زوجة "دومة" تعلن فك إضرابه عن الطعام في محضر رسمي

بشكل مؤقت..

قالت نورهان حفظي زوجة الناشط السياسي أحمد دومة، إنه قام بفك إضرابه عن الطعام بشكل مؤتمر، وذلك بعد زيارة الناشط السياسي أسامة المهدي لدومة في يوم الأحد الماضي، فقرر يعلق إضرابه عن الطعام مؤقتاً حتى التوصل لعلاج أو حتى مسكن مناسب لآلام قرحة المعدة والاثنى عشر غير المحتملة وحالة القيء المستمر اللي بتضاعف آلام القرحة واللي حقن المسكن المانعة للقيء _ اللي كتبها دكتور السجن _ مجبتش نتيجة فيها حتى بعد مضاعفتها ل6 حقن في اليوم .
وأضافت حفظي، في تدوينه لها علي موقع التواصل الاجتماعي "فيس بوك": "أحمد فضل أن قرار تعليقه للإضراب عن الطعام يكون بمحضر رسمي عشان العودة إليه مستقبلياً تكون كمان بمحضر رسمي حفاظاً علي مصداقية رسالته وخوفا من استغلال السلطة حالته للتشكيك في معركة الأمعاء الخاوية وحالة جبنا آخرنا ككل، رغم أنه فعلياً مش عارف يفك الاضراب يعني أحمد عمل محضر رسمي بتعليق الإضراب رغم انه عارف انه فعلياً مفيش أي حاجة مهما كانت بسيطة ( زي الزبادي والعصائر) بتستقر في معدته بس عشان وهو بيحاول ميصورهوش ويقولوا احمد دومة مش مضرب عن الطعام وبالتالي التشكيك في حالة الإضراب بالسجون ككل.
وتابعت حفظي: "أحمد سبب في المحضر قرار تعليقه المؤقت للإضراب بحالته الصحية المذرية ووصول آلام جهازه الهضمي لدرجة مرعبة لا يمكن تحملها وانه حاول يتحملها ويتعامل معاها لكن مقدرش (مش للحفاظ علي حياته زي ما الداخلية قالت).
وأكد أن وصوله للدرجة دي واضطراره لتعليق إضرابه لهذه الأسباب وصمة عار للسلطة اللي استغلت مرضه للضغط عليه بشكل غير مباشر لفك إضرابه بمنعه خروج مستشفي وتوفير العلاج والرعاية المناسبة اللي تمكنه من إكمال إضرابه المشروع عن الطعام ،،،
طبعاً لان الداخلية مينفعش تعترف بحالة احمد الصحية الحقيقية والجريمة اللي ارتكبوها ومستمرين في ارتكابها بمنع حالة زي حالته من العلاج (كان لازم يقولوا في تصريحاتهم ان سبب فك الإضراب استجابةً للنصح والإرشاد) - رغم قرار احمد تعليقه الإضراب من يوم السبت 27 سبتمبر يعني من 4 ايام الا انه لحد النهارده مش قادر ياكل اي شيء، أي محاولات للاكل مصيرها القيء الفوري- النهارده عرفنا انه اتنقل مستشفي السجن امبارح بعد تدهور حالته ومازال فيها لحد دلوقتي رغم ده كله لسه الجريمة مستمرة ،لسه احمد ممنوع من العلاج ،لسه بيتعذب بالامه من غير شفقه ولا رحمة ولا احترام لأدنى معايير حقوق الانسان .
واختتمت " :احمد ترس واحد من تروس جبنا اخرنا الكتير جوا السجن وبراه لو قدروا يضغطوا عليه بمرضه بمنتهي القذارة لازم باقي التروس تكمل اقوي من الاول ، مش محتاجة اقول اد ايه احمد عِندي وصلب وحمول ولا اوصف معني وبشاعة الالام اللي اجبرت واحد زيه دائما في مقدمة المعارك يتراجع موقتاً عن معركة مصيرية زي معركة الأمعاء الخاوية، لكن محتاجة آكد ان استمراركم بقوة هو الحاجة الوحيدة اللي هتهون عليه العبء النفسي الرهيب لقرار تعليقه الإضراب. "