عمة "ضحية التصفية" تتبرأ منه: غسلوله مخه

تبرأت شيماء عامر - عمة الشاب عمار عامر الذي يتهم نشطاء الداخلية بتصفيته - من أفعاله مشيرة إلى أن الجماعات الإرهابية استطاعت غسيل مخه حتى اقنعته بالاعتداء على كنيسة .
وقالت "شيماء" في تدوينة عبر حسابه ب"فيس بوك": "إنت لله وإنا إليه راجعون .. ياريت كل الناس تقرأ البوست دا ... عمار أحمد جلال عامر ابن أحمد اخويا الوحيد وعمار أول فرحته ... عمار شاب 18 سنة ، ماشفتش ولد في أدبه وأخلاقه .. عمار ولد حافظ للقرآن .. بيصوم اثنين وخميس بار بأهله قرة عين امه وابوة مابيفوتش صلاة فجر ، كل جيرانه كانوا بيقولوا يارب نشوف ولادنا زي عمار وكفايه اني اقول إنه ابن احمد جلال عامر ( احمد ) لا أزكيه علي الله مش عارفة أقول ايه عنه علشان محدش يقول علشان اخوها بس اسألوا عن أحمد جلال" .
وأضافت: "عمار أنا بقول إن ابتلي في مخه .. اتعمله غسيل مخ من ناس هما مش بشر دول شياطين الإنس في الأرض سيطروا عليه باسم الدين والجنة والشهادة .. أحمد وأسرته زي أي أسرة كانوا مع الإخوان و رابعة وكدة وطبعا كنا مختلفين سياسيا زي ماحصل في معظم الاسر المصرية ودا كان من 2013 وخلاص الموضوع خلص والدنيا هديت لكن عمار فضل مكمل في طريق نهايته ... طبعا كل مواقع الاخوان السفاحين كاتبين أن عمار اتقتل برصاص الشرطة السفاحين القتلة وهو نازل يصلي الفجر وأنهم اعتقلوا أبوه.... ولكن الحقيقة أن عمار دماغه اتلحست و راح هاجم فرد أمن علي كنيسة سانت فاتيما وحاول قتله لكن الحمد لله مامتش ربنا يقومه بالسلامة .. اتضرب عمار بالرصاص راح عمار ضحية .. ضحية حاجات كتير أوي . وأحمد أخويا مانعرفش عنه حاجة هو في أمن الدولة ربنا يفك كربه ويخرجلنا بالسلامة".
وأردفت: "طبعا أنا بكتب كدة ليه.. بكتب علشان أقول إني مش مكسوفة ومش هقول إن ابن أخويا مات في حادثة زي ما الناس قالولي .. لأ انا متصالحة مع نفسي وبقول للدنيا كلها إن عمار ابن اخويا حبيب عمته الوحيدة مات نتيجه تطرف ديني وفكري و دا ابتلاء .. كان ممكن يجيلنا الابتلاء دا في إدمان في سرقة في إجرام .. عايزة اقول إن اللي هيخاف يكلمني علي أساس أن انا عمة الإرهابي وكدة هو حر مع الف سلامة والله مافارق معايا جنس مخلوق في الكون مش فارق معايا غير أن اخويا يرجعلي بالسلامة وينور دنيتي ودنية أمه اللي قلبها مكسور .. واللي عايز يدعي لنا أن ربنا يصبرنا ويرحم ابننا ويسامحه ويرجعلنا أحمد اللي ماليش غيره يكون كتر خيره ...... اسفة علي التطويل ولكن أنا قصدت احكي الحكاية بالتفصيل علشان اللي بيألفوا قصص وبيتاجروا في موت عمار يخرسوا ويسيبونا في حالنا ويتقوا الله كفايه كذب .. إن شاء الله عمار هيتعملوا عزاء في مسجد يليق بعيلته بس لما أبوه يخرج بالسلامة ياخد عزاء ابنه ... اللهم اجرني في مصيبتي واخلفني خيرا منها".