محمد صلاح: يا مساء الخير الابن اتخرج وعايز يشتغل والبنت اتخرجت وعايزة تتجوز واحد بيشتغل مش بيدورعلى شغل وهيّ كمان عايزة تشتغل مُعضلة مفيش شغل الحكومة بتقول ان قدرتها في التشغيل محدودة والامل في القطاع الخاص، جت الازمة المالية العالمية قلصت قدرات القطاع الخاص في خلق فرص عمل جديدة كمان المسالة مش بس قدرات الحكومة والقطاع الخاص ده فيه رغبات اللي عايزين يشتغلوا وهل هم مؤهلين للشغل في الوظائف المطلوبة ولّا لا ده لو كان فيه اصلا وظائف مطلوبة .. فيه ناس بتحب تراب الميري لغاية دلوقتي حتى لو بملاليم بتخاف من القطاع الخاص اللي فيه هامش مغامرة والعكس موجود طلبات التوظيف بمئات الالاف على فرص عمل مش موجودة اصلا.. يبقى الحل العمل الحر كنا زمان بنسميه كده الواحد يبقى حُر نفسه وصاحب مشروع لا مدير يعكننه ولامواعيد تكركبه ولا لوائح تكلبشه وكمان فرص الدخل والمكسب .. لكن العمل الحُر حتى لو كشك سجاير عايز راسمال 90% من المنشات في العالم عبارة عن منشات صغيرة ومتوسطة حنلاقي النمور الاسيوية والصين اللي غزت العالم بمنتجاتها خرجت معجزتها من المشروعات الصغيرة حتى امريكا في السنين اللي فاتت دخلت على المشروعات اللي بتسمح بابتكار اكثر واستثمارات اقل فرص للمبادرة الفردية مصر من 18 سنة عملت الصندوق الاجتماعي للتنمية عشان يساعد في حل مشكلة البطاله والفقرفي زمن الشركات عابرة القارات ومتعددة الجنسيات اتعمل عشان يرسخ مفهوم المشروعات الصغيرة ويساعد في انشائها ودعمها بعيد عن البنوك وقروضها و الضمانات الصعبة والفوايد العالية ، خلي البنوك للمشروعات الكبيرة .. الصندوق في السنين اللي فاتت مول ونفذ مليون مشروع كلفها او ضخ لها 13 مليار جنية اعطى قروض لمشروعات بس مش شايفيين معجزة الشباب لسّه بيدوروا على شغل وفيه ناس اتعاملت مع الصندوق واتعثرت وفيه ناس ما يعرفوش حاجه خالص عن الصندوق عن البطالة وعن الصندوق الاجتماعي للتنمية بعد 18 سنة من تاسيسه حيكون لنا عنه النهاردة كلام ..... مسئول,الصندوق الاجتماعي للتنمية بيدعم المشروعات الصغيرة للشباب والمراة وصغار الصناع والمزارعين والمشروعات دى مفروض انها دلوقتي الوسيلة اللي تقدر تواجه الازمة المالية العالمية وتستوعب العمالة اللي بتتفنش في المشروعات الكبيرة اللي رؤس اموالها بالملايين .. المشروعات الصغيرة عايزة تكاتف ، قناعة ، راي عام يساندها ، عايزة تمويل سهل وميسر ، عايزة عايزة كمان نفهمها ,الامين العام للصندوق الاجتماعي للتنمية الاستاذ هاني سيف النصرحيكون لنا معاه النهاردة كلام .... مسئول ومن كلام الاستاذ هاني سيف النصر السبب في وجود نحو 9600 حالة تعثر نتيجة قيام بعض العملاء بصرف التمويل في غير الاغراض المخصصة لهذا التمويل ,الصندوق لم ولن يقاضي عميلا واحدا بسبب تعثره عن سداد القروض المستحقة عليه او تاخره في السداد او عدم قدرته على السداد ,لدينا 2,2 مليون عميل في انحاء الجمهورية يحصلون على دعم من الصندوق ما بين قروض لمشروعات متوسطة وصغيرة ومتناهية الصغر من بينهم حوالي نصف مليون عميل حصلوا على قروض لمشروعات متنهية الصغر ونسبة التعثر في مشروعات الصندوق لا تتجاوز 1%,مهمة الصندوق ليس فقط توفير التمويل ولكن ما هو اكثر من ذلك فالصندوق شريك كامل لعملائه خاصة من الفقراء وغير القادرين حيث يوفر لهم الدعم المادي والمعنوي والتدريب والتعليم واعادة التاهيل ومحو الامية كما نقدم لهم مشروعات جاهزة وقابلة للتنفيذ ونساعدهم ايضا في تسويق منتجاتهم الصندوق الاجتماعي للتنمية اضاف ايه حقيقي على ارض الواقع صنع حالة ؟ مهد ارضية للمشروعات الصغيرة ؟ طوّر المشروعات دي ؟ قدر يسوق منتجاتها جوه وبره؟ عمل انطلاقه اقتصادية وبالتالي اجتماعية ؟ نفذ مشروعاته ظ قدر يقرب من الهدف اللي اتاسس علشانه ؟ .. المين العام للصندوق الاستاذ هاني سيف النصر حيكون لنا معاه دلوقتي حالا كلام .... مسئول فاصل محمد صلاح: ارحب بالامين العام للصندوق الاجتماعي للتنمية الاستاذ هاني سيف النصر .. استاذ هاني انت بتشتغل في منطقة البطالة او احد الجهات اللي يفترض انها تقدم نماذج لعلاج مشكلة البطالة هو احنا عندنا اد ايه بطاله في مصر تقريبا لانه كل حد بيطرح نسبة مختلفة عن الاخر بتتراوح ما بين مليون او مليون نصف لحد ما بتوصل في بعض الاحيان الى خمسة وستة مليون انتوا تقديرتكم ايه ؟ ا/هاني سيف النصر: شوف حضرتك احنا تقديراتنا من خلال التقديرات الفعلية من خلال الاجهزة المعنية بها اللي هي نسبة من قوة العمل في المجتمع ، قوة العمل هو القادر والراغب في المجتمع ومش قادر يشتغل فدي احنا بنقدرها على اساس ان قوة العمل 22 مليون النسب بتتراوح بين 11 نزلت ل 9 فبتدور حول نسبة ال 10% ، ف 10% من 22 مليون فبنتكلم طبقا للاحصاءات الرسمية 2,2 مليون عاطل لكن انا عايز اقول لحضرتك ان المجتمع حاسس انها اكترمن كده بكتير لان فيه كثير من الناس اللي بيعملوا فعلا مش راضيين عن عملهم محمد صلاح: او دخلهم محدود. ا/هاني سيف النصر: يعني مثلا واحد خريج كلية بيشتغل شغله لا تليق بالدراسة اللي هو اخدها فبالتالي حاسس ان هو مازال عاطل وحاسس ان هو يُهان داخليا فدي بتعمل كِبر لنسبة البطالة فاحنا بنقول ان الاحصاءات الرسمية ودي بتصدر عن جهات مختصة زيي وزارة التخطيط و الجاهز المركزي للتعبئة والاحصاء طبقا لاخر تعداد بتتكلم في نسبة 10% من 22 مليون محمد صلاح: من اهداف الصندوق المساعدة – انا واخد الكود بالظبط – على التخفيف من حدة الفقرومواجهة البطالة يعني الصندوق من 18 سنة بيشتغل بس الفقر بيزيد ومشكلة البطالة بتستفحل ا/هاني سيف النصر:الصندوق له اهداف محددة اهمها زيي ما حضرتك قلت وهي المساهمة في ايجاد فرصة عمل وتخفيف حدة الفقر بنعمل ده من خلال اربع برامج البرنامج الاول برنامج المشروعات الصغيرة ده بنمنح قروض من 50 الف جنية حتى 2 مليون جنية مباشرة او بضمانات بنكية حتى 10 مليون جنية المشروع الصغير تعريفه ان هو المشروع اللي راس مالة اقل من مليون جنية واقل من 50 عامل طبقا للقانون بنهدف من البرنامج ده ايجاد فرصة عمل ناجحة مستقرة تضيف للاقتصاد القومي حقيقية لها دخل ثابت يقدر يعيش بيها يتجوز بيها متحدد له معالم بتاعتها وتكون مرتبطة بمشروع متوسط او مشروع كبير وعادة بنشتغل في الحضر في المحافظات او المراكز الكبيرة الموجودة في المحافظات – 29 محافظة و 1200 مركز – البرنامج التاني هو المشروعات متناهية الصغر ودي مشروعات من 500 جنيه الى خمسين الف جنية حتقول لي مشروع ب 500 جنية يعمل حاجه ؟ اه يعمل حاجه واحدة بال 500 جنية تنزل تشتري شوية مواد شوية خضراوات وتبيعها ..... محمد صلاح: ده مشروع ؟ ا/هاني سيف النصر: واحدة ربة منزل واحد بيشتري جرايد يوزعها واحد قاعد في البيت بنجيب له حاجات منزلية ...... محمد صلاح: ماكينة خياطة ، نول صغير ......؟ ا/هاني سيف النصر:كل المشروعات المنزلية والبيئية هدفها ايجاد فرصة عمل لكن الهدف الاساسي هو رفع مستوى الدخل وتحسين مستوى معيشة الاسرة وتعمل على دوران الاقتصاد في القرى والنجوع وترفع من اقتصاديات هذه المجتمعات ونستهدف فيها عادة المراكز والقرى والنجوع اللي هي 4600 قرية واكتر من 27 الف حي مستهدفين ومحددين .. البرنامج التالت هو برنامج المشروعات العامة والتنمية البشرية كتير مش شايفنا فيه البرنامجين اللي قلتهم لحضرتك بيجي لنا قروض من جهات مانحه وبنعيدهم اقراض تاني بمعنى عن معنديش منح او اموال من الدولة انا بتيجي لنا قروض طويلة الاجل ميّسرة باعيد تاني اقراضها في برامج المشروعات الصغيرة ومتناهية الصغر البرنامجين التانيين اللي هم برنامج مشروعات التنمية المجتمعية والبشرية عشان تخلق مجتمع ناجح بمشروع ناجح لازم يكون لك بيئة ناجحة وبيئة مواتية من صرف صحي ، مياه شرب ، تنمية ، تدريب ، ناس مؤهلة لهذا الوضع ، وحدة صحية دي برامج بتبقى مستهدفة مع الوزارات القطاعية ومع المحافظين بنقدر نشتغل في هذه الاوضاع وبنعمل منها فرص عمل كتيرة جدا .. البرنامج الرابع وهو برنامج نشر فكرة العمل الحُر وتقديم الخدمات غير المالية يعني فكرة الخدمات غير المالية هي كل ما يستطيع انه ينجح المشروع الصغير بمعنى اني بدربه ، ااهله ، اسوق له ، باعمل له كل الاجراءات الخاصة به ، ان انا انشر فكرة العمل الحُر احنا بنشتغل على كل ما ينجح المشروعات الصغيرة من خلال الاربع برامج دي – انت حضرتك بتقول انتوا عملتوا ايه خلال 18 سنة – وصلنا ل 800 الف مشروع في ال 29 محافظة يعمل فيهم ما يفوق ال 2 مليون عندي عنهم data مسجلة في كل دائرة ومدققين من جميع التدقيقية المحايدة والحكومية .. مسالة ان الفقر زاد ... هو الشعور يمكن زاد لكن انا ليا حدودي انا بشتغل على تخفيف حِدة الفقر محمد صلاح: انا بنقل لك ظواهر. ا/هاني سيف النصر: احساس .. احنا كلنا اكيد حسّين بكده واللي يقول عكس ذلك يبقى مش عايش في المجتمع فيه طبعا ناس بتعاني انا الى جانب اني امين الصندوق الاجتماعي انا عضو مجلس شورى عن دائرة من دوائر الفيوم وبنزل انتخابات فعارف الغني وعارف الفقير وبقعد مع المحتاج وبقعد مع الناس وبعرف احتياجاتهم فطبعا فيه احتياج فيه ضغط فيه شِده نتيجة ارتفاع مستويات المعيشة وناس بتحس انها مش قادرة تلبي احتياجاتها محمد صلاح: دي الحالة اللي موجودة . ا/هاني سيف النصر: لكن انا حقول لحضرتك لو بتتكلم عن الصندوق الاجتماعي البنك الدولي في اخر تقرير قدمه في سنة 2008 قعد لمدة سنة لخبراء محايدين لا نعلمهم ومراكز بحثية محلية وخارجية قال ان الصندوق الاجتماعي قدر ياثر بشكل مباشر وغير مباشر في المجتمع المصري ان 30% منه قدر ينتشله من الفقر لان احنا بنشتغل في عملية الفقر دي ازاي ؟ الفقر او الفقراء فيه وزارة التضامن هي مسئولة عنهم ومسئولة عن ال cash transfer اللي اعطاء المبالغ الخاصة بهم انا باخد زبوني او بقول هو ده اللي ببتدي منه الفقير احوله الى برامج عشان يقدر يشتغل احوله الى فقير نشط ثم الى محدود دخل ثم من محدود دخل الى طبقة اقل من متوسطة ثم الى طبقة متوسطة واعمل من خلال برامج طبعا ومن خلال مشروعات ان الطبقات ما تنزلش هتقولي انت بتشتغل على مجتمع كلع ..لا ..انا بشتغل على شرايح مجتمع انا بقدرفي حدود امكانياتي وفي حدود اموال وفي حدود الطاقات الموجودة وتستوعبها المجتمع ان انا بشتغل على كده يعني باخد واحد وابتدي اخده النهاردة ابتدي ادربه في تدبيش نهر النيل لو حضرتك شفت تدبيش نهر النيل من شبرا للصف والمشروع التاني من الصف لبني سويف وبيعمل فيه 180 الف واحد من الناس الفقراء المعدمين عشان ياخد بس يشتغل شغل بسيط جدا يكسر حجارة دا انا بديك مشروع بسيط جدا من مشروعات التنمية محمد صلاح: احنا عندنا حوالي 160 الف خريج من المؤهلات العليا كل سنة وعندنا حوالي 600 الف من المؤهلات المتوسطة بانواعها المختلفة يعني دول عايزين وظايف غيراللي ما اشتغلوش من السنين اللي فاتت يعني تقريبا سوق العمل بياخد حوالي مليون كل سنة ا/هاني سيف النصر: لا شوف حضرتك اللي بيتخرج في حدود 700 الف طبعا بيتسرب منهم عدد من التسريب يعني نتكلم في حدود من 500 ل 600 الف واحد وفيه تراكمات لو بنتكلم عن 2 مليون متراكم مثلا موجود معانا هنا احنا كصندوق اجتماعي احنا بنحقق في حدود 300 الف فرصة عمل سنويا كان ابتداءنا من 60 الف ل80 الف ل200 ل 250 الف ..السنة اللي فاتت حققنا في حدود 350 الف طبعا على اختلاف انواعهم فيه مشروعات متناهية الصغر ومشروعات صغيرة..احنا بنشتغل فيما كل ماهو انتاجي ، انتاج زاعي انتاج صناعي انتاج سياحي كلا ما يعن في تفكير حضرتك يعني انتاج صناعي ملابس, اغذية ، الزراعة منتجات زراعة ، تعبئة ، تعليب والسياحة ان كان الفئات السياحية محمد صلاح: طب خلينا نتكلم في نقطة فنية ، لما يكون فيه خريج درس تجارة وبعدين بعمله مشروع صغير للنسيج يعني في البداية اتكلمت عن انه احساس الخريج انه بيشتغل في مهنة اخرى دا بيصدر له نوع من الاهانة او احساس انه لسه منتظر وظيفة اخرى دا طبعا غير انه مصاريف التعليم على الاسرة عالية جدا يعني حتى اللي في مدارس حكومية احنا عارفين الدروس الخصوصية بالاضافة طبعا للي بيدرسوا في مدارس خاصة وطبعا التعليم العام الجامعي ودلوقت بقى التعليم الخاص الجامعي يعني الاسرة مطحونة وبتصرف كتيرهل بتقبل الاسرة ان كل دا يروح كده وابنها اللي متخرج من الطب يشتغل في النسيج ؟ ا/هاني سيف النصر: طبعا اى واحد جاي يعمل مصنع يا اما بيكون دبلوم صنايع وفاهم وعنده خبرة سابقة عشان كده كل ماهو تجاري كوافير نجار ترزي كل الحاجات اللي فيها خدمات باختلاف انواعها عندنا الاف المشروعات ، كل ماهو مهني النهاردة جالي الدكتوريقولي اعمل ورشة نجارة ارفض اقوله حرام انا ربنا يحاسبني شخصيا ان واحد تعب 7 سنين واكيد كنت متفوق عشان دخلت طب وتعمل ورشة نجارة يقولك ماهي بتكسب اكتر اقوله لا ..عايز تعمل عيادة بعمل عيادات ، عامل لكل الاطباء وعامل برامج خاصة لدكتور الرمد ودكتور الاسنان لانها عايزة تكلفة اعلى ، حضرتك دكتور وعايزتعمل عيادة وخريج هو يا انك عندك عيادة او قانون خمس سنين عشان اضمن انك انت تشتغل لمدة خمس سنين بتجيب الاجهزة احنا متعاقدين مع وكالات ومتعاقدين مع كليات الطب ومتعاقدين مع النقابة فبتضمنك او من خلال الجمعيات الموجودة ممكن تكون عايز تعمل وحدة صحية اومستوصف صغيربتجيب اربعة اوخمسة كل واحد ياخد قرض من القروض وبتعملوا واحد بتاع اسنان واتحد بتاع رمد واحد بتاع اشعة وبتعمل وحدة صحية او مستوصف المهم يكون ليك دراسة جدوى وتكون الجهة اللي انت تابع ليها ان كانت مثلا نقابة الاطباء او نقابة اطباء الاسنان او الجامعة احنا عاملين مع جامعة القاهرة وعاملين مع عدة جامعات المشروعات دي فبنضمن انك انت جاد على الاقل وبضمان المكان اللي هو موجود فيه بنقدر ان احنا نمول ، محامي بنفتح له مكتب وعندنا قرض للمحامي الابتدائي والمحامي الاستئناف ومحامي النقض ممكن واحد بقاله 10 سنين بيشتغل موظف وعايز يفتح وبقى مسجل نقض وبقى ليه انه يحضر في محاكم النقض والمهندس والمحاسب والصيدلي محمد صلاح:طب في النقطة دي الحالات اللي بتتفنش من القطاع الخاص الناس زمان تتمرمغ في تراب الميري ، دلوقت الحكومة ما بتعينش والقطاع الخاص بيفنش عمال بيصرف الناس ، الناس اللي بتخرج من القطاع الخاص تبقى مؤهلة انها تجيلك عشان تاخد مشروعات ولا بتكون دا فرصته عدت؟ ا/هاني سيف النصر:لا اي واحد موجود ويكون عنده القدرة والرغبة احنا بنحاول على قد ما نقدر ان احنا نوصل للناس دلوقت معنديش شروط غير حسن سير وسلوك والاهلية انه يكون تامم 21 سنة ويكون مدرب او عنده خبرة على هذا المجال او يخش في احد مراكز التدريب الخاصة بينا عشان يبقى مؤهل محمد صلاح: طب كلمني في الضمانات ايه الضمانات اللي بتطلبوها ؟ ا/هاني سيف النصر: المشروع نفسه يعني حضرتك عايز تعمل مشروع من اللي احنا قلناهم دول كلهم عايز المكان لو ملكك او ايجار انا ببقى اخد عقد الايجار لو عايز ماكينات انا بشتريلك الماكينات او بضمن ان الماكينات بتجيبها تحت عينيا وبتطلع الفاتورة بتبقى ملك صاحب المشروع بس راهنها ما يقدش يتصرف فيها غير لما يسدد ، عايز راس مال عامل وعايز دفعات باديهالك على سبيل الامانة عشان تقدر تصرف فالنهاردة حصل تعثر لا قدر الله او حصل مشكلة انا بقف معاك مرة واتنين ..في مرحلة ما لما كان بيحصل تعثر كانوا بياخدوا اجراءات قانونية وكانت الناس بتسجن مفيش عميلب النهاردة موجود بسبب الصندوق الاجتماعي موجود في السجن بمنتهى البساطة انا جاي من خلفية مصرفية وعارف بتعامل مع ايه ، التعثر يا اما اخد اكثر مما يجب فانا بزود له انتاجيته عشان يوصل للقيمة يعني هو خد 100 الف وهو المفروض كان ياخد 60 الف فالمفروض تزود له انتاجيته بما يصل ل100 الف يا اما خد اقل مما يجب كان لازم ياخد 100 الف وادينا له 50 الف فبديله الباقي عشان تقدر تشتغل بالياتك غلط الدراسة اللي احنا عملناها معاك ، يا اما بسب ظروف اسوق او ظروف خارجة عن ارادته زي مثلا اللي بيشتغلوا في الدواجن في فترة معينة احنا عارفين انه راجل امين وراجل نزيه اشتغل وعمل كل اللي عنده لكن حصل له ظروف خارجة عن ارادته لكن فيه ناس هيجوا يتكلموا يقولك لا هانمي دا بيقول كده وفيه بنوك بتاخد ضمانات لان انا عندي اكترمن 1000 مشروع نمطي انا جاهز بيه وعارف دراساته وعارف تسويقه وتنافسيته فعارف ان دا نجح بيجيلي واحد من المستفيدين ومن اخواتنا الشباب يقولي انا عايز اعمل المشروع الفلاني اقوله ما ينفعش دا في الكمنطقة دي فيه كذا واحد والمشروع اللي هتعمله هينتج بخمسة فيه غيرك بيعمله باتنين ما ينفعش يقولي لا اقوله طب هات لي ضمان عشان فلوسي ماهو لازم استرد هذا انت عارف حضرتك الصندوق الاجتماعي بيقرض ولازم يسترجع هذه النقود اه بيدي دعم بس محدد فلما بيبقى داخل في مشروعات انا ذات نفسي الصندوق والزملا في المكاتب الاقليمية انا عندي بنضطر ان انا اخد ضمانات عشان اضمن المشروع لكن اللي انا بقول لحضرتك عليه المشروع اللي ضامن نفسه المشروعات المعتمدة من داخل الصندوق الاجتماعي او هو يقنعنا ان هذا المشروع له جدوى اقتصادية يمكن ان يسدد نفسه محمد صلاح:ال13 مليار اللي انفقهم الصندوق على المشروعات دول عبارة عن ايه ، ايه القروض اللي اتمنحت للناس وبتحصلوا عليها بعد كده باقساط ولا دا كان دعم للناس ولا من راسمال الصندوق ؟ ا/هاني سيف النصر: احنا انفقنا 13، معناه انه بيحصل تدوير للقض احنا عندنا مثلا احنا النهاردة رصيد الصندوق 6 مليا ر جنيه بيشتغلوا في السوق بديك النهاردة قرض بتسددوا لي السنة الجاية وفيه مشروعات تنمية مجتمعية وبشرية احنا اشتغلناها ودخلناها في جميع محافظات جمهورية مصر العربية ، الباقي اقراض وبيتم تاني استرجاعه وبيتم تاني يا اما بنقض مباشر من خلال الصندوق او بنقرض من خلال البنوك او بنقرض من خلال الجمعيات الاهلية محمد صلاح: ايه مدى العلاقة القائمة بين الصندوق وبين المقترض من الصندوق ازاي بتتاكد انه ناجح وشغال مش متعثرمعندوش مشاكل ؟ ا/هاني سيف النصر:عندنا مكاتب اقليمية في كل مكان يعني انت حضرتك يعني لو انت في قنا وعايز تاخد القرض ما ينفعش تتاخد القرض من القاهرة لازم تاخده من مكتب قنا ، لازم يكون مدير الفرع موجود ومستعلم عنه من خلال بنوك او من خلال الجمعيات ليه حد معين لا يزيد عن 50 الف ما يزيد عن ذلك في لجنة ائتمان ماسك مثلا قنا واسيوط وسوهاج ماسكهم مثلا ثم ما يزيد عن ذلك بتبقى الادارة المركزية في قنا عندنا قسم متابعة بيخش يعني في محافظة ما بيبقى فيه 140 الف واحد فما تقدرش انك انت تستوعبهم فبنشترك معاهم من خلال جمعيات اهلية من خلال تقارير بتجيلنا من خلال ناس بنقدر نستطلع منهم الراي محمد صلاح: ايه اكترالشكاوي اللي بتجيلك ؟ ا/هاني سيف النصر: ان هما لا لاقيينا ولا احنا لاقينهم ، انا عندي شغل كتير جدا ما تزعلش مني اهم من انا اقعد اتكلم في برنامج لكن انا بعتبر ان وجودي في الاعلام وفي الصحف ووجودي في القنوات المرئية هو دا اعلان ان انا بوصل بيه للناس ... فيه ناس كتير مش عارفين احنا بنعمل ايه يقولك اروح لك فين او يقولي انت بتقول عن فرص عمل هي دي وظيفة اقوله لا دي مش وظايف فمحتاجين ان احنا نعلن عنها قد يكون العيب منا احنا يعني انا كنت مقل شوية في الاعلام في فترة ما لغاية لما يكون عندي ارض صلبة ويكون عندي القدرات الذاتية ان اناى اقدر احقق اللي انا بقوله واقدر اخليه على ارض الواقع فانا النهاردة انا محتاج اوصل للناس محمد صلاح: انا كنت هكلمك على الاتصال الشخصي ظهورك في وسائل الاعلام قد يكون مطلوب لكن الاتصال الشخصي بالناس هو الوسيلة الاكثر اقناعا ليهم ؟ ا/هاني سيف النصر: بنحاول نعمل ندوات بنحاول نقعد مع الناس ، عاملين حاجة اسمها العربية المتنقلة لان انا ليا مكاتب في كل المحافظات لكن ماليش في كل نجع فبنعمل عربية متنقلة تقوم تخش الاندية يوم الجمعة بتروح تقف في الجوامع يوم الجمعة تقف على الكنايس يوم الحد بتروح في الماتشات الكبيرة تروح تقف على الباب يعني اي اماكن تواجد للشباب في عربيات بتنزل بتنشر فكر الصندوق الاجتماعي احنا بنقول احنا شركاءكم تعالوا عايزين نشتغل مع بعضينا مش عاوزين منكم حاجة انما مش هدفي الربح الصندوق لا يهدف للربح بس انا بربح ليه عشان عندي مصروفات واقدر اسدد الالتزامات اللي عليا واقدر ان انا اجيب ناس اكفاء يقدروا ان هما يديروا المنظومة دي ويقرضوا ويقترضوا لان انا لازم اجيب عناصركويسة تقدر تشتغل في الحاجات دي وانا كل اموالي من جهات مانحة محمد صلاح: داخلية ولا خارجية ؟ ا/هاني سيف النصر:انا بتعامل مع العالم كله 33 جهة عالمية مفيش جهات مانحة من مصر انا الجهة المانحة داخل مصر محمد صلاح: يعني انت بتمنح اللي عايزين يعملوا مشروعات صغيرة لكن مفيش رجال اعمال ، مؤسسات خيرية بتيجي للصندوق وتقوله خد ال3 او 4 مليون دول شغلهم عشان الناس الغلابة ؟ ا/هاني سيف النصر: والله ياريت ... لكن فيه تعاون مع القطاع الخاص يعني لما تتكلم عن بعض شركات الاتصالات وبعض شركات الاغذية المشهورة هي لما تيجي تخاطب حد تخاطبه لمصلحته يعني بعض الشركات الكبيرة من خلال مشروعات ان انا بقول مثلا ان شركة X الشركة دي بتيجي انا باخد الشركة دي باديها لعميل صغيربخلق وبستنسخ النجاح منذ اليوم الاول في الشركة الكبيرة للشركة الصغيرة شركة طبعا بعشرات المليارات لما اعمل شركة بمليون جنيه او ب500 الف واجيب 10 شباب يمتلكوها تحت ادارة الشركة الكبيرة مقابل ان هو يحط اللوجو بتاعه وينشر في محلات دا نوع من الدعم ، مقابل ان هو يجيب الشركة بتاعته كلها ويقوم حاطط الاعلان بتاعه ويجيب شباب يشغلهم وانا قارضهم ويكون قرض مثلا ب50 الف لكن مديله مشروع ب150 الف مقابل انه يحط الاعلام لمدة سنة او اتنين بتاعه دي كلها بتشجع الناس طبعا فيه رجال اعمال كويسين جدا ان هما بيشتغلوا وبيشغلوا ناس طب تعالوا ندرب لكم ناس نشغل لكم ناس تعالوا احنا عندنا بعض الصناعات وانا اقول لحضرتك حاجة الصناعات الصغيرة دي تجربة العالم كلها لن يكتب لها النجاح الا لو ربطتها بمشروع متوسط وكبير يعني بنقول لو عندنا 1000 مصنع لازم يكون حواليهم 20 الف مصنع صغير يخدمهم محمد صلاح: حصلت في الصين وحتى الامريكان دلوقت فهموااهمية المشروعات الصغيرة . ا/هاني سيف النصر:دا انا هوصل لحاجة مصانع الملابس تلاقي محلات بتعمل السوستة انا رحت شفت الكلام دا في الهند السوستة بتتعمل سوستة عادية تتعمل الجزء الشمال والجزء اليمين ..لا دا بيشغل الناس تعمل الجزء اليمين طب ليه كده قالك عشان ما ياخدش تدريب اكتر وتبقى ال quality عالية ، الزرار والخيط بتاع الزرار فبالتالي النهاردة اتصالي برجال الاعمال واتصالي بالمشروعات الكبيرة والمتوسطة دا بيخلينا نخلق مشروعات حوالين هذه المشروعات دي تكملها وتغذيها وفي نفس الوقت انا ان مكنتش اخاطب صاحب المشروع الكبير بقوله انك انت بتخفض تكلفة بتعمل استقرار للمنتج بتاعك بتجنب الواردات بتاعتك وبتبقى انت عندك منتجات محلية بتقدر تشتغل في هذا الوضع فهو بالتالي عنده مكسب مادي قبل ما يبقى عنده مكسب اجتماعي او مكسب تنموي محمد صلاح: فتحت انت مجال مهم جدا هندخل فيه بعد شوية خليك معانا لسه الكلام مخلصش فاصل محمد صلاح: لما سالت الاستاذ هاني سيف النصر عن اكتر الشكاوى اللي بتوصل لهم تركزت في انه الناس مش لا قية الصندوق ولا الصندوق لا قي الناس وبيحاولو ا يحلوا المعضلة دي عندنا تقريركده لاراء بعض الناس تيجي نشوفه ا/هاني سيف النصر: ياريت محمد صلاح: نشوف الناس قالت ايه عن الصندوق . فاصل مواطن1: انا من محفظة سوهاج وطالب قرؤض بقالي 3 شهور فانا عايز اعرف موقفين ليه القرض بتاعي لغاية دلوقت هل ياترى عشان 2 موظفين طب انا معايا 5 فدادين بس انا اللي طالبه يحاولوا يمشوا مشروعي شوية لان انا بقالي اكتر من 4 شهور مقدم مواطن2: والله هو الصندوق الاجتماعي هو نظام كويس لانه بيدي قروض للشباب وبيساعده انه يجيب شقة مواطن3: انا شاب وخريج دبلوم ومعرفش اي حاجة عن الصندوق الاجتماعي مواطن4: والله سيادتك انا معرفش ايحاجة عن الصندوق الاجتماعي مواطن5 : انا اسمع عنه من الجرايد لكن معرفش ايه مهماته فاصل محمد صلاح: فيه مشكلة فعلا تتعلق في التواصل بيبن الصندوق والناس؟ ا/هاني سيف النصر: هقول لحضرتك المشكلة دي دايما بقول احنا اللي غلطانين طبعا الشباب عنده مشاكل كتيرة جدا وعنده طموحات عالية جدا وهو محتاج ان كل حاجة تبقى ميسرة ليه ودا حقه طبعا الصندوق مش هيحب كل مشاكل المجتمع لكن انا بقول للشاب اللي هو في سوهاج عنده 5 افدنة بس انا مش عارف ايه مشكلته انا ليا زملاء جايين معايا البرنامج لان ةهو ممكن يكون راح بنك التسليف او البنك الزراعي يقوله عندك فلوس يقوم يرد عليه اي رد يقوم ماشي واحد عنده خمس فدادين حيازة انا اديله من بكرة محمد صلاح: ايه وضع البنوك مع الصندوق يعني ليه البنوك ما بتقرضش الناس القرض بيجي من الصندوق مش من البنك ؟ ا/هاني سيف النصر:هو البرامج عندنا برامج مباشرة على طول الصندوق بيقرض احنا عندنا رجال كانوا فيلا بنوك وائتمان وعلى اعلى مستوى عشان الجنيه اللي يطلع لازم يرجع عندنا فيه مبالغ بنعطيها عشان نشجع المجتمع بنديها للبنوك لان طبعا البنوك منتشرة احنا بنشتغل مع نوك قطاع عام او قطاع خاص وبنوك اجنبية بنشتغل معاهم كل بنك له طبيعة معينة محمد صلاح:ايو بس الفايدة تبقى ازاي ؟ ا/هاني سيف النصر:انا بحدد لان انا باديله المبلغ وبعيد اقراضه طبعا فيه بنوك بتشتغل لوحديها لكن انا عندي برامج معينة ببقى متفق مع البنك ببقى متفق ان المبلغ بياخد فايدة ال7% اللي هو الجديد و9% اللي هو القائم وبديله عائد معين مناسب ولو حصل تعثر خلال 45 يوم بقوله ما تاخدش اجراء قانوني ارجع لي الاول عشان انا اقدر اخش اشوف المشكلة ، الجمعيات الاهلية بديها مبالغ وبقولها عيدي اقراضها في برامج معينة وانشطة معينة ، النقطة الناس اللي تقولك متعرفش الصندوق يعني لو مالكش احتياج انك انت تشتغل وتشتغل شغل ذاتي مش هتسال عن الصندوق محمد صلاح: ايوه بس الصندوق يبقى مطروح بدون ما يكون عندي تفاصيله اوحتى الوصول اليه بس يبقى عارف ان في مصر فيه حاجة اسمها الصندوق الاجتماعي لما يتخلق جوايا الاحتياج هروح الصندوق ؟ ا/هاني سيف النصر:بالظبط والنقطة اللي بقول لحضرتك عليها اللي هي ثقافة العمل الحر انا متاكد ان الراجل اللي قال انه ما يعرفش حاجة عن الصندوق الاجتماعي هو مش عايز ييجي ليه..؟ لانه عاوز وظيفة نمرة اتنين لو قلت له مفيش وظيفة هو يقولك انا مش عايز اختلط عشان كده انا بؤكد انا لو حصل ان المشروع دا اتعثر مش هيحصلك حاجة وهساعده انه يقوم من التعثر فيه فكر بيقولك دا كلام لو رحت ولو اتعثرت هيدفعوك الفلوسطبعا الشباب معذور وانا بنزل وبقعد مع ناس وبتقبل نقد جامد جدا وانا عارف ممكن يكون الغلط منهم لكن لازم اقعد واسمع ودايما اقول لزملائي في الصندوق هما الصح واحنا الغلط لان انا بعتبر دول زبايني ولو هو دخل المحل بتاعي ومالاقاش الاكلة اللي هو عايزها يبقى انا الغلط ان انا بعمله شئ هو مش عايزه فبقولهم اكيد لازم ندور الناس دي عايزة ايه لقينا النت والكمبيوتر وال IT ابتدينا نكثف البنوك رفضت تخش في هذا المجال لانه خطر جدا ابتدينا نشتغل في اقراض مباشر يعني كل شاب تعال اشتغل في ورشة تعال اشتغل سباك كناس يقولك انا مش صنايعي ، يعني واحد عامل انترنت كافيه دا محتاج مكان وكمبيوتر دي بتجيب تمنها في 8 اشهر لما قلنا الكلام دا بقى فيه اقبال جامد جدا قلنا برضه الموبايل وخدمات الموبايل والمحمول عاملين اكترمن 500 منفذ في جميع المحافظات محمد صلاح: دا كلام جميل جدا مسالة المرونة في عمل الصندوق بس هقولك على نقطة تانية ممكن تحقق مشروع ناجح وفي نفس الوقت بتساهم في حل بعض المعضلات عندنا مثلا مشكلة الزبالة ، مكنش في افكارتتعلق بالتعامل مع مشكلة قفزت الى واجهة الاحداث بهذا الشكل انه اعادة تدويرالزبالة لمها جمعها تصنيعها اي حاجة يعني . ا/هاني سيف النصر: انا عارف قدر نفسي كصندوق اجتماعي ليا امكانيات ، منشية ناصر مع الاستاذة يسرية لوزة ساويرس نموذج من انجح النماذج بس لازم تكون المنظومة متكاملة من اول لم القمامة فرز القمامة بس دا مشروع كبير مش مشروع صغير ، المشروع الصغير ان انا اعمل RECICLE انك تديني المادة الخام دامشروع مربح مش مشروع تنموي وبس دا من اكتر المشروعات المربحة بس محتاج الى منظومة متكاملة لكن فيه جهات تانية اكبر