ننشر.. كواليس تلفيق كمية "الحشيش" ل"ياسمين النرش" من شهادة أحد المقربين لها

رصدت جريدة "الشعب" رواية أحد المقربين من "ياسمين النرش"؛ حيث يتطرق لأدق تفاصيل الواقعة ويرصد كواليس المشهد فيقول: "قابلتها مرتين في حياتي. مهياش رقاصة و لا إنسانة متعالية ولا ثورة ولا فلول ولا بتنجان. هي مجرد إنسانة ليها طفلة اشتغلت كتير و دلوقتي عايشة في الجونة و بتتعامل في هذا الأطار والمجتمع. كانت راجعة من حفلة على المطار على طول علشان تلحق طيارة توصلها عشان تاني يوم بنتها عندها مدرسة. وصلت متأخر بس الطيارة ما فتتهاش، ما دخلوهاش على الطيارة فاتخانقت، والأمن لما جه عمل معاها جو طب روحي فوقي واغسلي وشك و برضه مش طالعة. طريقة تعاملها مع الموقف مش أسلوب تعاملها في الحياة، بس واضح إنها فقدت أعصابها جامد، بسبب أنها عاوزة توصل لبنتها، فزقت الظابط زي ما عملت في الفيديو. لما الموضوع تصاعد زي ما أنتم شفتم في الفيديو التاني، قالتلهم يلا بينا علي القسم بثقة. دخلولها أربعة بوليس نسائي وبقدرة قادر طلعوا منها كيلو الحشيش ده وهي مخلوقة أساسا ما لهاش فيه يعني وابتدت تشرب سجاير من ست شهور. ودلوقتي محبوسة في القسم بتهمة الإتجار وقلبت قضية رأي عام بطريقة أنا مش فاهمها. فأنا أسئلتي كالأتي:
1) واحدة كانت شغالة في EFG و عايشة في الجونة حتتاجر في الحشيش ليه؟
2) واحده معاها كل الحشيش ده وطالعة بيه على الطيارة و كمان حتتخانق مع الأمن والناس بتصور وتقول بكل ثقة يللا على القسم أزاي؟
3) رد الفعل بتاع "ديه لازم تتعلق" والشرطة الغلبانة ده جاي منين؟
ويكمل قوله؛ يعني أنا مع حق الظابط إنه يعملها قضية اعتداء و يلبسها الكلبشات كمان، عشان ده قانون و حقه. بس يلبسها إتجار؟ و بعدين هي لما اعتدت عملت إيه؟ زقته؟ أتبل بمية؟ علت صوتها عليه؟ بجد؟ يعني إحنا في بلد الظابط يقل أدبه عليك ويضربك ويلطشلك ويضربك بالخرطوش ويقتلك ويبقى متسجل صوت وصورة ومحدش يتسجن غير الشهود ونقول معلش أصلها كانت رفيعة وعشان كده الخرطوش قتلها ومحدش عمل حاجة، وواحدة زقت ظابط وقلت أدبها عليه يبقى الكلام أنه أحسن أنهم لبسوها قضية إتجار وقالوا عليها رقاصة ونشروا بطاقتها وعنوانها وصورها مع أصحابها؟ سؤال بس يعني: هو أنتم ليه مش فاهمين أن القانون منطق من غير مشاعر؟ يعني مش حاجه شخصية و مشاعرنا كلها ما فيهاش مكان ليها؟ أنا لما بحكي حكايتها أنا مش بقولها عشان الناس تتعاطف: أنا بحكي وقائع و موافق أن الظابط يعملها محضر تعدي عشان هي تعدت والقانون منطق ما فيهوش مشاعر وكنت ساعتها ضربت تعظيم سلام للظابط المحترم اللي تعامل قانوني. ليه بقى الفضيحة؟ والتجريس ونشر بطاقتها اللي إحنا عارفين من سربها للإعلام؟ وتلفيق قضية إتجار؟ مش ده جاي من مشاعر الشرطة الكريمة من زاوية "إحنا لازم نفشخها عشان الهيبة و نعمل منها عبرة"؟ إيه دخل ده في القانون؟ محتاجينه ليه؟ بتعملوه ليه؟ والأهم من ده كله، شايفينه من حقكم ليه؟
القانون منطق من غير مشاعر. افتكروا الجملة ديه كويس، حتلاقوا أنكم مش محتاجين تخلقوا قضية رأي عام أنتم عارفين أنها فشنك عشان تخلوا الناس تتعاطف مع الداخلية بس..