحب الفن ده لكن مفكرتش أشتغل فيه بس كل حاجة بتيجي في وقتها ..
بدأت أطور من الشغل أكثر وأدخل تصميمات أكتر
وأكتر حاجة بهتم إن تصميماتنا تبقى مستوحاة من التراث اللي يبين
جمال بلدنا
في عصور كتير زي العصر الفاطمي والمملوكي وغيرهم.
بدأت أكون فريق عمل علشان الشغل يكبر ..وركزت على إني أهتم بالناس المنتجين والحرفيين الشاطرين بس مستنين الفرصة ..
وزارة التضامن الاجتماعي كان لها دور في نجاحي ومعارضها كانت وش الخير عليا..
لفيت مع معارض ديارنا شرق مصر وغربها..
وخرجت بفني كمان للعالم فشاركت في معرض لا أرتيجيانو بايطاليا.. و ده ساعدني اكتسب خبرات جديدة .. وقدرت أفهم السوق هناك ماشى إزاي.
ديارنا دايما مختلف.. الناس بتستناه من السنة للسنة.. وأنا كعارض بحضرله دايما أفكار وأشكال جديدة.
أنا بعتبر نفسي لسة منجحتش.. كل معرض جديد تحدي جديد ليا.. بجتهد وبركز عشان اطلع منتج مختلف.. يبسط الجمهور الذواق دايما للفن..
https://www.facebook.com/watch/?v=452446712727160