منا بتشتغل في هذا الموضوع في اللم والمعالجة محمد صلاح: كانوا زمان .. لما جابوا شركات خاصة محدش بقى بيشتغل . ا/هاني سيف النصر: انا بمول اي مشروع يخص تدوير القمامة لكن المسئول بيبقى عايز الجهة تورد له المفروز اللي هي ان كانت مثلا المخلفات الورقية ، الزراعية المخلفات البلاستيكية اللي هي فرز جميع انواع الزبالة اللي موجودة لكن احنا طبعا في الازمة دي فكرنا وعملنا مشروع بس لسه لم يكتمل مع السادة المحافظين ومع وزارة التنمية المحلية في الموضوع دا وابتدينا ناخد بعض المناطق لكن دا مشروع مربح لكن كبير محمد صلاح: مرتبط بدا ظاهرة اخرى انا بكلمك عن ظواهر فيه ناس كتير حتى لو عرف الصندوق ما بيعرفش يعمل مشروع واللي بيخاف من الضمانات او القروض يخاف يتعثر خبرته في التعامل الانساني حتى مع البشر في ادارة مشروع ضعيفة شوية ويكون معاه راس مال صغير معاه 20 او 30 الف جنيه بيروح يديهم لواحد سمسار يروح يركبه مركب فيبقوا 200 او 300 شاب كده يركبوا المركب وعشان يوصلوا ايطاليا ولا اليونان وبيموتوا ايه دورالمشروع هنا خصوصا انه فيه قرى او مناطق معينة في مصر مصدرة للهجرة غيرالشرعية ؟ ا/هاني سيف النصر: طبعا قعدنا اتكلمنا معاهم في المناطق اللي هي متمركزة فيها الوضع دا هو اللي بيسافر دا بيبقى شاب محبط جدا وبيبص لبصيص امل لان النقطة كمان ان الواحد يبكي ان اللي بيسافر دا وبيغرق وبينقذ بيرجع يستلف تاني محمد صلاح: وما بيروحش الندوق برضه ؟ ا/هاني سيف النصر: برضه لاه عاوز يتغني غنى وكمان الاعلام بيسهل الموضوع ان نماذج كتيرة جدا بيركب المركب وبينزل وبعدين بعد سنة يتجوز البطلة ويبقى مليونير ويرجع وما بيقولش ازاي يبقى مليونير ، انا قعدت مع مجموعة كبيرة جدا وقعدن مع ناس موجودين في الفيوم فيه منطقة معروفة اللي هما بتوع ايطاليا هو متصور انه بيدفع 20 الف او 30 الف وبيسافر ويرجع يبقى معاه مليون و2 مليون و3 مليون الطموحات مش وحشة بس بنقوله لوعايز تسافر ايطاليا مع وزارة القوى العاملة عاملين شغل كويس جدا ان احنا بنسفر ناس لايطاليا محمد صلاح: طب ليه ما تدلوش بديل ؟ ا/هاني سيف النصر:فيه ناس بتيجي وبتعمل كده وفيه ناس لما تكون جادة والشاب جاد بيقدر يعمل كده لكن دي مازالت مشكلة كبيرة جدا محتاجة جهد كبير محتاجة جهد من العام محتاجة جهد من الصندوق لان هو طبعا بيبص للي بيؤثر عليه ، احنا جهدنا فيه ان انا بوعي الناس وبدي البديل الاخر او بدربك للخارج يعني الصندوق برضه فيه نقطة فيه كتير بيفتكروا ان انا ممول ، انا بعمل على ايجاد مشروع يعني بديله التمويل المباشر سواء من الصندوق او من الجمعيات الاهلية بدوهوله تمويل اقراض مرابحة مشاركة ، فيه ناس تقولك لا القروض ربا في بعض المناطق في الشرقية قلت له حاضر خد بالمرابحة خد بالمشاركة انا مش هخش في جدل انا المهم انا اشغلك عايز الفلوس باي وضع اخش معاك شريك وبعدين لاهم حاجة انا بعملها كصندوق ان انا بعمله دراسة الجدوى و بؤهله فيها عشان يقدر يسوق منتجه يعني مشروع ابني بيتك الدولة بتبنيه وفيه جهد كبير جدا من وزارة الاسكان فاحنا بصينا قلنا كل شقة محتاجة فرش فعملنا نماذج من فرش من اوضتين نوم بانتريه كويس باوضة سفرة بمطبخ ب9500 جنيه هو الفرش دا متكلف 8900 محمد صلاح: مين اللي مصنع الفرش دا بقى ؟ ا/هاني سيف النصر:شباب من عندنا من بتوع الصندوق واقسطه على 15 سنة فيطلع في حدود 40 جنيه في الشهر انك انت تاخد شقة بالمفتاح وبجيبله معاها ب3500 تليفزيون وتلاجة وبوتوجاز وغسالة وسخان فبالتالي ما تحطش فيها حاجة نهائي ، الفكرة مش ان انا افرش للناس لا دي مش شغلتي انا اتعاقدت مثلا مع 100 الف في الفيوم اتعاقدت اتعاقدت في المنصورة مع 200 الف وحدة بعمل وحدات كاملة باجيبله الخشب بالجملة بجيبله المنشار بجيبله التصميم بجيبله الوحدات محمد صلاح: طيب بقية المجتمع متعاون معاك ازاي الاجهزة الرسمية والحكومية ؟ ا/هاني سيف النصر:انا بيراسني رئيس مجلس الوزراء وتشكيل ادارة الصندوق بيخلي الكل لازم يتعاون محمد صلاح: خليك معانا لسه الكلام مخلصش . فاصل محمد صلاح: كل الاجهزة الحكومية متعاونة مع الصندوق والصندوق شغال عندنا مداخلة للاستاذ سعد هجرس عن الصندوق الاجتماعي لتنمية نسمعها ا/هاني سيف النصر: قوي محمد صلاح: نشوف الاستاذ سعد هجرس. فاصل الكاتب الصحفي/ سعد هجرس: من ضمن المسائل التي تحتاج الى تطوير انه كيف يتم التعاون بالذات مع مشروعات المتناهية الصغر وكيف يتم التعامل مع قضية ثقافة العمل الحر لانه مازال المصريين بيخشوا من مسالة العمل الحر ومازال الغالبية العظمى من المصريين تعتقد ان الحماية في الميري حتى لو كان الميري اقل ودا ماهواش نابع من فراغ لانه الواقع العملي بيقولنا انه العمل في كثير من المشروعات الخاصة ليس فيه تامين بالنسبة للمستقبل ما فيهوش تامينات اجتماعية لما بتاكتب العقد بتكتب معاه استمارة 6 اللي هي الاستقالة وفيه الاعيب كثيرة تتم وعموما هذه القضية اللي بتسمى في ادبيات العمل الان قضية العمل اللائق فاصل محمد صلاح:الاستاذ سعد هجرس متحدثا عن الصندوق الاجتماعي للتنمية عندك تعليق يا ستاذ هاني ؟ ا/هاني سيف النصر: هو لمس حتتين مهمين قوي ان الاقراض متناهي الصغر هو دا اللي بيوصل للمجتمع وهو دا اللي بيحد من الفقر فعلا بيرفع دخل بيحسن مستوى معيشة بيوجد فرصة عمل محتاجين ان احنا نوصل اكتر للمجتمع لسه فيه ناس كتير لم تمول او متعرفش البرامج المتناهية الصغر فاحنا عندنا دلوقت بنوسع فيها فيه عندنا نسبة انه 50 % مشروعات صغيرة و50 % من حجم التمويل المتناهي الصغر طبعا كل جنيه في المشروعات الصغيرة اه بيحقق فرص عمل بيحقق اقتصاد وتنمية لكن الجنيه في المشروعات متناهية الصغر بيوفر معيشة كريمة لاسرة بيرفع دخل بيحسن مستوى معيشة بيساعد القرية المصرية انها تنمو وانها تشتغل محمد صلاح: خلينا نتكلم على موضوعات التسويق للمشروعات الانتاجية اللي بيعمل اثاث اغذية بتساعدوهم ازاي في مسالة الترويج والتسويق ؟ ا/هاني سيف النصر:ممكن كتير قوي يقول ما يروح يستلف من بنك ..لا احنا لسنا ممولين لكن مساعدين لاقامة مشروعات وانجاحها ومساندتها اهم حاجة ازاي ينتج ويوصل لتنافسية جودة وسعر محلي وخارجي لان انا بشغل التصدير انا عندي 30% من عملائي بيصدروا انتاجهم بالكامل لمراكز بيع في العالم كلها ، عندنا مبنى كامل لعرض المنتجات الخاصة في ارض المعارض دا موجود بس للمشروعات الصغيرة وممكن بنعمل خيم بنعمل معارض خارجية بنتفق مع جهات انا الحمد لله براس المشروع العربي للمشروعات الصغيرة ، الاهم من ذلك التدريب والتاهيل عشان يقدر ياخد القرض محمد صلاح: يعني المشروعات الصغيرة بتساهم في تصدير 60 % للصين ، 56 % في تايلاند ، 70% في هونج كونج ، 43 % في كوريا ، ومصر 4% امتى بقى نوصل للارقام دي ؟ ا/هاني سيف النصر: لا النسبة اكبر طبعا في وزارة التجارة النسبة كبيرة وهما يعملوا انا مش عندي النسبة دلوقت لكن انا بساهم منتجات الصندوق الاجتماعي فيها 30% بتتصدر ممكن ما تبقاش مسجلة تحت اسم الصندوق الاجتماعي فيه بعض رجال الاعمال بياخدها في صناعاته وبيصدرها او بياخدها في بتصدير باسم الصندوق الاجتماعي او بتطلع في معارض مع الصندوق الاجتماعي لكن دا مش معناه ان انا راضي، الارقام هزيلة جدا برضه لازم الارقام تمثل 80% من عصب الاقتصاد القومي عشان المشروعات الصغيرة بتبقى تكلفتها اقل جودتها اعلى محمد صلاح:ايه الافق اللي انت تتمننى او تستهدف انك انت توصل له انك تمثل اوتشغل كام واحد في مصر تخفض قد ايه من نسبة البطالة تسوق بكام مليارسلع ، تصدرقد ايه ؟ ا/هاني سيف النصر: لا طبعا انا لازم الكون من ضمن منظومة مجتمعية متكاملة انا طبعا اتمنى اني استوعب كل العمالة اللي موجودة اللي لا تجد فرصة عمل مناسبة اقدر اساهم بنسبة كبيرة جدا في التصدير ان انا اوصل لجودة عالية جدا بحيث ان جميع الشركات العالمية تبقى مهتمة وبالمناسبة فيه ناس بتستورد حاجاتنا على وجه التحديد وشركات كبيرة ، كنا في اخر زيارة للصين احنا النهاردة بنعمل منطقة حرة لشباب مصر وشباب الصين عشان ينتج كل المنتجات الصينية اللي بتصدر للمنطقة العربية ان شاء الله لان هو بيبوصل لمنطقة الانتاج الغزير جدا فبيخفض تكلفته والدولة بتدعمه بمبلغ معين فبالتالي يخش ينافس الاسواق فبيقدر يغزوها ودا امل بنتمناه محمد صلاح: مشروع المنطقة الحرة مع الجماعة الصينيين هيفيدنا في ايه ؟ ا/هاني سيف النصر:هما كانوا طالبين ان احنا نتعاون معاهم احنا بتدرب معاهم فيه منطقة اخترناها احتمال تكون في طر يق مصر الفيوم بين اكتوبر وبين الفيوم شباب صيني وينتجوا بهدف انه يصدر للمنطقة العربية كلها والشباب المصريين معاهم يعني بدل ما يبتدي يشتغل على سوق مصري فيه 80 مليون نسمة بيشتغل على سوق عربي فيه 320 مليون نسمة دا الوضع بتاعه من خلال الاتحاد العربي للمنشات الصغيرة هيحصل تعاون ، اعتقد ان دا ممكن ينمي بعض الصناعات بالذات المغذية والمكملة لبعض الصناعات محمد صلاح:شفنا قد ايه الصندوق الاجتماعي ممكن يكون قاطرة للتنمية في مصر عندنا امل كبير نبقى زي الجماعة الصينيين يمكن الصندوق بيطرح مشروع لمنطقة حرة مع الصينيين معرفناش نبقى زيهم نشتغل معاهم يمكن في يوم من الايام نبقى زيهم قال الامين العام للصندوق الاجتماعي للتنمية الاستاذ هاني ابو النصر كلامه النهاردة معانا كان كلام جميل كلام معقول اكيد كان كلام ..... مسئول خلص الكلام سلام نلتقي في الحلقة المقبلة .
