خبير اقتصادي يكشف مفاجأة عن ال7 مليارات الوهمية بالبنك المركزي

فند سامح أبو عرايس - الخبير الاقتصادي - بيان البنك المركزي الذي أعلن فيه وجود فائض في ميزان المدفوعات يصل إلى 7 مليار دولار ، مؤكدًا أنه "رقم مضلل".
وقال "أبو عرايس" في تدوينة عبر حسابه ب"فيس بوك": "البنك المركزي أصدر بيان ان مصر حققت فائض في ميزان المدفوعات حوالي 7 مليار دولار في النصف الأول من السنة المالية .. الحقيقة الرقم ده مضلل جدا لأن أغلب الفلوس دي قروض أهمها الشريحة الأولى من قرض صندوق النقد الدولي 2.75 مليار دولار وأيضا طرح سندات في بورصة ايرلندا في نوفمبر بقيمة 4 مليار دولار ده غير اكتتاب الأجانب في سندات الخزانة المصرية اللي هي كمان قرض على الدولة".
وأضاف: "نتيجة لذلك زادت الالتزامات الخارجية على البنك المركزي بأكثر من 8 مليار دولار في نفس الفترة .. يعني لو استثنينا القروض اللي هي فعليا التزامات على الدولة نلاقي إن ميزان المدفوعات حقق عجز في الحقيقة .. ميزان المدفوعات هو ببساطة الفرق بين الأموال الداخلة والخارجة للدولة من كل المصادر يعني لو الفلوس اللي داخلة لمصر أكثر من الخارجة يبقى موجب وفائض ولو الخارجة أكثر من الداخلة يبقى سالب وعجز".
واستدرك: "فائض ميزان المدفوعات المفروض إنه يكون من مصادر حقيقية زي الصادرات أو السياحة أو تحويلات العاملين في الخارج أو قناة السويس أو استثمار مباشر مثلا .. لكن لما يبقى ميزان المدفوعات محقق فائض بسبب القروض مايبقاش فائض حقيقي لكن فائض وهمي لأن القروض دي التزامات على الدولة وهتضطر تدفعها بعد كده أضعاف بفوائدها .. فياريت اللي بيطبلوا ويقولوا إن السياسة الاقتصادية حققت فائض لميزان المدفوعات يرحمونا من التطبيل شوية" حسب تعبيره.