شباك علي الثورة

آخرتها انتصار الثورة..والقصاص محتوم

قالها عبده شمة ثم انخرط في البكاء
وقال أحمد القزعة:
وحد الله ياغيبوبة أمال
فقال عبده شمة وهو مازال يبكي
لا إله إلا الله سيدنا محمد رسول الله.
وقال أحمد القزعة:
- ربنا مايسبش.
وقال عبده شمة
حسبي، وهو يكفي فيكم ياكلاب ياخونة حسبي الله ونعم الوكيل.
قلت:
- استعذ بالله ياحاج عبده.. استعذ بالله.
قال وهو يبكي:
استعذ بالله من مين ياعم أحمد؟ من المجلس العسكري ولا من وزير الداخلية ولا من فلول حسني مبارك.
فقال أحمد القزعة:
ماهم دول كلهم فلول حسني مبارك.
وقال عبده شمة:
دي عصابة ياعم أحمد ليها أول ومالهاش آخر.
قلت:
مافيش حاجة مالهاش آخر ياحاج عبده.
فقال:
ميتا ياعم أحمد ميتا؟
قلت:
كل آت قريب.
وقال أحمد القزعة:
واشمعني مايقتلوش إلا الشباب.
قلت:
لأن الشباب هو اللي فجر الثورة وهو اللي حيكملها وهو بكره اللي حيطلع علي مصر المحروسة زي الشمس مابتطلع كل صباح بإذن واحد أحد
فقال أحمد القزعة:
البقية في حياتك ياغيبوبة ياخويا شد حيلك
قلت:
هو الحاج عبده له فيهم حد يا قزعة.
فقال:
فتحي ابن اخته
قلت:
ابن الحاج عبدالعزيز العطار؟
فقال عبده شمة:
أيوه ياعم أحمد فتحي اللي في كلية الهندسة.
ثم انفجر في بكاء مرير.
وقال أحمد القزعة:
وآخرتها ياعم أحمد؟
قلت:
آخرتها انتصار ثورتنا المجيدة والقصاص محتوم.
وقال عبده شمة:
وفين ياعم أحمد المليارات اللي نهبوها وهربوها.
قلت:
مايموتش حق ووراه مطالب ياحاج عبده.
وقال أحمد القزعة:
أنا عايز أعرف ياكبير أنت بتجيب التفاؤل ده منين؟
قلت:
من الشارع ياقزعة طول ما الشارع فيه ناس صاحيين يبقي لازم "المايلة تتعدل" علي رأي المرحومة أمي.
وقال عبده شمة:
ميتا حيحصل ده ياعم أحمد؟
قلت:
انتو مستعجلين ع القصاص وأنا معاكم لكن أنا لسه فاكر المثل اللي بيقول حق الرجال تلابيب وكل مابيزيدوا في اجرامهم كل ما أتأكد أن يومهم قرب.