فيديو.. خيري رمضان: صافيناز كل إمكانياتها إنها بتقلع وعندها حاجات بتتهز

قال الإعلامي خيري رمضان منتقدا اهتمام الصحف ووسائل الإعلام بإلغاء حفل الراقصة الشهيرة صافيناز بمحافظة الغربية "تخيلوا إن صافينار رقاصة على فكرة معندهاش أي إماكنيات تانية غير إنها ست حلوة بتقلع وبترقص، بتهز، عندها حاجات بتتهز، ده كل اللي عند صافينار، والبنات الحلوة كتير، بس لقينا صافينار بنت حلوة بتقلع وبتتهز، حديث، خناقة مع متعهدها مش عارفين متهربة اتجوزت، بقت موضوع".
وأضاف "رمضان"، في برنامجه "ممكن" على قناة CBC، مساء الخميس: "في الوقت اللي بنتكلم فيه هذه الأيام عن صافينار، وتعلن مديرية أمن الغربية أنها غير قادرة على تنظيم حفل صافينار، بيؤكد محافظ الغربية إنه يستطيع تنظيم الحفل بجدارة، احنا إمكانيتنا جامدة جدًا لا صافينار ولا غيرها يهزنا، هي بتهز المسرح بس احنا مبنتهزش، مصر آمنة، مصر قوية مستقرة، حتى ينشغل محافظ بأمر صافينار ويعطي تصريحات وتهتم وسائل الإعلام، محافظ أو مدير أمن، مش هتفرق كتير، هتفرق إن المسؤولين بيأكدوا أنك قادر على تنظيم حفل أو عدم تنظيمه من رقاصة".
وتابع: "هو مين النجم في مصر اللي احنا يجب أن نحتفي بيه، واحنا بنتكلم مع كل الضيوف في كل الأوقات بنتكلم عن غياب القيمة، غياب الرمز، وبقينا احنا في ارتباك هو مين اللي احنا بنحتفي بيه، مين اللي يجب احنا نقدمه ونهتم بيه، احنا كإعلام هل يا ترى بنسلط الضوء على النماذج الحقيقية اللي تستحق التركيز، ولا احنا مع الرايجة؟ والرايجة يعني النجم اليومين دول".
واختتم رمضان: "فاكر لما العالمي الدكتور عصام حجي، الذي يعمل في ناسا، اللي اتصدم إن المصريين مشغولين بالعنتيل في شهر نوفمبر اللي فات، في حين إن كان في 5 من علماء مصر في ناسا بيطلقوا سفينة فضاء وبيقوموا بمهمة علمية عظيمة جدًا، ساعتها احنا شدينا ودنا، وقلنا فعلًا معاه حق".