(شطرنج على المصطبة)

ياعسكرى ....كش ملك

شوف ياأبوأحمد ..."إخواناالاذكياء المنظمين .. ورجال النور المتحفزين .. خلاص ركبوا البرلمان بالاتفاق والتخطيط مع العسكر ..حد يقدر يقول لا؟! ... لا".
رد إسماعيل وقاله "آه ..ركبوا بس تخطيطهم وتظبيطهم على عينك ياتاجر... هو إحنا مخنا مهلبية...داحنا نفهم الكفت ..آه ".
قاله عوضين وهو بيقعد جنبهم ع المصطبة .. "هما ركبوا وبس" !!
دى كانت انتخابات بزراميط ولا إنتخابات الشاذلي وأحمدعز فى زمانه اللى وكس النظام كله بغباوته وغرروه ...كانت انتخابات كلها تجاوزات وتحريضات ورشاوى على ودنه !!
رد حسانين.."آىوالله .. ده أنا لهفت كيس رز وكيس لحمة حمرة ملبسة ومراتى لهفتلها ورقة بميه ... ده حتى الوادعويس إبنى اللى فى اولى ثانوي لهف بنطلون وقميص ... دى كانت هيصه وزمبليطة ياولاد... اليوم ده كلنا فيه فته لحمه ".
عارفين يارجاله أم سونة؟...مراتى.. وهى فى اللجنة هجم عليها (4) ملثمين ماتعرف دول ستات ولا رجالة !!" أهى خيمة سوده باظظ منها جوز عيون" .. سألوها "بتعرفي تكتبى ؟ قالت لهم لا... بس بنتى فى الجامعة .. قالولها حتنتخبى مين ؟!قالت أم سونة "الوفد طبعا" ... راحوشدين الورقة من ايديها وعلموا على الميزان .
دبت بالصوت وقالت كده غلط .."أنا عايزة النخلة ..."؟!
راحو بسرعة البرق حطوا الورقة فى صندوق الانتخابات وسابوها تكلم نفسها وراحو لغيرها
قرب الموظف منها بدقنه اللى طولها 1/2متر وقالها "ياحاجة بلاش دوشة ماتعطلناش.. خلاص انتى انتخبتى وصباعك اتنيل باللون ألاحمر روحى بقه خلينا نشوف غيرك" .
خرجت أم سونة تخبط أيد على أيد وتقول "هي دى الثورة "؟! .. "هى دى الامانة بتاعتكم ؟ ياخرابى ياولاد !!! ده الكل مطنش بوليس وجيش !بره وجوه.. والنبى البلد دى عمرها ماهتنظف أبدا"!!!
رجعت الدار وهى مكتئبة وحاسة ان إنضحك عليها وأنها واللى زيها صغيرين قوى قوى.. وخاصة بعد النظرات اللى بقرف واستهجان من رئيس اللجنة اللى لم يرد عليها.
"ياولاد ..الطبخة ريحتها طلعت والحكاية بقت واضحة زى عين الشمس.. المجلس العسكرى سلم لهم البلد بعد أن خرجهم من السجون ورجعهم من الخارج بعد أن كانوا لاجئين فى بلاد خلق الله مع زمايلهم اللى بيصرفوا عليهم ويدعموهم بالريالات والدولارات"
بسطاويسى قام وقف وصرخ .. كفاية !!.. خلاص ركبوا ركبوا ...
ومن امتى كان لينا رأى فى البلد دى..ستين سنة وإحنا بنتساق زى الجاموس لحد ماقامت الثورة ...تعالوا نشوف هيعملوا أيه ..هوه أيه ده ؟!
أنتم مش محكومين بالعسكر .. كلام فى اللي فات مالوش عازه ....نبص لبكره مش ممكن بجد ينقذوا البلد من الفلس اللى أحنا عايشين فيه ؟!
رد أحمد طالب الحقوق ..الاعلان الدستوري قال إن البرلمان(يعنى ياأخوانا) هما يشكلوا اللجنة التاسيسية لكتابة الدستور ..لازم يشترك معهم ناس بتفهم من خارج البرلمان لان ده دستور مصر مش دستور إخوانا .
آه اللى ... اوله شرط أخره نور... والا التحرير موجود والثورة مستمرة .
ده كان هيحصل برده حتى لو كسب التيار الليبرالي .. لازم برده يشرك الجميع لكى لايفرض تيار معين شروطه وافكاره وعاداته على التيارات الاخرى فلابد أن يكون الدستور متوزان بين كل القوى .
ان الاغلبية البرلمانية لها أحترامها ولها كل التقدير أما حقوق الانسان والحريات والديمقراطية فلها أحترامها أيضا .
رد اسماعيل وقال أذا كانت نيتهم سليمة حينفذوا اللى قلت عليه ده كله يأستاذ أحمد.. ويبعدوا عن فكرة الاغلبية المتسلطة دى.. وتتكللم قياداتهم وتعرض علينا بصراحة المواد الرئيسية اللي عايزين يحطوها فى الدستور والمواد اللى هيرفضوها .
وبذلك يبدأ الحوار والكلام بين لجنة توافقية مشكلة وتقف على كده الاشاعات ويوقف الجدل اللى مالى الدنيا واللى بدأ بالوثيقة الدستورية ووثيقة السلمى الخربانة المغرضة ... مش بقولك دول عسكر .......؟!
رد أبو أحمد أدى أحنا قاعدين ع المصطبة جنب الحيطة بنتفرج وبنسمع الزيطة فى البرلمان والميدان ...مستنظرين الفرج وربنا يرحمنا من أتفاقات العسكر مع إخوانا.. وبلاش حكاية الخروج الآمن دى للقتلة والحرامية والنصابين اللى خربوا مصر ونهبوا فلوسنا
أخرج ياعسكرى خروج مشرف أفضل لك بعد أن تسلم الحكم المدنى للشعب...لان جيش مصر عمره ماهيخون شعب مصر ...ده الجيش اللى عبر 6 أكتوبر وحمى الثورة ... ولكن انتا يامجلس ياعسكرى عمال تلعب وتحاور ...وطبعا أحنا عارفين ليه ؟! بتحافظ على المخلوع وعصابته وبتسوف المحاكمات وتحافظ على نفسك ؟أنتا كمان .." مش كده واللى إيه" (الله يرحمك ياعم فؤاد المهندس ) .
دكتور
---------
المنسق العام لحزب الوفد