ننشر تفاصيل الطفل صاحب ال 5 أرغفة

عبد المسيح: "عملت في الفرن وأخذت عيش زي كل العمال".. اتهموني بسرقة 171 رغيفا.. و8 جنيهات أودعتني المؤسسة العقابية
"أنا أخذت 5 أرغفة من الفرن اللى كنت بشتغل فيه زى أي حد من عمال الفرن بياخد عيش ولقيتهم حطوا طاولة الخبز كلها على تروسيكل المخبز وحطونى معاها وخدونى على المركز وقالوا لى هتدخل الإصلاحية"، كانت هذه كلمات الطفل عبد المسيح عزت صاحب السنوات العشر الذي تم اتهامه بسرقة 5 أرغفة وحكم عليه غيابيا بدخول المؤسسة العقابية ثم قررت محكمة جنح مستأنف أحداث بنى سويف براءته بعد تنازل صاحب الفرن عن اتهامه.
وأكدت والدته مريم فوزى، أن "ابنى أخذ خمسة أرغفة فعلًا بس مسرقش وهيسرقهم إزاى وابنى بيشتغل عندهم في المخبز كل عمال الفرن بياخدوا العيش اللى عايزينه".
وأوضحت: "أنه من حوالى سنة ونصف لقينا مركز الشرطة باعتلنا، وأول ما دخلت لقيت ابنى واقف على جنب واستفسرت عن سبب حضوره، حيث أبلغونى أن صاحب المخبز اللى شغال فيه ابنى عامل محضر واتهمه فيه بسرقة 171رغيفا بما يعادل 8 جنيهات وقولنا له أكيد أنت غلطان وقصدك على حد تانى، لكن صاحب المخبز المعلم عيد أصر على أقواله وبعدها رحنا للنيابة وكيل النيابة سمع لأقوال ابنى وقال له روح بيتك وقالولنا إن المحضر هيتحفظ".
وتابعت شقيقته مارينا 19 سنة، "أنه منذ أسبوعين فوجئنا بإنذار جاى على منزلنا ولما سألنا اكتشفنا إن قضية فادى (اسم الشهرة) لعبد المسيح لسه شغالة واتحكم عليه فيها بالإيداع في مؤسسة رعاية الأحداث لصغر سنه لمدة عام، ورحنا للنيابة والمحامى عمل الاستئناف واتحدد لها جلسة وتدخل ولاد الحلال في الموضوع أعضاء مجلس شعب سابقين ورجال دين إسلامي ومسيحى راحوا لصاحب المخبز وأقنعوه بعمل محضر تصالح والتنازل عن القضية وحكم القاضى بالبراءة".
فيما أضاف والد الطفل: "أنه يمتلك عربة حنطور يصرف بها على إخوته ووالدته ولديه ثلاثة أشقاء الأكبر مينا 20 سنة ومارينا 19 سنة وماريا 4 سنوات، موضحًا أنني أشكر الرب على براءة ابنى وأخدته معايا للبيت وخلاص مش هسيبه يشتغل عند حد تانى"، معبرًا عن سعادته ببراءة نجله من تهمة لم يرتكبها ولو فعلها فهو طفل ماذا يعلم في حياته أو دنيته عن السرقة عشان نتهمة بالاتهام ده.
وكانت محكمة جنح الطفل (مستأنف الأحداث) برئاسة المستشار فوميل لبيب وأمانة سر عبد العاطى عبد المجيد تحت رقم 58 لسنة 2012 ألغت حكم محكمة أول درجة غيابيا بإيداعه دور الرعاية الاجتماعية وقررت تسليم الطفل عبد المسيح عزت عزيز إلى ذويه لتسدل الستار على قضية أثارت جدلا كبيرا خلال الأيام الماضية.