شباك علي الثورة

لنا وطن

تطلع الأخ جون السويسري نحوي بدهشة فقلت له:
- خير ياحاج فيه حاجة؟
ضحك وقال:
- فيه حاجات
قلت له:
- وكاتم في نفسك ليه؟ ما تنطق.. بتبحلقلي كده ليه؟
قال:
باتفرج.. فيه مانع؟
قلت له:
اتفرج ياخويا اتفرج علي أقل من أقل من مهلك وعموماً مادام بتتفرج يبقي لازم تسمع برضه.
قال لي:
- سمعني
قلت له:
واد من شباب الثورة اسمه مايكل عادل كاتب بيقول
من دون ولاد الخلق
لنا وطن ينعاش
فيه الرغيف بالدم
أما الفرح ببلاش
فيه الجعان يشبع غنا
طول الليالي معاه
وفي النهار متهان
ودموعه ماتسواش
والضهر بيناجي بلاده
اللي أكيد سامعاه
وف وقت شدتها
ع الحبايب تقوم جامعاه
يبدأ كلامه غنا
والناس تقول الله
لو تفرحي؟
مصر النعيم والفل مفرودة ع الدنيا
مصر الميدان مليان في أقل من ثانية
مصر الولاد الحلوة والصبايا الحور
مصر النهار طالع مصر السلام بيفور
أنده عليها وأقول سيد أبا درويش
والشيخ إمام يهتف
شيد قصورك عيش
وأنا نفسي أموت لك شهيد
حتي ف طابور العيش
لو تفرحي
لو تفرحي يامصر راح تفرح لك الأكوان
ياست كل العهود
ياحارسة الأزمان
ياجوع بطول النهار
يامائدة رحمن
بأرمي عليكي من الشبع ما لذ وطاب
وألقي في مدارسك ع الدكك أصحاب
والقاكي بتقابلي نهارنا بالترحاب
وألقاني بناديكي وديك الصبح بينادي
وأفضل أعلم بيكي معني الحب لولادي
وأسهر وأنا مشتاق
محسود علي بلادي
من دون ولاد الخلق
قال:
مالكم تغازلون مصر وكأنها امرأة جميلة
قلت:
كلنا أشتات إلا في حبها كلنا عشاق